1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏ ⵡⴰⵡⴰⵍ ⵏ ⵙⵉⴷⵉ ⵅ ⵉⵙⵔⴰⵉⵍ. ⵙⵉⴷⵉ ⵉⵙⵙⴰⵡⴰⵍ, ⵏⴻⵜⵜⴰ ⴷ ⵡⴻⵏⵏⵉ ⵉⵜⵜⴱⴻⵣⵣⴰⵄⴻⵏ ⴰⵊⴻⵏⵏⴰ ⵓ ⵉⵙⵙⵔⵓⵙⴰ ⴷⵙⴰⵙ ⵏ ⵜⴻⵎⵎⵓⵔⵜ ⵓ ⵉⵙⵙⴱⴻⴷⴷⴰ ⴰⵔⵔⵓⵃ ⵏ ⴱⵏⴰⴷⴻⵎ ⴷⵉ ⴷⴰⵅⴻⵍ ⵏⵏⴻⵙ:

2 “ⵅⵣⴰⵔⴻⵎ, ⵏⴻⵛⵛ ⴰⴷ ⴳⴳⴻⵖ ⵓⵔⵛⴰⵍⵉⵎ ⴷ ⵟⵟⴻⴱⵚⵉ ⵏ ⵓⴷⴻⵡⵡⴻⵅ ⵉ ⵎⴰⵔⵔⴰ ⵍⴻⴳⵏⵓⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵓⵛⴰ ⴰⴷ ⴷⴷ-ⵢⴰⵙ ⵟⵟⴻⴱⵚⵉ ⵏⵏⵉ ⵓⵍⴰ ⵅ ⵢⴰⵀⵓⴷⴰ ⵖⴰⵔ ⵍⴻⵃⵚⴰⵔⴻⵜ ⵏ ⵓⵔⵛⴰⵍⵉⵎ.

3 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⵏⴻⵛⵛ ⴰⴷ ⴰⵔⵔⴻⵖ ⵓⵔⵛⴰⵍⵉⵎ ⴷ ⵉⵊⵊ ⵏ ⵡⴻⵥⵔⵓ ⵉⴷⴻⵇⵍⴻⵏ ⵉ ⵎⴰⵔⵔⴰ ⵍⴻⴳⵏⵓⵙ. ⵎⴰⵔⵔⴰ ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⵜ ⵙⵙⴳⴻⵄⵄⴷⴻⵏ, ⴰⴷ ⵙⵙⵢⴻⵣⵎⴻⵏ ⵉⵅⴻⴼ ⵏⵙⴻⵏ ⴰⵟⵟⴰⵙ ⵓ ⵎⴰⵔⵔⴰ ⵍⴻⴳⵏⵓⵙ ⵏ ⴷⴷⵓⵏⴻⵛⵜ ⴰⴷ ⵜⵜⵡⴰⵙⵙⵎⵓⵏⴻⵏ ⴹⵉⴷⴷ ⵏⵏⴻⵙ.

4 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ, ⴰⴷ ⵡⵜⴻⵖ ⵎⴰⵔⵔⴰ ⵉⵢⵙⴰⵏ ⵙ ⴰⵔⵊⴻⴼ ⴷ ⵉⵎⵏⴰⵢⴻⵏ ⵏⵏⴻⵙ ⵙ ⵜⵓⴱⴱⵓⵀⴻⵍⵢⴰ, ⵎⴰⵛⴰ ⴰⴷ ⵇⵇⵉⵎⴻⵖ ⴰⵔⴻⵣⵣⵎⴻⵖ ⵜⵉⵟⵟⴰⵡⵉⵏ ⵉⵏⵓ ⵅ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⵅⵎⵉ ⵉ ⵖⴰ ⵡⵜⴻⵖ ⵎⴰⵔⵔⴰ ⵉⵢⵙⴰⵏ ⵏ ⵍⴻⴳⵏⵓⵙ ⵙ ⵜⵓⴷⴷⴰⵔⵖⴻⵍⵜ. 5 ⵉⵎⴳⴻⵡⵡⴰⴷⴻⵏ ⵏ ⵢⴰⵀⵓⴷⴰ ⴰⴷ ⵉⵏⵉⵏ ⴷⴻⴳ ⵡⵓⵍ ⵏⵙⴻⵏ: ‘ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⴰⴷ ⵉⵍⵉⵏ ⴷ ⵊⵊⴻⵀⴷ ⵉⵏⵓ ⵙ ⵓⴼⵓⵙ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏⵙⴻⵏ!’

6 ⴷⴻⴳ ⵡⴰⵙⵙ ⵏⵏⵉ ⴰⴷ ⴳⴳⴻⵖ ⵉⵎⴳⴻⵡⵡⴰⴷⴻⵏ ⵏ ⵢⴰⵀⵓⴷⴰ ⴰⵎ ⵢⵉⵊⵊ ⵏ ⵍⵎⴻⵊⵎⴰⵔ ⵏ ⵜⵎⴻⵙⵙⵉ ⴷⵉ ⵜⴰⴼⴼⴰ ⵏ ⵓⴽⴻⵛⵛⵓⴹ ⵓ ⴰⵎ ⵢⵉⵊⵊ ⵏ ⵡⴻⵚⴼⴻⴹ ⵊⴰⵔ ⵜⵉⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ ⵓ ⵏⵉⵜⵏⵉ ⴰⴷ ⴼⴼⵣⴻⵏ ⵎⴰⵔⵔⴰ ⵍⴻⴳⵏⵓⵙ ⵉ ⴷ ⴰⵙⴻⵏ ⴷⴷ-ⵉⵏⵏⴹⴻⵏ, ⵖⴰⵔ ⵢⴻⴼⵓⵙ ⵓ ⵖⴰⵔ ⵓⵣⴻⵍⵎⴰⴹ, ⵓⵛⴰ ⵓⵔⵛⴰⵍⵉⵎ ⴰⴷ ⵜⴻⵇⵇⵉⵎ ⵄⴰⴷ ⴷⴻⴳ ⵡⴻⵎⵛⴰⵏ ⵏⵏⴻⵙ, ⴷⵉ ⵓⵔⵛⴰⵍⵉⵎ. 7 ⵙⵉⴷⵉ ⴰⴷ ⵉⵙⵙⴻⵏⵊⴻⵎ ⴰⵎⴻⵣⵡⴰⵔ ⵉⵇⵉⴹⴰⵏ ⵏ ⵢⴰⵀⵓⴷⴰ ⵃⵉⵎⴰ ⵛⵛⴰⵏ ⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⴷ ⵛⵛⴰⵏ ⵏ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⵡⴰⵔ ⵉⴷⴷⵉⴽⴽⵡⵉⵍ ⴷ ⴰⵎⴻⵇⵇⵔⴰⵏ ⴰⵟⵟⴰⵙ ⵇⵉⴱⴰⵍⵜ ⵉ ⵢⴰⵀⵓⴷⴰ.

8 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵙⵙⴷⵓⵔⵉⵢ ⵙⵉⴷⵉ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ.

ⴷⴻⴳ ⵡⴰⵙⵙ ⵏⵏⵉ ⴰⴷ ⵢⵉⵍⵉ ⵡⴻⵏⵏⵉ ⵉ ⵖⴰ ⵉⵏⵏⵇⴰⵔⴹⴻⵏ ⵊⴰⵔ ⴰⵙⴻⵏ ⴰⵎ ⴷⴰⵡⵓⴷ ⵓⵛⴰ ⵜⴰⴷⴷⴰⵔⵜ ⵏ ⴷⴰⵡⵓⴷ ⴰⴷ ⵜⵉⵍⵉ ⴰⵎ ⴰⵔⴻⴱⴱⵉ, ⴰⵎ ⵍⵎⴰⵍⴰⴽ ⵏ ⵙⵉⴷⵉ ⵣⵣⴰⵜ ⵉ ⵡⵓⴷⴻⵎ ⵏⵙⴻⵏ.

9 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⵏⴻⵛⵛ ⴰⴷ ⵔⴻⴽⴽⵣⴻⵖ ⴰⴷ ⵎⵃⵉⵖ ⵎⴰⵔⵔⴰ ⵍⴻⴳⵏⵓⵙ ⵉ ⴷⴷ ⵖⴰ ⵢⴰⵙⴻⵏ ⵉ ⵍⴻⵃⵚⴰⵔⴻⵜ ⵖⴰⵔ ⵓⵔⵛⴰⵍⵉⵎ. 10 ⵎⴰⵛⴰ ⴰⴷ ⴼⴰⵔⵔⵖⴻⵖ ⴰⵔⵔⵓⵃ ⵏ ⴰⵔⴹⴰ ⴷ ⵜⵥⴰⴵⵉⵜⵉⵏ ⵅ ⵜⴰⴷⴷⴰⵔⵜ ⵏ ⴷⴰⵡⵓⴷ ⵓ ⵅ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⵓ ⵏⵉⵜⵏⵉ ⴰⴷ ⵖⴰⵔⵉ ⴷⴷ-ⵅⵣⴰⵔⴻⵏ ⵡⴻⵏⵏⵉ ⴷⵉ ⵙⵙⵏⵓⵇⵇⴱⴻⵏ. ⵏⵉⵜⵏⵉ ⴰⴷ ⵅⴰⵙ ⵡⵜⴻⵏ ⴰⵢⴻⵊⴷⵓⵔ ⴰⵎ ⵡⵜⵉⵏ ⴰⴳⴻⵊⴷⵓⵔ ⵅ ⵓⵢⴻⵏⵏⵉ ⵏ ⵎⵎⵉⵙ ⵓ ⴰⴷ ⵅⴰⵙ ⵛⴻⴹⵏⴻⵏ ⵙ ⵜⴻⵔⵣⵓⴳⵉ ⴰⵎ ⵡⴻⵏⵏⵉ ⵉⵜⵜⴻⵛⴹⵉⵏⴻⵏ ⵅ ⵍⵎⴻⵡⵜ ⵏ ⵎⵎⵉⵙ ⴰⵎⴻⵏⵣⵓ. ◘12:10 ⵃⵉⵥ. 39:29; ⵢⵓⵡ. 3:1; ⵢⵃ. 19:37; ⴰⵙⴰ. 1:7

11 ⴷⴻⴳ ⵡⴰⵙⵙ ⵏⵏⵉ ⴰⴷ ⵜⵉⵍⵉ ⵜⵖⵓⵢⵢⵉⵜ ⵏ ⵡⴻⵛⴹⴰⵏ ⵜⴻⵎⵖⴰⵔ ⴷⵉ ⵓⵔⵛⴰⵍⵉⵎ, ⴰⵎ ⵜⵖⵓⵢⵢⵉⵜ ⵏ ⵡⴻⵛⴹⴰⵏ ⵏ ⵀⴰⴷⴰⴷ-ⵔⵉⵎⵎⵓⵏ ⴷⵉ ⵜⴻⵖⵣⵓⵔⵜ ⵏ ⵎⴰⵊⵉⴷⴷⵓⵏ. ◘12:11 2 ⵉⵊ. 23:29; 2 ⵉⵎ. 35:22, 24

12 ⵜⴰⵎⵎⵓⵔⵜ ⴰⴷ ⵜⴻⵙⵖⵓⵢ ⵣⴻⴳ ⵡⴻⵛⴹⴰⵏ, ⴽⵓⵍ ⵍⴰⴵ ⵡⴻⵃⵃⴷⴻⵙ.

ⵍⴰⴵ ⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⵡⴻⵃⵃⴷⴻⵙ

ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ,

ⵍⴰⴵ ⵏ ⵜⴰⴷⴷⴰⵔⵜ ⵏ ⵏⴰⵜⴰⵏ ⵡⴻⵃⵃⴷⴻⵙ

ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ.

13 ⵍⴰⴵ ⵏ ⵜⴰⴷⴷⴰⵔⵜ ⵏ ⵍⴰⵡⵉ ⵡⴻⵃⵃⴷⴻⵙ

ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ,

ⵍⴰⴵ ⵏ ⵛⵉⵎⵄⵉ ⵡⴻⵃⵃⴷⴻⵙ

ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴻⵃⵃⴻⴷⵙⴻⵏⵜ.

14 ⵎⴰⵔⵔⴰ ⵍⴰⴵⴰⵜ ⵏⵏⴻⵖⵏⵉ, ⴽⵓⵍ ⵍⴰⴵ ⵡⴻⵃⵃⴷⴻⵙ ⵓⵍⴰ ⴷ ⵜⵉⵎⵖⴰⵔⵉⵏ ⵡⴻⵃⵃⴻⴷⵙⴻⵏⵜ.”