1 “ⴷⴻⴳ ⵡⴰⵙⵙ ⵏⵏⵉ ⴳⴳⵓⵔ ⴰⴷ ⵜⴻⴷⴷⵓⵇⵇⴻⵣ ⵉⵛⵜ ⵏ ⵜⴰⵍⴰ ⵉ ⵜⴰⴷⴷⴰⵔⵜ ⵏ ⴷⴰⵡⵓⴷ ⵓⵍⴰ ⵉ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ, ⴹⵉⴷⴷ ⵉ ⴷⴷⴻⵏⴱ ⵓ ⴹⵉⴷⴷ ⵉ ⵍⴻⵅⵎⴻⵊ.

2 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵏⴻⵛⵛ ⴰⴷ ⵜⴻⵃⵃⵉⵖ ⵉⵙⵎⴰⵡⴻⵏ ⵏ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵣⵉ ⵜⴻⵎⵎⵓⵔⵜ, ⵃⵉⵎⴰ ⵡⴰⵔ ⵅⴰⵙⴻⵏ ⵄⴻⵇⵇⵍⴻⵏ ⵄⴰⴷ. ⵓⵍⴰ ⴷ ⵉⵏⴰⴱⵉⵢⵢⴻⵏ ⴷ ⴱⵓⵃⴱⴻⵍ ⴰⵎⴻⵏⴳⵓⵙ ⴰⴷ ⵜⴻⵏ ⵙⵙⵓⴼⴼⵖⴻⵖ ⵣⵉ ⵜⴻⵎⵎⵓⵔⵜ. ◼13:2 ⴰⴷ ⵜⴻⵃⵃⵉⵖ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵇⴻⴹⵄⴻⵖ’.  ◘13:2 ⴰⵄⵡⴷ. 13:6-11; ⴰⵄⵡⴷ. 18:20. 3 ⴰⴷ ⵉⵎⵙⴰⵔ, ⵎⴰⵍⴰ ⵛⴰ ⵏ ⵉⵊⵊⴻⵏ ⴰⴷ ⵉⵏⴻⴱⴱⴰ, ⴱⴻⵍⵍⵉ ⴱⴰⴱⴰⵙ ⴷ ⵢⴻⵎⵎⴰⵙ ⵉⵏⵏⵉ ⵜ-ⵉ-ⴷⴷ ⵉⵊⵊⵉⵏ, ⴰⴷ ⴰⵙ ⵉⵏⵉⵏ: ‘ⵛⴻⴽ ⵡⴰⵔ ⵜⵜⵖⵉⵎⵉⴷ ⵜⴻⴷⴷⴰⵔⴻⴷ, ⵎⴰⵖⴰⵔ ⵛⴻⴽ ⵜⴻⵙⵙⵉⵡⵍⴻⴷ ⵉⵅⴰⵔⵔⵉⵇⴻⵏ ⴷⴻⴳ ⵉⵙⴻⵎ ⵏ ⵙⵉⴷⵉ!’ ⴱⴰⴱⴰⵙ ⴷ ⵢⴻⵎⵎⴰⵙ ⵉⵏⵏⵉ ⵜ-ⵉ-ⴷⴷ ⵉⵊⵊⵉⵏ, ⴰⴷ ⵜ ⵙⵙⵏⵓⵇⵇⴱⴻⵏ ⵅⵎⵉ ⵖⴰ ⵉⵏⴻⴱⴱⴰ. ◘13:3 ⴰⵄⵡⴷ. 13:6-11, 18:20

4 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⵉⵏⴰⴱⵉⵢⵢⴻⵏ ⴰⴷ ⵙⴻⴹⵃⴰⵏ, ⴽⵓⵍ ⵉⵊⵊ ⵅ ⵍⴻⵡⵃⵉⵢ ⵏⵏⴻⵙ ⵉ ⵉⵜⵡⴰⵍⴰ ⵅⵎⵉ ⵜⵓⵖⴰ ⵉⵏⴻⴱⴱⴰ. ⵏⵉⵜⵏⵉ ⵡⴰⵔ ⵜⵜⵉⵔⵉⴹⴻⵏ ⵛⴰ ⴰⴱⴰⵔⵜⴻⵙⵙⵓ ⵏ ⵛⵛⵄⴰⵔ ⵏ ⵉⵏⴰⴱⵉⵢⵢⴻⵏ ⵎⴰⵃⴻⵏⴷ ⴰⴷ ⵙⵙⵅⴰⵔⵔⵇⴻⵏ. 5 ⵏⴻⵜⵜⴰ ⴰⴷ ⵢⵉⵏⵉ ‘ⵏⴻⵛⵛ ⵡⴰⵔ ⴵⵉⵖ ⴷ ⴰⵏⴰⴱⵉ, ⵏⴻⵛⵛ ⴷ ⵉⵊⵊ ⵏ ⵡⴻⵔⵢⴰⵣ ⵡⴻⵏⵏⵉ ⵉⵜⵜⴼⴻⴵⵃⴻⵏ ⵉⵢⵢⴰⵔ, ⵎⵉⵏⵣⵉ ⵉⴽⵙⴻⴱ ⴰⵢⵉ ⵉⵊⵊⴻⵏ ⵣⵉ ⵜⴻⵎⵥⵉ ⵉⵏⵓ.’ 6 ⴰⴷ ⴰⵙ ⵉⵏⵉⵏ: ‘ⵎⵉⵏ ⵄⵏⴰⵏ ⵅⴻⵏⵏⵉ ⵉⵢⴻⵣⵣⵉⵎⴻⵏ-ⴰ ⴷⴻⴳ ⵉⴼⴰⵙⵙⴻⵏ ⵏⵏⴻⵛ?’, ⴰⴷ ⵢⵉⵏⵉ ⵏⴻⵜⵜⴰ: ‘ⴰⵎⵎⵓ ⵉ ⵡⵜⵉⵏ ⴰⵢⵉ ⴷⵉ ⵜⴰⴷⴷⴰⵔⵜ ⵏ ⵉⵎⵄⵉⵣⵣⴻⵏ ⵉⵏⵓ.’ ”

7 “ⵙⵙⵉⴼ, ⴽⴽⴰⵔ ⵅ ⵓⵎⴻⴽⵙⴰⵡ ⵉⵏⵓ ⵓ ⵅ ⵡⴻⵔⵢⴰⵣ ⵏⵏⵉ ⵉⴵⴰⵏ ⴷ ⴰⵎⵄⴰⵛⴰⵔ ⵉⵏⵓ!, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. ⵡⵡⴻⵜ ⴰⵎⴻⴽⵙⴰⵡ ⵉⵏⵓ ⵓⵛⴰ ⵅⴻⵏⵏⵉ ⴰⴷ ⵉⵎⵎⵙⴻⴱⴹⴰ ⵡⵓⴵⵉ, ⵎⴰⵛⴰ ⵏⴻⵛⵛ ⴰⴷ ⴰⵔⵔⴻⵖ ⴰⴼⵓⵙ ⵉⵏⵓ ⵄⴰⵡⴻⴷ ⵉ ⵓⵙⴻⵍⵇⵉ ⵜⵉⵡⵡⴰ ⵉⵎⵓⵇⵍⵉⵍⴻⵏ.” ◘13:7 ⵎⵜ. 26:31; ⵎⴽ. 14:27

8 “ⴰⴷ ⵉⵎⵙⴰⵔ ⴷⵉ ⵜⴰⵎⵎⵓⵔⵜ ⵎⴰⵔⵔⴰ, ⵉⵇⵇⴰⵔ ⵙⵉⴷⵉ, ⴰⵇⴰ ⵜⵏⴰⵢⴻⵏ ⵏ ⵉⵣⴻⵢⵏⴰⵜ ⴰⴷ ⵜⵜⵡⴰⵇⴻⴹⵄⴻⵏ ⵓ ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ, ⵎⴰⵛⴰ ⴰⵣⵢⴻⵏ ⵡⵉⵙⵙ ⵜⵍⴰⵜⴰ ⴰⴷ ⴷⴰⵢⴻⵙ ⵉⵇⵇⵉⵎ. 9 ⴰⵣⵢⴻⵏ ⵡⵉⵙⵙ ⵜⵍⴰⵜⴰ ⴰⴷ ⵜ ⵏⴹⴰⵔⴻⵖ ⴷⵉ ⵜⵎⴻⵙⵙⵉ, ⵓⵛⴰ ⵏⴻⵛⵛ ⴰⴷ ⵜⴻⵏ ⵙⵙᵉⵚⴼⵉⵖ ⴰⵎ ⵎⴰⵎⵎⴻⵛ ⵙⵙⴻⵚⴼⴰⵏ ⵏⵏⵓⵇⴰⵔⵜ ⵓ ⵏⴻⵛⵛ ⴰⴷ ⵜⴻⵏ ⵊⴰⵔⵔⴱⴻⵖ ⴰⵎ ⵎⴰⵎⵎⴻⵛ ⵜⵜⵊⴰⵔⵔⴰⴱⴻⵏ ⵓⵔⴻⵖ. ⵏⵉⵜⵏⵉ ⴰⴷ ⵍⴰⵖⴰⵏ ⵙ ⵢⵉⵙⴻⵎ ⵉⵏⵓ ⵓ ⵏⴻⵛⵛ ⴰⴷ ⴰⵙⴻⵏ ⵙⵍⴻⵖ. ⴰⴷ ⵉⵏⵉⵖ: ‘ⵍⴳⴻⵏⵙ ⵉⵏⵓ!’ ⵓ ⵏⵉⵜⵏⵉ ⴰⴷ ⵉⵏⵉⵏ: ‘ⵙⵉⴷⵉ ⴷ ⴰⵔⴻⴱⴱⵉ ⵉⵏⵓ!’ ” ◘13:9 ⵉⵥⵀⴷ. 50:15; 91:15; 144:15; ⵢⵃ. 20:28; 1 ⴱⵟ. 1:6