1 ⵙⴷⴻⵡⵍⴻⵎ-ⴷⴷ ⵉⵅⴻⴼ ⵏⵡⴻⵎ ⵖⴰⵔ ⵍⴻⵄⵇⴻⵍ,

ⴷⴻⵡⵍⴻⵎ-ⴷⴷ ⵖⴰⵔ ⵍⴻⵄⵇⴻⵍ,

ⴰ ⵍⴳⴻⵏⵙ ⴱⵍⴰ ⴰⵙⴻⴹⵃⵉ,

2 ⵇⴱⴻⵍ ⵉ ⵖⴰ ⵉⴼⴼⴻⵖ ⵍⵃⵓⴽⵎ

- ⴰⵙⵙ ⴰⵎ ⵓⵍⵓⵎ ⵉⵄⴻⴷⴷⵓ -

ⵇⴱⴻⵍ ⵉ ⵅⴰⵡⴻⵎ ⴷⴷ ⵖⴰ ⵢⴰⵙ

ⵍⵃⴰⴷⵓⵇ ⵏ ⵡⴻⵖⴹⴰⴱ ⵏ ⵙⵉⴷⵉ,

ⵇⴱⴻⵍ ⵉ ⵅⴰⵡⴻⵎ ⴷⴷ ⵖⴰ ⵢⴰⵙ

ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ.

3 ⴰⵔⵣⵓⵎ ⵅ ⵙⵉⴷⵉ,

ⵎⴰⵔⵔⴰ ⵉⵎⵡⴰⴹⵄⴻⵏ ⵏ ⵜⴻⵎⵎⵓⵔⵜ,

ⵉⵏⵏⵉ ⵉⵜⵜⴻⴳⴳⴻⵏ ⵍⵃⴻⵇⵇ ⵏⵏⴻⵙ!

ⴰⵔⵣⵓⵎ ⵜⴰⵙⴻⴳⴷⴰ, ⴰⵔⵣⵓⵎ ⴰⵡⴰⴹⴻⵄ,

ⴰⴷ ⵜⴰⵖ ⴰⴷ ⵜⴻⵏⵏⵓⴼⴼⴰⵔⴻⵎ ⴽⴻⵏⵏⵉⵡ

ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ. ◘2:3 ⵉⵥⵀⴷ. 27:5; 32:6, 7

4 ⵎⴰⵖⴰⵔ ⵖⴰⵣⵣⴰ ⴰⴷ ⵜᵉⵜⵜⵡⴰⵊⵊ,

ⴰⵛⵇⴰⵍⵓⵏ ⴰⴷ ⵜⴻⴷⵡⴻⵍ

ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ,

ⴰⵛⴷⵓⴷ ⴰⴷ ⵅⴰⵙ ⴰⵣⵣⵍⴻⵏ

ⵖⴰⵔ ⵡⴻⵣⵢⴻⵏ ⵏ ⵡⴰⵙⵙ,

ⵓⵛⴰ ⵄⴰⵇⵔⵓⵏ ⴰⴷ ⵜᵉⵜⵜⵡⴰⵇⵍⴻⵄ.

5 ⵓⵛⵜ ⵅ ⵉⵎⴻⵣⴷⴰⵖ ⵏ ⵜⵎⴰ ⵏ ⵍⴻⴱⵃⴰⵔ,

ⵍⴳⴻⵏⵙ ⵏ ⵉⴽⴰⵔⵉⵜⵉⵢⵢⴻⵏ.

ⴰⵡⴰⵍ ⵏ ⵙⵉⴷⵉ ⴰⴷ ⵅⴰⵡⴻⵎ ⵢⵉⵍⵉ,

ⴰ ⴽⴻⵏⵄⴰⵏ, ⵜⴰⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ!

ⵏⴻⵛⵛ ⴰⴷ ⴽⴻⵏⵏⵉⵡ ⵀⴻⵍⵍⴽⴻⵖ,

ⵡⴰⵔ ⵉⵜⵜⵉⵍⵉ ⵓⵎⴻⵣⴷⵓⵖ ⵄⴰⴷ.

6 ⵜⴰⵎⵎⵓⵔⵜ ⵏⵏⵉ ⵅ ⵜⵎⴰ ⵏ ⵍⴻⴱⵃⴰⵔ

ⴰⴷ ⵜⵉⵍⵉ ⴷ ⴷⴷⵎⴰⵏⵉ ⵏ ⵜⴰⵔⴻⵡⵙⴰ,

ⵓⵍⴰ ⴷ ⵡⴰⵏⵓⵜⴻⵏ ⵉ ⵉⵎⴻⴽⵙⴰⵡⴻⵏ

ⴷ ⵍⴽⵓⵔⵉⵜ ⵉ ⵡⵓⴵⵉ.

7 ⴰⴷ ⵜⵉⵍⵉ ⵜⴻⵎⵎⵓⵔⵜ ⵉ ⵎⵉⵏ ⵉⵇⵇⵉⵎⴻⵏ

ⵏ ⵜⴰⴷⴷⴰⵔⵜ ⵏ ⵢⴰⵀⵓⴷⴰ,

ⵃⵉⵎⴰ ⴰⴷ ⴷⴰⵢⴻⵙ ⴰⵔⴻⵡⵙⴻⵏ ⵜⵉⵃⵉⵎⵔⵉⵡⵉⵏ ⵏⵙⴻⵏ.

ⴷⵉ ⵜⵓⴷⵔⵉⵏ ⵏ ⴰⵛⵇⴰⵍⵓⵏ

ⴰⴷ ⴷⵉⵏ ⴰⵔⵙⴻⵏ ⵖⴰⵔ ⵜⵎⴻⴷⴷⵉⵜ,

ⵎⴰⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ,

ⴰⴷ ⵖⴰⵔⵙⴻⵏ ⵢⴰⵔⵣⴻⴼ,

ⵓ ⵏⴻⵜⵜⴰ ⵉⵙⵙⵏⴻⵇⵍⴻⴱ ⵜⴰⵎⴻⵃⴱⴰⵙⵜ ⵏⵙⴻⵏ.

8 ⵏⴻⵛⵛ ⵙⵍⵉⵖ ⵉ ⵓⵙⴻⵃⵇⴰⵔ ⵏ ⵎⵓ’ⴰⴱ

ⴷ ⵓⵛⴻⵇⵇⴻⴼ ⵏ ⴰⵢⵜ ⵏ ⵄⴰⵎⵎⵓⵏ,

ⵉ ⵣⵉ ⵙⵙⵃⴻⵇⴰⵔⴻⵏ ⵏⵉⵜⵏⵉ ⵍⴳⴻⵏⵙ ⵉⵏⵓ,

ⵓ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⴰⵟⵟⴰⵙ

ⴹⵉⴷⴷ ⵉ ⵜⴻⵎⵎⵓⵔⵜ ⵏⵙⴻⵏ.

9 ⵙ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ,

ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⴰⵔⴻⴱⴱⵉ ⵏ ⵉⵙⵔⴰⵉⵍ:

ⵎⵓ’ⴰⴱ ⴰⴷ ⵜⴻⴷⵡⴻⵍ ⴰⵎ ⵙⴰⴷⵓⵎ,

ⵓ ⴰⵢⵜ ⵏ ⵎⵓ’ⴰⴱ ⴰⵎ ⵄⴰⵎⵓⵔⵔⴰ,

ⵣⵉ ⵙⵙⵉⴱⴱⴻⵜ ⵏ ⵓⵖⴻⵎⵎⵓⵢ ⵏ ⵜⵣⴻⴳⴳⵯⴰⵔⵜ

ⵓ ⵣⵉ ⵙⵙⵉⴱⴱⴻⵜ ⵏ ⵡⴰⵏⵓⵜⴻⵏ ⵏ ⵜⵎⴻⴵⴰⵃⵜ,

ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ ⵉ ⵍⴻⴱⴷⴰ.

ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵉⵏⵓ

ⴰⴷ ⵜⴻⵏ ⵉⴽⴻⵛⵛⴻⴹ

ⵓ ⵉⵏⵏⵉ ⵉⵇⵇⵉⵎⴻⵏ ⵏ ⵍⴳⴻⵏⵙ ⵉⵏⵓ

ⴰⴷ ⵟⵟⴼⴻⵏ ⵜⴰⵙⵖⴰⵔⵜ ⵏⵙⴻⵏ ⴷ ⵍⵡⴰⵔⵜ.

10 ⴰⵢⴰ ⴰⴷ ⵜⴻⵏ ⵉⵍⵇⴻⴼ

ⵣⵉ ⵙⵙⵉⴱⴱⴻⵜ ⵏ ⵏⵏⴼⴰⵅⴻⵜ ⵏⵙⴻⵏ,

ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⵙⵙⴻⵃⵇⴰⵔⴻⵏ

ⵓ ⴰⵔⵣⵎⴻⵏ ⴰⵇⴻⵎⵎⵓⵎ ⵏⵙⴻⵏ

ⵅ ⵍⴳⴻⵏⵙ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.

11 ⵉⵙⵙⴰⴳⴳⵯⴰⴷ ⴰⴷ ⵖⴰⵔⵙⴻⵏ ⵉⴼⴼⴻⵖ ⵙⵉⴷⵉ,

ⵎⴰⵖⴰⵔ ⵏⴻⵜⵜⴰ ⴰⴷ ⵉⵇⴹⴰ

ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵣⵉ ⵜⴻⵎⵎⵓⵔⵜ,

ⵓ ⵏⵉⵜⵏⵉ ⴰⴷ ⴰⵙ ⴱⴻⵏⴷⵇⴻⵏ,

ⴽⵓⵍ ⵉⵊⵊ ⵣⴻⴳ ⵡⴻⵎⵛⴰⵏ ⵏⵏⴻⵙ,

ⵎⴰⵔⵔⴰ ⵜⵉⴳⵣⵉⵔⵉⵏ ⵏ ⵍⴻⴳⵏⵓⵙ.

12 ⴽⴻⵏⵏⵉⵡ ⵄⴰⵡⴻⴷ, ⴰ ⴰⵢⵜ ⵏ ⴽⵓⵛ,

ⵜⵜⵡⴰⵙⵙⵏⵓⵇⵇⴱⴻⵏ ⵏⵉⵜⵏⵉ ⵣⵉ ⵙⵙⵉⴼ ⵉⵏⵓ.

13 ⵏⴻⵜⵜⴰ ⴰⴷ ⵉⵙⵙⵡⵉⵥⵥⴻⴹ

ⵙ ⵓⴼⵓⵙ ⵏⵏⴻⵙ ⵖⴰⵔ ⵛⵛⴰⵎⴰⵍ,

ⵏⴻⵜⵜⴰ ⴰⴷ ⵢⴰⵔⴻⴷⴷⴻⴵ ⴰⵛⵛⵓⵔ,

ⵓ ⴰⴷ ⵢⴰⵔⵔ ⵏⵉⵏⵡⴰ

ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ,

ⵜⵓⵥⴻⵖ ⴰⵎ ⵍⴻⵅⵍⴰ.

14 ⴷⵉ ⵍⵡⴻⵙⵟ ⵏⵏⴻⵙ ⴰⴷ ⴳⴻⵢⵢⵔⴻⵏⵜ ⵜⵃⵉⵎⵔⵉⵡⵉⵏ,

ⵎⴰⵔⵔⴰ ⵍⵎⴰⵍ ⵏⵏⴻⵙ, ⴰⵇⴰ ⵜⵜⴻⴳⴳⴻⵏ

ⴰⵎ ⵢⵉⵊⵊ ⵓⴱⴰⵔⵔⵓ ⵏ ⵏ ⵍⴳⴻⵏⵙ.

ⵓⵍⴰ ⴷ ⴱⵓ-ⵉⵄⵓⵇⵇⴰⵏ,

ⵡⴰⵀ ⵓⵍⴰ ⴷ ⵜⵡⵓⵛⵜ ⵏ ⴵⵉⵍⴻⵜ

ⴰⴷ ⵙⵙⴻⵏⵙⴻⵏ ⵅ ⵉⵣⴻⴵⵉⴼⴻⵏ ⵏ ⵉⴱⵉⵍⴰⵔⴻⵏ ⵏⵏⴻⵙ.

ⵜⵎⵉⵊⵊⴰ ⵏⵙⴻⵏ ⴰⴷ ⵜⵖⴻⵏⵏⴻⵊ ⵣⵉ ⵍⴽⴰⵣⵉ,

ⴰⵔⴻⴷⴷⴻⴵ ⴰⴷ ⵢⵉⵍⵉ ⵅ ⵜⵏⴻⴱⴷⴰⵜ ⵏⵏⴻⵙ,

ⵎⴰⵖⴰⵔ ⵜⴰⴼⵔⴻⵡⵜ ⵏ ⵜⴻⵏⴳⴻⵍⵜ ⵜᵉⵜⵜⵡⴰⵄⴰⵔⵔⴰ.

15 ⴷ ⵜⴰ ⴷ ⵜⴰⵏⴷⵉⵏⵜ ⵉⵙⵍⵉⵡⵍⵉⵡⴻⵏ,

ⵜⴻⵏⵏⵉ ⵉⵇⵇⵉⵎⴻⵏ ⴷⵉ ⵍⴰⵎⴰⵏ,

ⵜⴻⵏⵏⵉ ⵉⵏⵏⴰⵏ ⴷⴻⴳ ⵡⵓⵍ ⵏⵏⴻⵙ:

‘ⵏⴻⵛⵛ ⴷ ⵜⴻⵏⵏⵉ, ⵡⴰⵔ ⵜⴻⴵⵉ ⴷ ⵜⴻⵏⵏⴻⵖⵏⵉ!’

ⵎⴰⵎⵎⴻⵛ ⵜⴻⴷⵡⴻⵍ

ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵏⴻⵅⵍⵉⵄ,

ⵉⵛⵜ ⵏ ⵡⴻⵎⵛⴰⵏ ⵏ ⴰⵔⵔⴰⵃⴻⵜ ⵉ ⵍⵎⴰⵍ ⵏ ⵍⴻⵅⵍⴰ!

ⵎⴰⵔⵔⴰ ⵉⵏⵏⵉ ⵅⴰⵙ ⵖⴰ ⵉⴽⴽⴻⵏ,

ⴰⴷ ⵅⴰⵙⴻⵏ ⵉⵚⴻⴼⴼⴰⵔ ⵓ ⵙ ⵓⵙⴻⵃⵇⴰⵔ

ⴰⴷ ⵉⵙⵙⴻⵏⵀⴻⵣⵣ ⴰⴼⵓⵙ ⵏⵏⴻⵙ.