ⵚⴰⴼⴰⵏⵢⴰ
1
ⴰⵙⵙ ⴰⵎⴻⵇⵇⵔⴰⵏ ⵏ ⵙⵉⴷⵉ
1 ⴰⵡⴰⵍ ⵏ ⵙⵉⴷⵉ ⵉ ⴷⴷ-ⵢⵓⵙⵉⵏ ⵉ ⵚⴰⴼⴰⵏⵢⴰ, ⵎⵎⵉⵙ ⵏ ⴽⵓⵛⵉ, ⵎⵎⵉⵙ ⵏ ⵊⴰⴷⴰⵍⵢⴰ, ⵎⵎⵉⵙ ⵏ ⴰⵎⴰⵔⵢⴰ, ⵎⵎⵉⵙ ⵏ ⵃⵉⵣⵇⵉⵢⴰ, ⴷⴻⴳ ⵡⵓⵙⵙⴰⵏ ⵏ ⵢⵓⵛⵉⵢⴰ, ⵎⵎⵉⵙ ⵏ ⴰⵎⵓⵏ, ⴰⵊⴻⴵⵉⴷ ⵏ ⵢⴰⵀⵓⴷⴰ. ◼1:1 ⵚⴰⴼⴰⵏⵢⴰ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵡⴻⵏⵏⵉ ⵜ ⵉⵙⵙⵏⵓⴼⴼⴰⵔⴻⵏ ⵙⵉⴷⵉ’.
2 ⵏⴻⵛⵛ ⴰⴷ ⴽⴽⵙⴻⵖ ⵇⴰⵄ ⵎⴰⵔⵔⴰ ⵎⵉⵏ ⵉⴵⴰⵏ
ⵣⴻⴳ ⵡⵓⴷⴻⵎ ⵏ ⵜⴻⵎⵎⵓⵔⵜ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.
3 ⴰⴷ ⴽⴽⵙⴻⵖ ⴱⵏⴰⴷⴻⵎ ⴷ ⵍⵎⴰⵍ,
ⴰⴷ ⴽⴽⵙⴻⵖ ⵉⵊⴹⴰⴹ ⵏ ⵓⵊⴻⵏⵏⴰ
ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ
ⴷ ⵜⵄⴻⵏⴽⵔⵉⴼⵉⵏ ⴰⴽ-ⴷ ⵉⵄⴻⴼⴼⴰⵏⴻⵏ,
ⵡⴰⵀ ⵏⴻⵛⵛ ⴰⴷ ⵇⴹⵉⵖ ⴱⵏⴰⴷⴻⵎ
ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ. ◘1:3 ⴰⵎⵥ. 6:7
4 ⵏⴻⵛⵛ ⴰⴷ ⵙⵙⵡⵉⵥⵥⴹⴻⵖ ⵙ ⵓⴼⵓⵙ ⵉⵏⵓ
ⴹⵉⴷⴷ ⵉ ⵢⴰⵀⵓⴷⴰ
ⵓ ⴹⵉⴷⴷ ⵉ ⵎⴰⵔⵔⴰ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ.
ⵏⴻⵛⵛ ⴰⴷ ⵜⴻⵃⵃⵉⵖ ⵎⵉⵏ ⵉⵇⵇⵉⵎⴻⵏ ⵣⵉ ⴱⴰⵄⵍ
ⵣⴻⴳ ⵡⴻⵎⵛⴰⵏ-ⴰ
ⴰⴽ-ⴷ ⵢⵉⵙⴻⵎ ⵏ ⵉⴽⴻⵀⵀⴰⵏⴻⵏ ⵏ ⵍ’ⴰⵚⵏⴰⵎ, ◼1:4 ⴰⴷ ⵜⴻⵃⵃⵉⵖ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵇⴻⴹⵄⴻⵖ’.
5 ⴷ ⵢⵉⵏⵏⵉ ⵉⵙⴻⵊⴷⴻⵏ ⵅ ⵜⵣⴻⵖⵡⵉⵏ
ⵣⵣⴰⵜ ⵉ ⵍⵄⴻⵙⴽⴰⵔ ⵏ ⵉⵊⴻⵏⵡⴰⵏ,
ⵓ ⵉⵏⵏⵉ, ⴰⵎ ⴱⴻⵏⴷⵇⴻⵏ, ⵊⵊⵓⴵⴻⵏ ⵖⴰⵔ ⵙⵉⴷⵉ,
ⵓ ⴰⵇⴰ ⵊⵊⵓⴵⴻⵏ ⵉ ⵎⴰⵍⴽⴰⵎ,
6 ⵓⵍⴰ ⴷ ⵢⵉⵏⵏⵉ ⴷⴷ-ⵉⵜⵜⵄⴰⵇⵇⴰⴱⴻⵏ
ⵣⵉ ⴹⴻⴼⴼⴰⵔ ⵏ ⵙⵉⴷⵉ,
ⵓ ⵢⵉⵏⵏⵉ ⵡⴰⵔ ⴰⵔⴻⵣⵣⵓⵏ ⵅ ⵙⵉⴷⵉ
ⵓ ⵡⴰⵔ ⵅⴰⵙ ⵜⵜⵙⵙⴻⵇⵙⵉⵏ. ◘1:6 ⵉⵛⴰ. 1:4; 59:13; ⵉⵔⵎ. 15:6
7 ⵙⴻⵖⴷ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵉⵏⵓ, ⵙⵉⴷⵉ,
ⵎⴰⵖⴰⵔ ⴰⵙⵙ ⵏ ⵙⵉⴷⵉ ⵢⵓⴷⴻⵙ.
ⵙⵉⴷⵉ ⴰⵇⴰ ⵉⵙⵙⴻⵡⵊⴻⴷ ⵉⵛⵜ ⵏ ⵜⵖⴰⵔⵚⵜ,
ⵏⴻⵜⵜⴰ ⵉⵙⵙⵇⴻⴷⴷⴻⵙ ⵉⵎⴻⵄⵔⴰⴹⴻⵏ ⵏⵏⴻⵙ.
8 ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵏ ⵜⵖⴰⵔⵚⵜ ⵏ ⵙⵉⴷⵉ,
ⴰⵇⴰ ⵏⴻⵛⵛ ⴰⴷ ⵄⴰⵇⴱⴻⵖ ⵍⵃⵓⴽⴽⴰⵎ
ⴷ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ
ⴷ ⵎⴰⵔⵔⴰ ⵉⵏⵏⵉ ⵢⴰⵔⵔⴹⴻⵏ ⴰⵔⵔⵓⴹ ⴰⵖⵔⵉⴱ.
9 ⴷⴻⴳ ⵡⴰⵙⵙ ⵏⵏⵉ ⴰⴷ ⵄⴰⵇⴱⴻⵖ
ⵎⴰⵔⵔⴰ ⵉⵏⵏⵉ ⵉⵏⴻⴳⴳⵣⴻⵏ ⵜⴰⵏⴻⴱⴷⴰⵜ,
ⵉⵏⵏⵉ ⵉⵜⵜⵄⴻⵎⵎⴰⵔⴻⵏ ⵜⴰⴷⴷⴰⵔⵜ ⵏ ⵙⵉⴷⵉⵜⵙⴻⵏ
ⵙ ⵍⵄⵓⵏⴼ ⴷ ⵍⵖⴻⵛⵛ.
10 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ,
ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵍⵃⴻⵙⵙ ⵏ ⵉⵖⵓⵢⵢⴰⵏ
ⵣⵉ ⵜⴻⵡⵡⴰⵔⵜ ⵏ ⵉⵙⴻⵍⵎⴰⵏ,
ⵓⵍⴰ ⴷ ⵍⵃⴻⵙⵙ ⵏ ⵢⵉⵏⵏⵉ ⵉⵜⵜⵔⵓⵏ
ⵣⵉ ⵜⴻⵏⴷⵉⵏⵜ ⵏ ⵊⴷⵉⴷ
ⴷ ⵉⵛⵜ ⵏ ⵜⴰⵔⴻⵥⵥⵉⵜ ⵜⴻⵎⵖⴰⵔ ⵣⵉ ⵜⴻⵡⵔⵉⵔⵉⵏ.
11 ⵔⵓⵎ, ⵉⵎⴻⵣⴷⴰⵖ ⵏ ⵊⵊⵉⵀⴻⵜ ⵏ ⵓⵎⴻⵀⵔⴰⵣ,
ⵎⵉⵏⵣⵉ ⵎⴰⵔⵔⴰ ⵉⵙⴻⴱⴱⴰⴱⴱⴻⵏ ⵜⵜⵡⴰⵙⴻⵖⴹⴻⵏ,
ⵎⴰⵔⵔⴰ ⵉⵏⵏⵉ ⵉⵡⴻⵣⵣⵏⴻⵏ ⵜⵎⴻⵏⵢⴰⵜ ⵜⵜⵡⴰⵇⴻⴹⵄⴻⵏ.
12 ⴷⵉ ⵍⵡⴻⵇⵜ ⵏⵏⵉ ⴰⴷ ⴱⴻⵇⵇⵛⴻⵖ
ⴷⵉ ⵓⵔⵛⴰⵍⵉⵎ ⵙ ⵍⴻⵇⵏⴰⴷⴻⵍ,
ⵓ ⵏⴻⵛⵛ ⴰⴷ ⵄⴰⵇⴱⴻⵖ ⵉⵔⵢⴰⵣⴻⵏ
ⵉⵏⵏⵉ ⵉⵜⵜⵡⴰⴳⴷⴰⵔⴻⵏ ⵣⵉ ⵍⴰⵜⴰⵔ
ⵏⵏⵉ ⵉⵇⵇⵉⵎⴻⵏ ⵏ ⴱⵉⵏⵓ,
ⵉⵏⵏⵉ ⵉⵇⵇⴰⵔⴻⵏ ⴷⴻⴳ ⵡⵓⵍ ⵏⵙⴻⵏ:
‘ⵙⵉⴷⵉ ⵡⴰⵔ ⵉⵜⵜⴻⴳⴳ ⵍⵅⴰⵔ
ⵓ ⵡⴰⵔ ⵉⵜⵜⴻⴳⴳ ⵍⵖⴰⵔ!’
13 ⴰⴳⵍⴰ ⵏⵙⴻⵏ ⴰⴷ ⵢⵉⵍⵉ ⵉ ⵜⴽⴻⵛⵛⴰⴹⵜ
ⴷ ⵜⵓⴷⵔⵉⵏ ⵏⵙⴻⵏ ⴰⴷ ⴷⴻⵡⵍⴻⵏⵜ ⴷ ⵍⵅⴰⵔⴱⴻⵜ.
ⵏⵉⵜⵏⵉ ⴰⴷ ⴱⵏⴰⵏ ⵜⵓⴷⵔⵉⵏ ⵉ ⵢⵉⵅⴻⴼ ⵏⵙⴻⵏ,
ⵎⴰⵛⴰ ⵡⴰⵔ ⴷⴰⵢⵙⴻⵏⵜ ⵣⴻⴷⴷⵖⴻⵏ ⵛⴰ,
ⵏⵉⵜⵏⵉ ⴰⴷ ⵥⵥⵓⵏ ⵜⵉⵣⴰⵢⴰⵔⵉⵏ,
ⵎⴰⵛⴰ ⵡⴰⵔ ⵙⴻⵙⵙⴻⵏ ⵣⵉ ⴱⵉⵏⵓ ⵏⵏⴻⵙ.
14 ⴰⵙⵙ ⴰⵎⴻⵇⵇⵔⴰⵏ ⵏ ⵙⵉⴷⵉ ⵢⵓⴷⴻⵙ,
ⴰⵇⴰ-ⵜ ⵢⵓⴷⴻⵙ, ⴷⴻⵖⵢⴰ ⵢⵓⵙⴰ-ⴷⴷ.
ⵍⵃⴻⵙⵙ ⵏ ⵡⴰⵙⵙ ⵏ ⵙⵉⴷⵉ!
ⴰⴷ ⵉⵙⵖⵓⵢ ⴱⵓ-ⵜⴻⵖⵔⵓⴹⵜ ⴷⵉⵏ
ⵙ ⵢⵉⵛⵜ ⵏ ⵜⵖⵓⵢⵢⵉⵜ ⵜⴰⵔⵣⴻⴳ. ◘1:14 ⵢⵓⵡ. 2:10, 31; 3:15; ⵉⵛⴰ. 13:6-13; 24:23; ⴰⵎ. 8:9; ⵎⵜ. 24:29; ⵍⴻⵅ. 2:20; ⴰⵙⴰ. 6:12-13
15 ⴰⵙⵙ ⵏⵏⵉ ⴰⴷ ⵢⵉⵍⵉ
ⴷ ⴰⵙⵙ ⵏ ⵓⴷⵓⵇⵇⴻⵣ ⵏ ⵓⴼⵓⴳⴻⵎ,
ⴷ ⴰⵙⵙ ⵏ ⵍⴻⵃⵚⴰⵔⴻⵜ ⴷ ⴹⴹⵉⵇⴰ,
ⴷ ⴰⵙⵙ ⵏ ⵓⵅⴰⵔⵔⴻⴱ ⴷ ⵡⴰⵔⴻⴷⴷⴻⴵ,
ⴷ ⴰⵙⵙ ⵏ ⵟⵟⵍⴰⵎ ⴷ ⵜⴰⴵⴻⵙⵜ,
ⴷ ⴰⵙⵙ ⵏ ⵉⵙⴻⵢⵏⵓⵜⴻⵏ ⴷ ⵓⵙⴻⵢⵏⵓ ⵉⴱⴱⵓⵎⴱⴻⵙ,
16 ⵉⵊⵊ ⵏ ⵡⴰⵙⵙ ⵏ ⵓⵙⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ
ⵓ ⵏ ⵉⵖⵓⵢⵢⴰⵏ ⵏ ⵓⵎⴻⵏⵖⵉ
ⴹⵉⴷⴷ ⵉ ⵜⵏⴻⴷⴷⴰⵎ ⵉⴼⴰⵔⵢⴻⵏ
ⵓ ⴹⵉⴷⴷ ⵉ ⵚⵚⵓⵎⵄⴰⵜ ⵏⵏⵉ ⵉⴵⴰⵏ
ⵖⴰⵔ ⵜⵖⴻⵎⵎⵓⵔⴰ.
17 ⵏⴻⵛⵛ ⴰⴷ ⵃⵚⴰⵔⴻⵖ ⵉⵡⴷⴰⵏ
ⵓ ⵏⵉⵜⵏⵉ ⴰⴷ ⵓⵢⵓⵔⴻⵏ ⴰⵎ ⵢⵉⴷⴰⵔⵖⴰⵍⴻⵏ,
ⵎⵉⵏⵣⵉ ⵏⵉⵜⵏⵉ ⴳⴳⵉⵏ ⴷⴷⴻⵏⴱ ⵅ ⵙⵉⴷⵉ.
ⵉⴷⴰⵎⵎⴻⵏ ⵏⵙⴻⵏ ⴰⴷ ⵜⵜⵡⴰⵣⴻⴵⵄⴻⵏ
ⴰⵎⴻⵛⵏⴰⵡ ⵜⵄⴻⵊⵊⴰⵊⵜ,
ⴷ ⵡⴻⵢⵙⵓⵎ ⵏⵙⴻⵏ ⴰⵎⴻⵛⵏⴰⵡ ⵉⵅⵅⴰⵏ.
18 ⵓⵍⴰ ⴷ ⵏⵏⵓⵇⴰⵔⵜ ⵏⵙⴻⵏ ⴷ ⵡⵓⵔⴻⵖ ⵏⵙⴻⵏ
ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⴻⵏ ⵙⵙⵏⴻⵊⵎⴻⵏ
ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵣ ⵏ ⵓⴼⵓⴳⴻⵎ ⵏ ⵙⵉⴷⵉ.
ⵜⵉⵎⴻⵙⵙⵉ ⵏ ⵜⵓⵙⵎⵉ ⵏⵏⴻⵙ ⵉⵇⴻⴷⴷⵙⴻⵏ
ⴰⴷ ⵜⴻⵛⵛ ⵎⴰⵔⵔⴰ ⵜⴰⵎⵎⵓⵔⵜ,
ⵎⴰⵖⴰⵔ ⴷⴻⵖⵢⴰ ⵏⴻⵜⵜⴰ ⴰⴷ ⵉⵇⴹⴰ
ⵎⴰⵔⵔⴰ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ. ◘1:18 ⴰⵡⵍⵏ. 11:4; ⵃⵉⵥ. 7:19; ⵚⴰⴼ.1:14-16
◼1:1 1:1 ⵚⴰⴼⴰⵏⵢⴰ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵡⴻⵏⵏⵉ ⵜ ⵉⵙⵙⵏⵓⴼⴼⴰⵔⴻⵏ ⵙⵉⴷⵉ’.
◼1:4 1:4 ⴰⴷ ⵜⴻⵃⵃⵉⵖ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵇⴻⴹⵄⴻⵖ’.
◘1:6 1:6 ⵉⵛⴰ. 1:4; 59:13; ⵉⵔⵎ. 15:6
◘1:14 1:14 ⵢⵓⵡ. 2:10, 31; 3:15; ⵉⵛⴰ. 13:6-13; 24:23; ⴰⵎ. 8:9; ⵎⵜ. 24:29; ⵍⴻⵅ. 2:20; ⴰⵙⴰ. 6:12-13
◘1:18 1:18 ⴰⵡⵍⵏ. 11:4; ⵃⵉⵥ. 7:19; ⵚⴰⴼ.1:14-16