1 O Pavol, o Silvan the o Timoteus pisinas le manušenge andro foros Tesalonika, la khangerake, so hiňi andro Del amaro Dad the andro Raj Ježiš Kristus: O lačhipen (milosť) the o smirom tumenge!

2 Amen paľikeras le Devleske vaš tumenge savorenge furt, sar tumen leperas andre amare modľitbi.

3 Na preačhas te leperel anglo Del amaro Dad tumari buči, so keren le pačabnastar, tumari služba andro kamiben the oda, savo zoralo hin tumaro užaripen (naďej) andre amaro Raj Ježiš Kristus.

4 Amen džanas, phralale, hoj o Del tumen kamel a kidňa peske tumen avri.

5 Bo amen anenas tumenge o evaňjelium na ča le lavenca, ale la zoraha the le Sentne Duchoha the andre bari istota. Se džanen, save samas maškar tumende prekal tumaro lačhipen.

6 A tumen kerďan avke, sar dikhľan amen te kerel, a the avke, sar o Raj kerelas. Priiľan o lav andro but cerpišagi radišagoha le Sentne Duchostar.

7 Vašoda san priklados savorenge, save pačan andre Macedonija the andre Achaja.

8 Bo tumendar geľa o lav le Rajeskero na ča andre Macedonija the andre Achaja – pre dojekh than pes rozľigenďa tumaro pačaben andro Del. Vašoda amenge imar na kampel buter ňič te vakerel,

9 bo on korkore vakeren pal oda, sar amen priiľan a sar tumen visarďan le modlendar ko Del, hoj te služinen le džide the čače Devleske.

10 Vašoda akana užaren leskere Čhas le Ježiš, saves o Del uštaďa andral o meriben a savo amen zachraňinel andral odi choľi, so avela.