Le Pavloskero Dujto Ľil Le
TESALONIČANENGE
1
O pozdravos
O Pavol, o Silvan the o Timoteus pisinen la khangerake andro foros Tesalonika, la khangerake andro Del amaro Dad the andre amaro Raj Ježiš Kristus:
O lačhipen (milosť) tumenge the o smirom le Devlestar, amare Dadestar the amare Rajestar, le Ježišostar Kristostar.
Pal o sudos
Phralale, amen mušinas vaš tumenge te paľikerel furt le Devleske a hin vaš soske, bo igen barol tumaro pačaben the tumaro kamiben jekh ke avreste.
Vašoda the amen korkore pes lašaras tumenca andro khangera le Devleskere, bo tumen ľikeren avri a pačan andre savore tumare pharipena the sar o manuša pre tumende džan.
Kada savoro sikavel pre le Devleskero čačipnaskero sudos, a vašoda avena hodne te džal andro kraľišagos le Devleskero, vaš savo the cerpinen.
Bo o Del hino čačipnaskero: Dela pale o pharipen olenge, save tumenge keren o pharipen,
ale tumenge, save san andro pharipen, dela smirom le pharipnastar avke, sar the amenge, akor sar pes andral o ňebos sikavela o Raj o Ježiš peskere zorale aňjelenca.
Akor marela andro jagale plameňa olen, save na prindžaren le Devles, the olen, save na šunen o evaňjelium amare Rajeskero le Ježišoskero.
Lengero trestos hin, hoj ena zňičimen pro furt dur le Rajeskere mujestar the leskera slavakera zoratar,
10 andre oda Džives, sar o Ježiš avela, hoj les te el e slava savore leskere sentne manušendar the e bari pačiv savorendar, save pačanďile. Tumen avena maškar lende, bo pačanďiľan amare sveďectvoske.
11 Vašoda pes furt vaš tumenge modľinas, hoj tumendar amaro Del te kerel hodnen te dživel oda dživipen, andre savo tumen vičinďa, a hoj peskera zoraha te dokerel savoro lačho, so tumen kamen, a the dojekh pačabnaskeri buči.
12 Modľinas oda, hoj te el barardo o nav amare Rajeskero le Ježišoskero Kristoskero andre tumende a tumen andre leste prekal o lačhipen (milosť), so del o Del the amaro Raj, o Ježiš Kristus.