O Ezdraš
1
O Izraeliti aven pale andro Jeruzalem
Oda sas ešebno (peršo) berš, so kraľinelas o kraľis Kiros andral e Perzija: Vašoda, hoj pes te ačhel oda, so phenďa o RAJ prekal o prorokos Jeremiaš, o RAJ thoďa pro jilo le kraľiske Kiroske, hoj te del te džanel andro ľil andre calo peskero kraľišagos:
“Kavke phenel o Perziko kraľis Kiros:
‘O RAJ, o Del, savo hino upral o ňebos, mange diňa savore kraľišagi pre phuv a kidňa peske man avri, hoj leske te ačhavav Chramos andro Jeruzalem andre Judsko. Akana savore, save san leskere manuša – mi el lenca lengero Del – šaj džan pale andro Jeruzalem andre Judsko, hoj te ačhaven o Chramos le RAJESKERO, savo hin o Del le Izraeloskero. Oda hin o Del, saves pes lašarel andro Jeruzalem. Dojekh, ko ade bešel, lenge mi pomožinel, hoj pes te dochudel pale khere. Mi den len o rup, somnakaj, sersamos, dobitkos the o dari, so korkore pestar kamen te del prekal o Chramos le Devleskero andro Jeruzalem.’ ”
Avke o fajtakere vodci le kmeňendar Juda the Benjamin, o rašaja the o Leviti a dojekh, ke kaste o Del prevakerďa, hoj te džal te ačhavel le RAJESKERO Chramos, pes pririchtinenas te džal andro Jeruzalem. Savore manuša, save bešenas paš lende, len dine rupune čare, somnakaj, sersamos, dobitkos, dragane veci the o dari prekal o Chramos.
O kraľis Kiros lenge diňa pale o veci andral le RAJESKERO Chramos, so iľa o Nebukadnecar andral o Jeruzalem a thoďa andre peskero chramos. O Perziko kraľis Kiros prikazinďa, hoj len te anel o Mitredat, leskero pokladňikos, hoj len te pregenel a te del le Judske guverneriske Šešbaccaroske.
Oda sas tranda (30) somnakune čare, ezeros (1 000) rupune čare, bišueňa (29) lopatki pro kaďidlos, 10 tranda (30) somnakune kuča, štar šel the deš (410) rupune kuča a ezeros (1 000) aver čare.
11 Savore čare le somnakastar the rupostar sas 5 400. Kada savoro iľa o Šešbaccar a ľidžalas andral o Babilon le manušenca, sar džanas pale andro Jeruzalem.