O lava le RAJESKRE
38
Ešebno vakeriben le RAJESKRO
1 Akor odphenďa o RAJ le Joboske andral e burka:
2 „Oda, ko hin kada, ko kaľarel miro planos
le nagoďaver lavenca?
3 Ačh akana sar murš,
me tutar phučava a tu mange odpheneha.
4 Kaj salas, sar thovavas o zakladi la phuvakre?
Phen mange, te sal ajso goďaver!
5 Ko rozhodňinďa, hoj keci merinela? Se tu džanes!
Ko nacirdňa e šparga, hoj la te merinel?
6 Andre soste hine zathode lakre zakladi?
Ko zathoďa lakro hlavno bar akor,
7 sar o tosarutne čercheňa jekhetane giľavenas
a savore aňjela*E hebrejiko čhib: o čhave le Devleskre radišagostar viskinenas?
8 Ko phandľa andre o moros le branenca,
sar demaďa avri andral o per la phuvakro?
9 Me urďom o moros le chmarenca
a pačarďom les le kaľipnaha,
10 me ačhaďom leskri hraňica
a kerďom leske o zavori the o brani.
11 Phenďom: ‚Šaj aves dži kade, ale dureder našťi!
Kade zaačhena tire barikane vlni.‘
12 Prikazinďal varekana andre tiro dživipen le tosaraske
a phenďal, kana te vidňisaľol?
13 Phenďal leske, hoj te zalel caľi phuv le švetloha,
hoj o bitanga lestar te denašen het?
14 Sar vidňisaľol, e phuv hiňi urďi andro šukar farebna gada;
savoro hin jasno sar o otlačkos pal e pečatka andre čik.
15 O švetlos le dživeseskro švicinel igen zorales le bitangenge;
lengre vasta preačhen te kerel o nalačhipen.
16 Či salas dži paš o prameňa le moroskre?
Vaj phirehas pal e phuv andro oceanos?
17 Sikaďa tuke vareko o brani le meribnaskre?
Abo dikhľal o brani le bare kaľipnaskre?
18 Či šaj achaľos, savo baro hino o svetos?
Odphen mange, te kada savoro džanes!
19 Khatar pes džal ode, kaj bešel o švetlos
a kaj hin o kher le kaľipnaske?
20 Džanľalas len te doanel pre lengre thana?
Prindžares o droma andre lengre khera?
21 Se tu oda džanes! Se tu imar akor uľiľal!
Imar ajci berša džives!
22 Či salas andro skladi le jiveskre?
Abo dikhľal o skladi, kaj hin o ľegoskre krupi,
23 save garuvav pre oda časos, sar ela o pharipen,
pre oda džives, sar ela o mariben?
24 Kaj hin oda than, khatar aven o bleski?
Khatar avel te phurdel e vichodno balvaj pre phuv?
25 Ko stvorinďa o dromora andral o ňebos le bare brišindeske?
Ko kerďa o drom le bleskenge the le perumenge,
26 hoj te del o brišind pre phuv, kaj ňiko na bešel,
the pre pušťa, kaj ňiko na dživel?
27 Ko kerel, hoj e smedno the e šuki phuv te pijel paňi
a hoj te barol e nevi čar?
28 Či hin le brišindes dad?
Ko anel pro svetos e rosa?
29 Kaske avľa andral o per avri o ľegos?
Kaske uľiľa o ňeboskro mrazos?
30 Kerel, hoj o paňi zoraľol sar bar
a o moros zafadžinel upral.
31 Šaj phandes o lanci le Plejadengre†Avke pes vičinel jekh skupina čercheňa.
abo šaj pomukes o lani le Orionoskre?
32 Šaj ľidžas le čercheňen‡E hebrejiko čhib: Mazzarot – na džanel pes, so oda presňe hin avri akor, sar hin lengro časos?
Abo šaj sikaves o drom, khatar te džan o Baro the o Cikno verdan§E slovačiko čhib: Veľký a Malý voz?
33 Prindžares o zakoni le ňeboskre?
Džanes sar te kerel, hoj te vladňinen the pre phuv?
34 Šaj vičines pre chmara,
hoj pre tu te del baro brišind?
35 Šaj bičhaves le blesken, hoj te džan?
Či phenena tuke: ‚Kade sam!‘?
36 Khatar džanel te phenel o čiriklo ibis,
hoj avena o zaplavi?
Khatar džanel te phenel o kohutos,
hoj dela o brišind?
37 Ko šaj zrachinel o chmari peskra goďaha?
Ko šaj čhivel avri o paňa andral o ňeboskre džbani,
38 avke, hoj o prachos zoraľol
a o hrudi la phuvakre priľepisaľon ke peste?
39 Či tu strades e korisť la ľevicake?
Či tu des te chal le bokhale terne ľeven,
40 sar pes skurčinen andro jaskiňi,
sar užaren garude andro kraki?
41 Ko pes starinela pal o chaben prekal o havranos,
sar leskre cikne vičinen ko Del a bludzinen bi o chaben?“