1 О Дэл алгышты э Ноес тай лэски чявэн тай пхэнляс лэнги:

— Мэ аракхлён пуя тай бутён, пхэрэн э пху. 2 Мэ лэл траш тай израипэ ангал тумэндэ алаи э гайванен э пхуякерэн тай алаи э чириклен э булутенгерэн, алаи, кай балакадиен, тай алаи э моряки мачен: он динэ тумэндэ андэ васта. 3 Алаи, со бэшэл тай со кхелавэлпэс, кан овэл тумэнги хапэ. Сар буруни Мэ динём тумэн зэлэниматэс, аякха ли анкха Мэ дав тумэн алаи.

4 Ами ма хан мас ратэса, саво си о бэшыпэ э гайваненго. 5 Тай андар тумаро рат Мэ чяльти кан мангав покиндима. Мэ кан мангав покиндима андар лэстэ кажни гайванестэ. Тай кажни манушэстэ Мэ кан пхучяв андар бэшыпэ лэски тухуместэ. 6 Кон би тэ на чёрэл рат манушэско, манушэски вастэса кан чёрдёл ли лэско рат. Вай о мануш кердо, сар о шавлин э Дэвлэско. 7 Мэ аракхлён пуя тай бутён, пхэрэн э пху тай бутён опэр латэ.

8 О Дэл пхэнляс э Ноески тай лэски чявэнги:

9 — Анкха Мэ керав завети тумэнца тай тумарэ пуенца, 10 тай вэрсавэ дживиндимаса, саво си тумэнца: чирикли я, кхерутно гайвани я вэшэско гайвани — алаенца, кон никлисто тумэнца андар кавчеги, тай кажни гайванеса опэр пху. 11 Мэ керав тумэнца завети: на кан овэл генэ алаи о дживиндо мудардо бугулдимаски паненца, на кан овэл генэ о бугулдима тэ хурдярэл э пху.

12 О Дэл пхэнляс:

— Аки о сикаипэ э заветеско, саво Мэ керав машкарэ Мандэ тай тумэндэ тай алаи ко дживиндэ, савэ си тумэнца, алаи о породэс, савэ кан овэн. 13 Мэ тхав опрэ булутя Ми радуга, тай ой кан овэл сикаипэ э заветеско машкарэ Мандэ тай ки пху. 14 Кана би Мэ тэ на бичялав булутя опэр пху, андэ булутя кан овэл радуга, 15 тай Мэ кан тюшундияв Мо завети машкарэ Мандэ тай тумэндэ тай алаи ко дживиндэ. Генэ о паня на кан чёрдён бугулдимаса, тэ мударэл алаи о дживиндо. 16 Екхараи, кана э радуга кан овэл андэ булутя, Мэ кан дикхав ла тай кан тюшундияв, кай на бытиел о завети машкарэ ко Дэл тай алаи ко дживиндэ, савэ си опэр пху.

17 Аякха пхэнляс о Дэл э Ноески:

— Аки о сикаипэ э заветеско, саво Мэ кердём машкарэ Мандэ тай алаи, ко дживиндо опэр пху.

18 О чявэ э Ноески, кай никлистэ андар кавчеги, сас о Сим, о Хам тай о Яфет. (О Хам — о дад э Ханаанеско.) 19 Адала трин чявэ э Ноески, тай лэндар улэ мануша, савэ бутилэ опэр алаи ки пху.

20 О Ной лиляс тэ гортярэл э пху тай тэ барярэл дракх. 21 Екхвар ов пиляс винас, матило тай сас пашло нанго андэ пэ катунатэ. 22 О Хам, о дад э Ханаанеско, дикхляс о нангипэ пэ дадэско тай никлисто, пхукавдяс адалэстар пэ пхралэнги. 23 Ай о Сим тай о Яфет лилэ савутя, тхэдэ лэн опэр пумарэ пхикендэ тай чёриндос динэ андэ тай учярдэ о нангипэ пумарэ дадэско. Лэнги муя сас болдинэ авэр риг, тэ на дикхен о нангипэ пумарэ дадэско.

24 Кана о Ной аинды тай галило, со кердяс лэса о тикно чяво. 25 Ов пхэнляс:

— О Ханаан дино арман! Ов кан овэл пэ пхралэнги палуно андар иргатя.

26 Генэ ов пхэнляс:

— Алгыштимэ о Сагбус о Яхвэ, о Дэл э Симеско! Мэ овэл о Ханаан иргати э Симеско. 27 Мэ буглярэл о Дэл э пху э Яфетески, мэ бэшэл о Яфет андэ катунэс ки Симески. Тай мэ овэл о Ханаан лэнги иргати.

28 Пал ко бугулдима о Ной бэшло 350 брэш. 29 Алаи о Ной бэшло 950 брэш тай муло.