1 Десе, кана тхарэлас о кхам, паш ко тэрэкя тэрэбинтя Мамрэ, кана о Авраам сас бэшло ангал пэ катунатэ, лэски сикавдяспэс о Сагбус о Яхвэ. 2 О Авраам ваздиняс пэ якха тай дикхляс ангал пэс тринэ муршэн. Ов дикхляс лэн, прастанило катар удар ки катунако мамуй лэндэ тай бангило джи ки пху. 3 Ов пхэнляс:

— Сагбус! Ов мандэ миласа, ма накх пашал мандэ Тэ иргатестэ. 4 Мэ анэн залак пани, тай мэ халярэн тумарэ пинрэ, тай рагантиен тал адалэ тэрэкестэ. 5 Тэ алянус тумэ тумарэ иргатестэ, мэ кан анав тумэнги тэ хан, тумэ кан хан тай кан джян англэ тумаро дром .

— Бут лачё, — пхэнлэ он. — Кер, сар пхэнэс.

6 О Авраам сигярдяс ки Сарра андэ катуна тай пхэнляс:

— Дэба, никал трин тапцыес*Авг. евр. «трин сэа», екх сэа адава паш ко си эфта литрэс. лачё варо, кер хумэр тай пэк питэс.

7 Дэчи ов прастанило ки атара, лиляс э лаче тэрнорэ гуруворэс тай диняс ко иргати, саво чяльти пэкляс лэс. 8 Дэчи ов андяс тхуд тай сути, тхэдяс ангал лэндэ э гуруворэс тэ хан. Бискай он ханас, ов сас тэрдо паш лэндэ тал тэрэки.

9 — Кай ти ромни э Сарра? — пхучлэ он.

— Окотэ, андэ катуна, — пхэнляс ов.

10 Дэчи о Сагбус о Яхвэ пхэнляс:

— Мэ чячес кан авав тутэ авэр брэш, паш адава жэ вахыти, тай ки Сарра, тэ ромнятэ, кан овэл чяво.

Э Сарра шунэлас, тэрди пал лэски думэстэ, андэ катуна. 11 О Авраам тай э Сарра сас пхурэ тай барэ брэшэнги, тай одова, со овэл ки джювли, ки Сарра тэрдило. 12 Оничин э Сарра асанили андар пэстэ, тюшунды: «Мэ вай пхурилём, тай мо сагбус пхуро. Мандэ тэ овэл асавки лош?»

13 Дэчи о Сагбус о Яхвэ пхэнляс э Авраамески:

— Соски э Сарра асал тай пхэнэл: «Та со, мандэ пхурятэ чячес кан овэл пуёс?» 14 Си шо-то, со нащи керэл о Сагбус о Яхвэ? Мэ кан авав тутэ авэр брэш андэ вахыти, саво камэл, тай ки Сарра кан овэл чяво.

15 Э Сарра трашанили тай лиляс тэ лэл пэ зборэс палэ:

— Мэ на асанилём.

Ай Ов пхэнляс:

— На, ту асанилян.

16 О мурша ущинэ тай лилэ тэ джян карин Садом. О Авраам гелдяс лэн. 17 О Сагбус о Яхвэ пхэнляс:

— Мэ на кан гаравав катар Авраам, со мангав тэ керав. 18 Катар Авраам кан овэл баро тай зорало дюняс, тай булуб лэски кан диндён бахт алаи о дюнядэс опэр пху. 19 Вай Мэ тхэдём лэс, ов тэ пхэнэл пэ пуенги, савэ кан аракхлён, тэ пхерэн о дром э Сагбуски э Яхвэско, тэ керэн о чячипэ тай о цындос. Дэчи Мэ, о Сагбус о Яхвэ, кан керав одова, со пхэнлём э Авраамески.

20 О Сагбус о Яхвэ пхэнляс:

— Э бэбэря мамуй ко Садом тай ко Гамора асавки бари, отхэ о мануша керэн пхарэ бэзя. 21 Кай тэ фуляв тэ дикхав, алаи си отхэ дошалэ я на. Тэ на, Мэ кан галяв.

22 О мурша болдинэпэс тай гелэ ко Садом, ай о Авраам ачило ангал Сагбус ко Яхвэ. 23 О Авраам пашыло карин Лэстэ тай пхэнляс:

— Ту со, кан мударэс э надошалэс э дошалэса? 24 Со, тэ си андэ диз пэинда надошалэ? Ту со, кан хурдярэс тай на кан ачявэс адая диз булуб пэинда надошалэнги? 25 Нащи Ту керэс асавко, тэ мударэс э надошалэн э дошалэса, нащи керэс э надошалэски тай э дошалэски екх. Нащи Ту керэс аякха! Та со, о Цындомари алаи э пхуяко кан керэл начячипэ?

26 О Сагбус о Яхвэ пхэнляс:

— Мэ тэ аракхава андэ Садом пэинда надошалэн, кан аядияв булуб лэнги алаи адая диз.

27 Дэчи о Авраам пхэнляс генэ:

— Аки, динём ман зор тэ зборизав э Сагбуса, хоч мэ прахос тай катрани. 28 Со, тэ си надошалэ пандженги залак, ниш пэинда? Кан хурдярэс Ту алаи э диз, кай на рэсэн пандж мануша?

— Мэ тэ аракхава отхэ саранду пандж, — пхэнляс Ов, — на кан хурдярав ла.

29 О Авраам пхэнляс Лэски генэ екхвар:

— Со, отхэ тэ аракхлёна саранда?

Ов пхэнляс:

— Булуб саранданги Мэ на кан керав адава.

30 Дэчи одова пхэнляс:

— Ма холязэ, Сагбуса, кан мукес ман тэ пхэнав. Со, тэ аракхлёна отхэ екх триянда?

Ов пхэнляс:

— Мэ на кан керав адава, тэ аракхава отхэ триянда.

31 О Авраам пхэнляс:

— Аки, мандэ сас асавки зор, кай пхэнлём э Сагбуски. Кай, тэ аракхлёна отхэ екх биш?

Ов пхэнляс:

— Булуб бишэнги Мэ на кан хурдярав ла.

32 Дэчи о Авраам пхэнляс:

— Ма холязэ, Сагбуса, ами мук ман тэ пхэнав генэ екхвар. Со, тэ аракхлёна отхэ екх дэш?

Ов пхэнляс:

— Булуб дэшэнги Мэ на кан хурдярав ла.

33 Кана о Сагбус о Яхвэ бытэрды тэ зборизэл э Авраамеса, Ов гело, ай о Авраам ало кхерэ.