1 Дуй миляикя алэ андэ Садом бэлвэле, тай о Лот сас бэшло ки бар ки дизаки. Кана о Лот дикхляс лэн, ов ущино тай бангило джи ки пху.

2 — Сагбудэс минрэ, — пхэнляс ов, — мангав тумэн, элан андэ кхер мандэ, тумарэ иргатестэ. Тумэ тэ кан халярэн тумарэ пинрэ тай тэ раткерэн, ай эртэс сабахтан тэ джян тумаро дром.

— На, — пхэнлэ он, — амэ кан раткерас ко майдани.

3 Ай ов аякха лачес мангляс лэн, кай он гелэ пал лэстэ тай динэ андэ кхер. Ов диняс лэн хабэ тай пэкляс лэнги писноя питэс, тай он халэ. 4 Ай ангал отхэ сар он пашлилэ, алаи о мурша э Садомески, о тэрнэ тай о пхурэ, агорадылар о кхер. 5 Он дэнас бэбэря э Лотески:

— Кай о мануша, савэ алэ тутэ бэлвэле? Никал лэн амэндэ, амэ мангас тэ совас лэнца.

6 О Лот никлисто лэндэ тай пханляс пал пэстэ о удар. 7 Ов пхэнлём:

-— На, мэ пхрала, ма керэн асавко джюнгалипэ. 8 Шунэн, мандэ си дуй чяя, савэ дага на сас ромэстэ. Эла мэ кан никалав лэн тумэндэ, тай керэн лэнца, со манген. Ай ма керэн ништо адалэ манушэнги, савэ алэ андэ мэ кхерэстэ.

9 Он пхэнлэ:

— Джя катар дром!

Тай пхэнлэ:

— Аки ту, джяти, алян тай пхэнэс амэнги, со тэ керас! Амэ кан керас туки май хурлуки, ниш лэнги.

Он лилэ тэ дэн бутуря э Лотес тай пашылэ тэ хурдярэн о удар. 10 Ай о мурша, савэ сас андэ кхер, сидинэ э Лотес андэ кхер тай пханлэ о удар. 11 Ай одолэн, кон э сас ко удар ки кхерэско, э тэрнэн тай э пхурэн, он корярдэ, аякха кай на аракхенас о удар.

12 Тай он пхэнлэ э Лотески:

— Кон генэ тутэ атхэ си? Джямутрэ,чявэ, чяя, кон-то генэ андэ диз? Гел лэн атхар, 13 вай амэ мангас тэ хурдярас адава тхан. Э бэбэря ангал Сагбус Яхвэ адалэ дюнястэ асавки бари, кай Ов бичялдяс амэн тэ хурдярас э диз.

14 О Лот никлисто тай пхэнляс одолэнги, савэ кан овэн лэски джямутрэ, пэ чяянги дэхлэнги:

— Чяльти, джян атхар! О Сагбус о Яхвэ кидэлпэс тэ хурдярэл э диз!

Ай одола тюшундылар, кай керэл пхэряс.

15 Кана лиляс тэ десёл, о миляикя лилэ тэ сигярдярэн э Лотес, пхэнэнас:

— Сигяр! Гел атхар тэ ромня тай тэ до чяян, я ту кан мэрэс екхетханэ адалэ бэзялэ дизаса.

16 Ов на сигярэлас, тай одола о дуй лилэ лэс вастэндар, тай лэски ромня, тай до чяян, вай о Сагбус о Яхвэ сас лэндэ миласа, тай никалдэ лэн пал диз. 17 Тай пал диз о екх андар лэндэ бэбэряса пхэнляс:

— Кутардие то бэшыпэ! Ма дикх палэ тай ма тэрдё опэр дром! Наш андэ горадэс, я ту кан мэрэс!

18 Ай о Лот пхэнляс лэнги:

— На, Сагбус! 19 Ту аякха лачё манца, тэ иргатестэ, тай Ту сикавдян манги бари мила, кутардиесас мо бэшыпэ. Ай андэ горадэс мэ нащи кан прастав: о хурлуки кан астарэл ман, тай мэ кан мэрав. 20 Аки одоя дизори надур, отхэ мэ кан рэсав тэ прастав, ой набари. Мук ман тэ прастав отхэ — вай ой тикнёри, тай мэ кан овав кутардимэ.

21 Ов пхэнляс:

— Лачё, Мэ кан керав ли адава: Мэ на кан хурдярав э диз, савятар ту пхэнэс. 22 Праста отхэ чяльти, вай Мэ нащи керав ништо, бискай ту на кан авэс джи латэ.

Оничин одоя диз бучёл Цоар*Авг. евр. «Цоар» самким «тикноро»..

23 О кхам ваздиндило, кана о Лот ало ко Цоар. 24 Дэчи о Сагбус о Яхвэ чёрдяс опэр Садом тай Гамора, сар брышым, тхарди сера. Ой али катар Сагбус Яхвэ опрал булутя. 25 Ов хурдярдяс о диза тай алаи одоя риг, тай алаен, кон бэшэлас андэ диза, тай алаи, со барёлас опэр пху. 26 Ай э ромни э Лотески дикхляс палэ тай ули лонэско столби.

27 Авэр сабаги о Авраам ущино эртэс тай ало одолэ тханэстэ, катэ ов сас тэрдо ангал Сагбус Яхвэ. 28 Ов дикхляс карин Садом тай Гамора, тай карин алаи ки ливади, тай дикхляс: бут тхув ваздиндёл катар пху, сар тхув андар пэчи.

29 Аякха, кана о Дэл тхардяс о диза э ливадяки, андэ савэндэ бэшэлас о Лот, Ов тюшунды катар Авраам тай кутарды э Лотес катар хурлуки.

30 О Лот трашалас тэ ачёл андэ Цоар, оничин ов тай лэски дуй чяя нашлэ андэ горадэс. Он екхетханэ ачилэ тэ бэшэн андэ пищера. 31 Э бари чяй пхэнляс э тикняки:

— Амаро дад пхуро, тай нанай мурш опэр пху, тэ пашлён амэнца, сар камэл. 32 Эла пиявдярас амарэ дадэс винас тай тэ пашляс лэса. Хоч амарэ дадэстар мэ овэн амэн пуя!

33 Одоя рат он пиявдярдэ пумарэ дадэс винас, тай э бари чяй али тай пашлили лэса. Ов на джянэлас, кана ой пашлили тай кана ой ущини. 34 Авэр дес э бари чяй пхэнляс э тикняки:

— Окоя рат мэ пашлилём амарэ дадэса. Эла генэ пиявдярас лэс винас авдес бэлвэле, тай ту кан авэс тай кан пашлёс лэса. Хоч амарэ дадэстар мэ овэн амэн пуя!

35 Он пиявдярдэ пумарэ дадэс винас тай адая рат, ли э тикни чяй али тай пашлили лэса. Тай ов на джянэлас, кана ой пашлили тай кана ой ущини.

36 Аякха ли о дуй чяя э Лотески насвалилэ пуёстэ пумарэ дадэстар. 37 Ки бари чяй аракхлило чяво, тай тхэдяс лэс Моав†Авг. евр. «Моав» шунлёл сар «катар дад».. Ов — о дад аканутнэ моавитяненго. 38 Ли ки тикни чяй аракхлило чяво, тай тхэдяс лэс Бэн-Амми‡Авг. евр. «Бэн-Амми» си «о чяво мэ дюняско». . Ов — о дад аканутнэ аммонитяненго.