1 О Иуда одова вахыти ачявдяс пэ пхралэн тай бэшэлас екхе манушэстэ андар Адуллам, кай бучёлас Хира. 2 Отхэ о Иуда дикхляс чяя ханаанеескеря, саво бучёлас Шуа. Ов прандосаило опэр латэ тай лиляс тэ бэшэл ласа. 3 Ой насвалили пуёстэ, тай аракхлило чяво, савэс о Иуда тхэдяс Эр. 4 Ой генэ насвалили пуёстэ, тай аракхлило чяво, тай ой тхэдяс лэс Онан. 5 Латэ аракхлило генэ екх чяво, тай ой тхэдяс лэс Шэла. Латэ ов аракхлило андэ Хезив.

6 О Иуда лиляс пэ баштутнэски э Эрески ромня, кай бучёлас Тамарь. 7 Ай о Эр, э Иудеско баштутно, сас бэзяло андэ якха ки Сагбуски, тай о Сагбус о Яхвэ диняс лэс ко мэрипэ.

8 Дэчи о Иуда пхэнляс э Онанески:

— Ту камэл тэ пашлёс тэ пхралэски ромняса, тэ керэс, со камэл тэ керэл о кумнатос, тэ овэн пуя тэ пхралэски*О пхрал э мулэско бипуенгерэско ром камэлас тэ лэл э пхивля, тэ аракхлён пуя э мулэски..

9 Ай о Онан джянэлас, кай о пуя на кан овэн лэски, оничин сальтя, кана пашлёлас пэ пхралэски ромняса, ов чёрэлас э муршэско ки пху, тэ на аракхлён пуя э пхралэски. 10 Одова, со ов керэлас, сас бэзя андэ якха ки Сагбуски Яхвэски, оничин Ов диняс ко мэрипэ ли Онанес.

11 Дэчи о Иуда пхэнляс пэ боряки э Тамаряки:

— Бэш пхивли андэ кхер тэ дадэстэ, бискай на кан барёл мо чяво о Шэла.

Ов тюшунды: «Сар би о Шэла тэ на мэрэл пал пэ пхралэндэ».

Тай э Тамарь гели тэ бэшэл андэ кхер пэ дадэстэ.

12 Бутэ вахытестар э ромни э Иудаски, э чяй э Шуаски, мули. Кана о Иуда раганты, ов гело андэ Тимна ко мануша, савэ моравэнас лэски бакрэн, тай лэско амал адулламитяни о Хира гело лэса.

13 Э Тамаряки пхэнлэ:

— То састро джял андэ Тимна тэ моравэл пэ бакрэн.

14 Ой читяс э пхивляки савутя, учярдяспэс, тэ на пэнджярэн ла, тай бэшли ангал Энаим, кай опэр дром андэ Тимна. Ой дикхелас, кай о Шэла барило, ай ла на динэ лэстэ сар ромня.

15 Кана о Иуда дикхляс ла, ов галило, кай кахпэиса, вай латэ сас пханло о муй. 16 Ов болдиняс катар дром латэ тай пхэнляс:

— Гадэ, мук тэ пашляв мэ туса, — вай ов на джянэлас, кай адава лэски бори.

Ой пхучляс:

— Ай со кан дэс ман андар одолэстэ, тэ пашлёс манца?

17 Ов пхэнляс:

— Мэ кан бичялав туки бузнорэс андар мэ атаратэ.

Ой пхучляс:

— Ай ту кан дэс ман шо-то джи одолэ вахытески, бискай бичялэс бузнорэс?

18 Ов пхэнляс:

— Со тэ дав тут?

Ой пхэнляс:

— То печяти опэр гайтани тай ровли, сави тутэ андэ васт.

Ов диняс ла алаи адава тай суто ласа, тай ой насвалили пуёстэ лэстар. 19 Ой гели отхар, пхучярдяспэс тай генэ урявдяс пхивляки савутя.

20 Одова вахыти о Иуда бичялдяс пэ амалэс э адулламитянес бузнорэса, тэ лэл палэ одова, со ачявдяс одолэ джювлятэ, ай о амал на аракхляс ла. 21 Ов пхучляс атхутнэ манушэндэ:

— Кай э храмески кахпэиса, сави сас бэшли ко дром андэ Энаим?

Он пхэнлэ:

— Атхэ на сас нисави храмески кахпэиса.

22 Ов ало ко Иуда тай пхэнляс:

— Мэ на аракхлём ла, тай о мануша одолэ тханэски пхэнлэ: «Атхэ нанай нисави храмески кахпэиса» .

23 О Иуда пхэнляс:

— Мэ ачявэл пэски одова, со лиляс, я кан овас андэ ладжявастэ. Вай мэ бичялдём лаки бузнорэс, ай ту ла на аракхлян.

24 Тринэ чёнэндар э Иудаски пхэнлэ:

— Ти бори э Тамарь пэли андэ кахпэлыки тай одолэстар насвалили пуёстэ.

О Иуда пхэнляс:

— Никалэн ла, тай ой мэ овэл тхарди!

25 Ай кана ла никалдэ аври, ой бичялдяс ко састро тэ пхэнэн:

— Мэ насвали пуёстэ катар мануш, каски си акала шэя. — Генэ пхэнляс: — Дикх, на пэнджярэс, каски акава печяти, гайтани тай ровли?

26 О Иуда пэнджярдяс лэн тай пхэнляс:

— Ой чячи, ниш мэ, вай мэ на динём ла мэ чявэстэ ко Шэла.

Ов генэ на пашлёлас ласа.

27 Кана ало лаки вахыти тэ аракхлёл пуёс, андэ латэ сас чяворэ-огизя. 28 Кана латэ аракхлёнас, о екх андар лэндэ никалдяс васт. Дэчи э джювли, кай керэлас ярдыми тэ аракхлён, лиляс лоло тхав, пханляс лэско васт тай пхэнляс:

— Адава никлисто ангал.

29 Ай ов сидиняс о васт палэ, тай никлисто лэско пхрал. Дэчи ой пхэнляс:

— Сар адава ту накхлян?

Тай лэс тхэдэ Парец†Авг. евр. нав «Перец» шунлёл сар зборэс «ов накхлян».. 30 Дэчи никлисто ли одова, савэстэ опэр васт сас лоло тхав, тай лэс тхэдэ Зерах‡Авг. евр. нав «Зарах» шунлёл сар зборэс «ов уло лоло»..