1 О измаилитяня андэ э Иосифес андэ Египти, тай о египтяни о Потифар, ярдымари э фараонеско тай баро опэр лэски барэндэ, киндяс лэс лэндэ.

2 О Сагбус о Яхвэ сас э Иосифеса, тай лэстэ алаи сас лачё, кай бэшэлас андэ кхер пэ египетски сагбустэ. 3 Лэско сагбус дикхляс, кай о Сагбус о Яхвэ сас э Иосифеса тай кай Ов дэл лэс лачипэ андэ алаестэ, со ов керэл. 4 О Иосиф аракхляс лачипэ андэ лэски якхендэ тай уло лэско иргати. О Потифар тхэдяс лэс опэр пэ кхерэстэ тай диняс лэс тэ дикхел пал алаи пэ мангинэстэ. 5 Тай одолэ вахытестар, сар ов тхэдяс лэс опэр пэ кхерэстэ тай опэр алаи ко мангин, о Сагбус о Яхвэ алгышты о кхер э египтянеско булуб э Иосифески. О алгыштима э Сагбуско сас опэр алаестэ, со сас ко Потифари, — тай андэ кхер, тай андэ ливади. 6 Оничин ов диняс, тэ дикхел о Иосиф пал алаестэ, со лэстэ сас. Булуб э Иосифески ов ништоски на керэлас касывэти, екх тэ хал.

Ко Иосиф сас лачё стани тай шукар, 7 тай вахытестар э ромни лэски сагбуски лиляс тэ дикхел карин лэстэ:

— Пашлё манца!

8 Ай ов на мангляс, пхэнляс:

— Манца мо сагбус ништоски на керэл касывэти андэ кхер. Алаи, со си лэстэ, ов диняс мандэ тэ дикхав пал лэстэ. 9 Андэ адалэ кхерэстэ мэ алаендар баро. Мо сагбус диняс ман алаи, булуб тутар, вай ту — лэски ромни. Сар мэ тэ керав асавко баро джюнгалипэ тай керав бэзя ангал Дэл?

10 Ой мангелас лэс кажын дес, ай ов на мангелас тэ пашлёл ласа тай джи тэ овэл ласа.

11 Екхвар ов диняс андэ кхер пэ дилаки, кана никхон андар кхерутнэ на сас андэ кхер. 12 Ой диняс бурнэк лэс савутендар тай пхэнляс:

— Пашлё манца!

Ай ов сидиняспэс тай нашло, ачявдяс опрунэ савутя латэ андэ васта.

13 Кана ой дикхляс, кай ов нашло тай ачявдяс о савутя латэ андэ васта, 14 ой диняс икос э кхерутнэ иргатен тай пхэнляс лэнги:

— Дикхен, адалэ евреес андэ амэндэ андэ кхер, ай ов керэл амэнги маскаралыки! Ов ало атхэ тай мангляс тэ пашлёл манца, ай мэ лилём тэ дав бэбэря. 15 Ай ов мэ бэбэрятар ачявдяс пэ савутя тай нашло.

16 Ой астарэлас о савутя э Иосифески пэстэ, бискай на ало кхерэ лэско сагбус. 17 Ой пхукавдяс лэски одова жэ пхукаипэ:

— Адава иргати, о евреи, савэс ту амэндэ андян, ало мандэ тай мангляс мандар тэ керэл маскаралыки, 18 ай мэ лилём тэ дав бэбэря, тай ов ачявдяс мандэ пэ савутя тай нашло.

19 Кана лэско сагбус шунляс о пхукаипэ пэ ромняко, сави пхэнляс: «Аки со то иргати кердяс манца», ов лачес холясаило. 20 Ов лиляс э Иосифес тай бэшавдяс лэс андэ пханли, катэ сас о патишайлытика пханлимаря. Тай аякха о Иосиф уло андэ пханли.

21 Ай о Сагбус о Яхвэ сас лэса; Ов кердяс лэски мила, тай о баро опэр барэ сас лачё лэса. 22 О баро опэр барэ тхэдяс э Иосифес опэр алаи ко пханлимаря, тай ов дикхелас пал алаи ко дилэс андэ пханли. 23 О баро опэр барэ на дикхелас пал одолэстэ, пал состэ дикхелас о Иосиф, вай о Сагбус о Яхвэ сас э Иосифеса тай дэлас лэс лачипэ андэ алаи ко дилэс.