4
Ola bosmen blanga King Salaman
Wal Salaman bin jidan king blanga ola pleis langa Isreil, en dislot na bin ola boswan wekinmen blanga im.
Esaraiya, det san blanga Seidok bin det serramonimen.
Eliyoref en Ahija bin det dubala san blanga Shisha en deibin raidimdan ola leda en enijing blanga King Salaman.
Jehosafet bin det san blanga Ahilad en imbin maindimbat ola buk weya deibin raidimdanbat ebrijing weya bin oldei hepin.
Benaiya, det san blanga Jehoiyada bin det bos blanga ola soljamob.
Seidok en Abaiyatha bin det dubala serramonimen.
Esaraiya, det san blanga Neithan bin det haibala bos blanga ol detlot gabman bos.
Seibad det serramonimen bin det san blanga Neithan, en imbin oldei albumbat King Salaman jinggabat ola ebrijing weya im garra oldei dumbat.
Ahisha bin det bos blanga ola wekinmen langa detlot bigwan haus blanga King Salaman.
Eidoniram, det san blanga Ebda, bin det bos blanga ola wekinmen en wekingel weya jidan jis laiga prisana blanga dumbat ola adwek.
Salaman bin pikimat 12 men blanga jidan gabman bos langa ola difrin pleis langa Isreil. Langa det pleis weya deibin jidan bos deibin lafta gedim daga blanga King Salaman en ol im femilimob en ola wekinmen weya bin jidan langa im kemp. Ebri manth wanbala gabman bos bin dum lagijat, en det neks manth najawan gabman bos bin dum igin. Difrin gabman bos bin dum lagijat langa ebri manth. Dijan na ola neim blanga detlot 12 gabman bos, en det kantri weya deibin jidan bos.
Benhura bin bos blanga det hil kantri langa Ifreiyim.
Bendeka bin bos blanga ola taun gulum Makas, Shalbim, Bethshemesh, Ilan en Bethanan.
10 Benased bin bos blanga det dubala taun gulum Arubath en Sako, en langa ola kantri langa Hefa.
11 Benabinadeb hubin merrit langa Tafath det doda blanga King Salaman, bin bos blanga ol det kantri gulum Nafodowa.
12 Beina det san blanga Ahilad bin bos blanga det dubala taun gulum Tanak en Magido, en ol detlot kantri gulijap langa det taun gulum Bethshan. Imbin gulijap langa det taun gulum Serathan, en im jidan sauthwei brom det taun gulum Jesriyel, en det kantri im go raidap langa det dubala taun gulum Eibulmehola en Jokmiyam.
13 Bengeba bin bos langa det taun gulum Remoth deya langa det kantri gulum Giliyad, en langa ola lilwan taun langa Giliyad. Detlot lilwan taun bin blanga det femili blanga Jaiyiya, brom Manesa klen. En Bengeba bin bos blanga Egob deya langa Beishan weya bin abum 60 taun en detlot taun bin abum bigbala wol raidaran langa olabat, garram kopawan ba ontop langa ola geit.
14 Ahinadeb bin det san blanga Ido, en imbin jidan boswan blanga det pleis langa Mahanaiyim.
15 Ahimas hubin merrit langa Beisamath det najawan doda blanga King Salaman, bin bos blanga det kantri gulum Neftali.
16 Beina, det san blanga Hushai bin bos blanga det kantri gulum Esha en det taun gulum Biyaloth.
17 Jehoshafet, det san blanga Paruwa bin bos blanga det kantri gulum Isaka.
18 Shimiyai, det san blanga Ela bin bos blanga det kantri gulum Benjamin.
19 Geba det san blanga Uri bin bos blanga det kantri gulum Giliyad. Longtaim King Saihon bin jidan bos blanga ola Emarait pipul, en King Og bin jidan boswan blanga ola Beishan pipul deya.
Wal wanbala haibala gabman bos bin jidan brabli boswan langa ola kantri langa Isreil en langa ol dislot men.
Salaman bin abum olkain ting wen imbin jidan king
20 Wal ola pipul langa Isreil en Juda bin jidan detmatj deibin jis laik ola sengraun weya jidan langa solwodasaid. Deibin ol jidan gudbinjiwei en deibin oldei abum detmatj blanga dagat en dringk. 21 Ol det kantri weya Salaman bin jidan king bin brom det Yufreitis Riba raidap langa det boda blanga Filastain kantri, en raitdan langa det boda blanga Ijip. Deibin oldei peiyim im teks mani en detlot pipul bin oldei wek blanga im olataim wen imbin jidan king. Jen 15:18; 2 Kran 9:26
22 Wal ola daga weya Salaman bin oldei wandim ebridei bin 1,500 kilogrem sofwan flauwa, 3,000 kilogrem rafwan flauwa, 23 10 buligi weya deibin oldei fidimbat blanga meigim olabat fetwan, 20 buligi brom pedik, 100 ship, en ola difrinkain diya gulum gasel en robak, en loda jukjuk.
24 Wal Salaman bin jidan bos blanga ola najalot kantri sangodanwei langa det Yufreitis Riba, brom Tifsa langa det Yufreitis Riba raidap sangodanwei langa det taun gulum Gasa. En Salaman bin jidan bos langa ola najalot king weya bin jidan sangodanwei langa det Yufreitis Riba, en ola pipul langa detlot kantri bin jidan gudbinji langa im. 25 Olataim wen Salaman bin jidan laibala ola pipul brom Juda en Isreil bin ol jidan seifwan. Ola femili bin abum olabat ronwan greiptri en figtri gadin.
26 Wal Salaman bin abum 40,000 lilwan rum blanga ol im hosis weya bin oldei pulumbat ola bagi, en imbin abum 12,000 hosis blanga ola solja. 1 King 10:26; 2 Kran 1:14; 9:25 27 Detlot 12 gabman boswan blanga im bin oldei gibit im en ol detlot langa im bigwan haus ola daga ebri manth en deibin oldei gibit im ebrijing weya imbin wandim. 28 En deibin oldei gibit daga blanga ola hosis en wekin enimul du.
29 Wal God bin meigim Salaman sabi ebrijing detmatj en imbin brabli klebabala du. 30 Salaman bin mowa klebawan king langa ola najalot klebawan men brom sanraiswei en brom Ijip. 31 Imbin mowa klebawan langa ola men. En imbin mowa klebawan langa Ithan det Esrahait men en Heiman en Kelkol en Dada hubin detlot san blanga Mahol, en langa ola pipul langa najalot kantri bin sabi imbin brabli klebabalawan. 32 Imbin raidimdan 3,000 klebawan wed en mowa den 1,000 song. Prab 1:1; 10:1; 25:1; Song 1:1 33 Imbin oldei toktok blanga ola tri en plent brom detlot bigwan sidatri brom Lebanan raidap langa ola rili lilwan plent weya gro langa wol. Imbin oldei toktok blanga ola enimul en ola bard en ola sneik en ola fish. 34 Ola king brom ebriweya langa dijan wel bin irrim blanga Salaman weya imbin sabi ebrijing, en deibin oldei jandim sambala pipul blanga lisin langa im.

4:21 Jen 15:18; 2 Kran 9:26

4:26 1 King 10:26; 2 Kran 1:14; 9:25

4:32 Prab 1:1; 10:1; 25:1; Song 1:1