Sekan Kranakuls
Ola Stori Blanga Ola King Blanga Juda
Wal langa dijan stori King Salaman bin bildimap det speshalwan Serramoni Pleis blanga God. Wen King Salaman bin dai im san bin jidan king, bat tenbala klen brom nowathwei bin pikimat najawan king en deibin gulum det nowathwan kantri Isreil. Det naja dubala klen langa sauthwei bin gulum olabat kantri Juda. Ol detlot stori iya na blanga detlot king blanga Juda en Isreil raidap langa detlot enamimob weya deibin deigimwei ola Isreil en Juda pipul prisana. Bambai det king brom Pesha neim Sairas bin larram detlot Juda pipul gobek langa Jerusalem blanga bildimbek det taun igin.
1
King Salaman bin prei
Fes Kings 3:1-15
1 Wal Salaman det san blanga Deibid bin jidan nyuwan king blanga Isreil, en YAWEI det trubala God blanga im bin album im jidan brabli strongbala.
2 Wal King Salaman bin gibit oda langa ola boswan solja hubin jidan bos blanga 1,000 men, en ola bos blanga 100 men, ola gabman bos en ola lida blanga ola difrinwan femili en ola najalot pipul. 3 Imbin gibit oda langa olabat blanga go garram im en weshipbat langa YAWEI deya langa im seikridwan tent weya Mosis bin pudumap langa det pleis gulum Gibiyan. 4 Wal det Seikridwan Boks bin jidan langa Jerusalem insaid langa det tent weya King Deibid bin pudumap. Imbin bringimap det Seikridwan Boks brom det taun gulum Kiriyajerim.✡2 Sem 6:1-17; 1 Kran 13:5-14; 15:25—16:1 5 Wal det kopawan teibul blanga ofring bin deya langa Gibiyan, lida langa det Seikridwan Tent blanga YAWEI. En King Salaman en ola pipul bin weshipbat YAWEI deya na. Besalel, det san blanga Yurai en det grensan blanga Huwa, bin meigim det kopawan teibul. ✡Eksa 38:1-7 6 King Salaman bin weship YAWEI lida langa det Seikridwan Tent, en imbin gibit 1,000 barnapwan sekrifais ontop langa det kopawan teibul blanga ofring. 7 Wal det nait God bin kamat langa King Salaman en imbin askim im, “Wanim yu wandim mi garra gibit yu?” 8 En King Salaman bin tok, “Yubin oldei laigim main dedi Deibid brabliwei, en afta yubin meigim mi jidan nyuwan king. 9 Wal YAWEI yu kipum det strongbala pramis yubin meigim langa main dedi. Yubin meigim mi jidan king blanga detmatj pipul weya nobodi kaan kaundimap.✡Jen 13:16; 28:14 10 Wal yu garra meigim mi klebabala blanga sabi ebrijing gudwei wulijim ai gin jidan bos blanga dislot pipul blanga yu.”
11 God bin tok langa im, “Yubin askimbat mi blanga gudbala ting. Yu nomo bin askimbat blanga mani en gol, o blanga yu kantri, o bidimbat ol yu enamimob, o jidan laibala longtaim. Yubin askim mi blanga meigim yu jidan klebabala blanga sabi ebrijing gudwei wulijim yu gin jidan bos blanga main pipul olabat. 12 Ai garra meigim yu jidan brabli klebabala wulijim yu garra sabi ebrijing. En ai garra gibit yu blendibala ebrijing du, en yu garra jidan nambawan king en mowa haibala langa eni king hubin jidan bifo o hu garra jidan bambai.”
King Salaman bin jidan brabli strongbala king
Fes Kings 10:26-29
13 Wal King Salaman bin libum det pleis blanga weshipbat langa Gibiyan weya det Seikridwan Tent blanga YAWEI bin jidan. Imbin gobek langa Jerusalem en deya na imbin jidan king blanga ola Isreil pipul. 14 Wal King Salaman bin baiyim 1,400 bagi en 12,000 hosis. Sambala imbin abum langa Jerusalem, en sambala imbin libum langa najalot taun.✡1 King 4:26 15 Wen King Salaman bin jidan king blanga ola Isreil pipul detmatj silba en gol bin jidan deya langa Jerusalem jis laik bigismob ston. En detmatj gudwan sidatri bin jidan jis laik det sikamotri weya jidan ebriweya deya langa det Juda Beli. 16-17 En King Salaman bin abum sambala wekinmen hubin jidan langa det dubala kantri, Ijip en Salisha, blanga baiyimbat hosis en bigmob bagi blanga deigimbek langa Jerusalem. Brom deya deibin selim olabat langa det dubala king blanga ola Hitait en Siriya pipul. Deibin baiyim bagi fo 600 silba mani en hos fo 150 silba mani.✡Dyud 17:16