6
Deibin jandimbek det Seikridwan Boks
Wal det Seikridwan Boks blanga YAWEI det trubala God bin jidan deya langa det Filastain kantri fo 7 mants, en afta detlot Filastain pipul bin jandim wed langa ola serramonimen blanga olabat en langa ola doktabala blanga olabat, en wen deibin kamat deya, detlot pipul bin askim olabat, “Wanim wi garra dum garram det Seikridwan Boks? Hau wi garra jandimbek det boks langa det Isreil kantri weya imbin oldei jidanbat?”
Wal detlot serramonimen en doktabala bin tok, “If yumob jandimbek det Seikridwan Boks blanga det drimin blanga ola Isreil pipul, wal yumob kaan jandimbek det Boks nomo garram enijing. Yumob lafta jandimbek det Boks garram ofring blanga pei blanga yumob nogudbalawei, en wen yumob dum lagijat, det drimin garra meigim yumob gudbala, en afta yumob garra sabi wotfo imbin kipgon panishimbat wi.”
Wal detlot pipul bin tok, “Wal wanim ofring melabat garra jandim?”
Wal detlot serramonimen en doktabala bin tok, “Yumob garra gajim sambala gol, en yumob garra meigim faibala golwan sheip jis laik detlot boil weya yumob bin abum, en yumob garra meigim faibala golwan sheip jis laik detlot lilwan enimul gulum maus weya meigimbat ola kantri blanga wi brabli nogud. Yumob garra meigim faibala sheip, wanbala blanga ebri Filastain king, dumaji detlot boil bin kamat langa detlot faibala king du. Ol detlot sheip na yumob garra meigim, en yumob garra shoum rispek langa det drimin blanga ola Isreil pipul. Maitbi im garra stap panishimbat wi en ola drimin blanga wi en ola kantri blanga wi. Yumob nomo wandi meigim miselp admen seimwei laik det king en ola pipul langa Ijip. Deibin abum trabul brom det drimin blanga ola Isreil pipul. En dei nomo bin larramgo detlot Isreil pipul, dumaji deibin meigim miselp admen, en deibin kipgon abumbat loda trabul raidap deibin jandimwei detlot pipul. Wal yumob nomo wandi meigim miselp admen seimwei laik olabat en nomo jandimbek det boks.
“Wal dijan na yumob garra dum. Yumob garra gajim nyuwan wegan en dubala mamiwan buligi weya nomo bin pulum wegan bifo, en yumob garra taiyimap det dubala buligi langa det wegan, en afta yumob garra deigidawei det dubala gabigabi brom det dubala mamiwan, en yumob garra deigimbek det dubala gabigabi langa yad. Afta na yumob garra pudum det Seikridwan Boks ontop langa det wegan, en yumob garra pudum ol detlot golwan sheip weya yumob garra jandim blanga ofring insaid langa najawan boks, en yumob garra pudum det najawan boks ontop langa det wegan wansaid langa det Seikridwan Boks. Afta na yumob garra larram det wegan gowei miselp, en yumob garra lukinatbat wujei det wegan garra go. If det wegan go langa det roud langa det Isreil taun gulum Bethshemesh, wal wi garra sabi det drimin blanga ola Isreil pipul bin meigim dis brabli nogudwan trabul blanga wi. Bat if det wegan nomo go langa det roud langa det Isreil kantri, wal wi garra sabi det drimin nomo bin jandim dis trabul langa wi. Det trabul bin jis kamat eniwei.” Lagijat na detlot serramonimen en doktabala bin tok.
Wal detlot pipul bin duwit langa olabat, en deibin meigim faibala golwan sheip jis laik detlot boil weya deibin abum, wanbala sheip blanga ebri Filastain taun gulum Eshdad, Gasa, Eshkalan, Geth en Ekran. Deibin meigim detlot sheip blanga ofring blanga pei blanga olabat nogudbalawei, en deibin meigim bigmob golwan sheip jis laik detlot lilwan enimul gulum maus, wanbala blanga ebri bigwan taun en lilwan taun weya detlot faibala king bin jidan bos.
10 Afta na deibin gajim dubala mamiwan buligi, en deibin taiyimap dubala langa wegan, en deibin deigimbek det dubala gabigabi langa yad, 11 en deibin pudum det Seikridwan Boks ontop langa det wegan wansaid langa det najawan boks garram ol detlot golwan sheip weya deibin meigim.
12 Afta na deibin larramgo det dubala buligi garram det wegan, en dubala bin go streit langa det roud weya im go langa det taun gulum Bethshemesh. Nomeda dubala bin jingatjingat olawei, bat stil dubala bin bulurrumbat det seim roud.
Wal detlot faibala Filastain king bin bulurrumbat det wegan longwei biyain wotjimbat det wegan raidap det wegan bin krosim det boda blanga det kantri.
13 Wal ola Isreil pipul brom Bethshemesh bin wekin langa olabat fam gajimbat ola sid daga gulum wit, en wen detlot pipul bin lukap, deibin luk det wegan bin kaminap, en wen deibin luk det Seikridwan Boks ontop langa det wegan, deibin gudbinji brabliwei.
14-15 Wal det wegan bin pulap wansaid langa bigwan ston deya langa det fam blanga wan men brom Bethshemesh neim Joshuwa, en ola pipul bin ran langa det wegan, en ola men brom det Libai klen bin lidimap det Seikridwan Boks en det najawan boks brom det wegan, en deibin pudum det dubala boks ontop langa det ston.
Afta na ola pipul bin breigimap det wegan, en deibin meigim faiya garram det wud, en deibin kilim ded det dubala buligi, en deibin barnimap blanga gibit ofring langa YAWEI, en deibin gibit najalot ofring langa im du.
16-18 Wal detlot faibala Filastain king bin lukinatbat langa olabat brom longwei, en afta wen detlot Isreil pipul bin binij gibitbat detlot ofring, detlot faibala king bin gobek langa det taun gulum Ekran.
Wal det ston weya detlot Isreil pipul bin pudum det Seikridwan Boks, im stil deya tudei blanga meigim wi jinggabat wanim bin hepin deya longtaim.
Det Seikridwan Boks
19 Afta na 70 men brom det taun gulum Bethshemesh bin luk insaid langa det Seikridwan Boks blanga YAWEI, en God bin kilim olabat ded, en wen imbin panishim olabat lagijat, ol detlot Isreil pipul bin sori miselp nomo lilbit, 20 en ola men langa det taun bin dalim miselp, “Wi nomo garram enibodi iya blanga lukaftumbat det Seikridwan Boks blanga YAWEI, dumaji im brabli seikridwan God. Wal wi garra jandimwei det boks brom iya.”
Det Seikridwan Boks langa Kiriyajerim
21 Afta na deibin jandim wed langa ola pipul langa det taun gulum Kiriyajerim. Deibin tok, “Detlot Filastain pipul bin jandimbek det Seikridwan Boks blanga YAWEI. Wal yumob lafta kaman en gajim det boks en deigimbek garram yumob.”