1-2 Wal ola bigininimob garra duwit langa olabat mami en dedi, dumaji olabat blanga Jisas Krais det Bos blanga wi, en im rait ting blanga duwit langa mami en dedi, dumaji langa oltestaman im tok, “Yu garra lukbek langa yu dedi en mami.”✡Kalosh 3:20 3 En det lowa bin abum det feswan pramis du weya im tok, “If yu rispek en teiknodis langa yu mami en dedi, wal God garra meigim yu jidan gudbalawei, en yu garra jidan longtaim langa det kantri weya God garra gibit langa yu.”✡Eksa 20:12; Dyud 5:16

4 En ola mami en dedi garra tridim olabat biginini gudwei en nomo meigim olabat gitwail, en dei garra growimap olabat gudbalawei en panishim olabat raitwei en titjimbat olabat hau blanga jidanbat laik Jisas Krais det Bos wandim olabat blanga jidan.✡Kalosh 3:21

5 Wal ola wekinmen en ola wekingel hu jidan laiga prisana garra duwit langa olabat bos, en dei garra rispek olabat bos en duwit brabliwei jis laik dei wek blanga Jisas Krais. 6-7 Dei kaan wek nogudwei wen olabat bos nomo deya. Dei garra wek gudwei olataim. Bat dei kaan wek gudwei blanga meigim olabat bos gudbinji blanga olabat. Dei garra wek gudwei blanga meigim God gudbinji, dumaji dei dumbat det wek blanga det Bos Jisas Krais, 8 en dei garra jinggabat wanim det bos garra du. Bambai im garra gibit prais langa ebribodi blanga ola gudbala wek weya deibin dumbat. Nomeda olabat jidan wekinmen laiga prisana o wekinmen weya jidan fri, bat stil dei garra gedim det prais brom Jisas Krais.✡Kalosh 3:22-25

9 En ola bos garra tridim olabat wekinmen en wekingel gudwei du, en dei kaan yusum raf wed langa olabat, dumaji olabat sabi dei garram det seimwan Bos langa hebin hu jidan bos blanga ola wekinmen en wekingel blanga olabat, en det Bos na garra jadjim ebribodi seimwei bambai.✡Dyud 10:17; Kalosh 3:25; 4:1

10 Wal wanmo ting ai garra dalim yumob. Yumob garra meigim miselp strongbala garram Jisas Krais det Bos blanga wi en garram det brabli strongbala pawa blanga im, 11 en yumob garra yusum ola ting weya God oldei gibit langa yumob blanga bidim det boswan dibuldibul en ola nogudwan trik blanga im. 12 Yumob garra yusum ol detlot ting blanga God jis laiga solja weya im yusum ola ting blanga fait. Bat wi nomo fait langa pipul. Wi oldei fait langa ola dibuldibul en langa ola nogudwan spirit en langa ol detkain ting weya kamat brom dakbala en meigim miselp bos.

13 Wal yumob garra oldei werrimon detlot ting brom God jis laik det solja weya im oldei werrimon detlot speshalwan klos blanga fait, en if yumob jidan redi lagijat ebridei, wal wen det dibuldibul kaman langa yumob blanga trai en deigidawei yumob, yumob garra jidan redi blanga fait garram im, en yumob garra bidim im en nomo gibap.

14 Wal ol dislot ting na yumob garra werrimon jis laik detlot speshalwan klos blanga fait. Det belt weya meigim ebrijing fit brabliwei, im det trubala wed blanga God en nomo laiyawan, en lagijat na yumob garra werrimon det belt du. En det solja werrimon speshalwan shet weya nomo enijing kaan ardim im insaid langa im hat. En wen yumob oldei dum ebrijing raitwei blanga God, im jis laik yumob werrimon det speshalwan shet weya nomo enijing kaan ardim yumob hat.✡Aisai 11:5; 59:17 15 En jis laik det solja oldei werrimon im but redi blanga go en fait, yumob garra oldei jidan redi du blanga go en dalimbat det Gudnyus, dumaji det Gudnyus na garra meigim pipul jidan gudwei.✡Aisai 52:7 16 En jis laik det solja weya im yusum det shild blanga stapam enijing weya det enami tjakambat langa im, yumob garra oldei bilib brabliwei en nomo larram enijing brom det boswan dibuldibul tatjim yu. 17 Det solja oldei werrimon speshalwan het blanga stapam enijing brom kilimbat im langa hed. En seimwei du yumob garra oldei jinggabat weya God bin seibum yumob, en tharran na stapam enijing brom ardimbat yumob. En jis laik det solja oldei garrimap det bigbala naif, wal yumob garra oldei garrimap det wed blanga God langa yumob hat en main. En det Holi Spirit na bin gibit yumob det wed.✡Aisai 59:17

18 Wal yumob garra oldei dum ol detlot ting na, en yumob garra oldei prei langa God du en askim im blanga album yumob. En yumob garra oldei larram det Holi Spirit lidim yumob wen yumob prei. En yumob garra oldei wotjim miselp en nomo slekap. Yumob garra oldei prei blanga ola Kristjan pipul. 19 En yumob garra prei blanga mi du, en askim God blanga dalim mi hau blanga tok langa pipul wen mi abum tjens. En yumob garra askim im blanga meigim mi tok strongbalawei en meigim ola pipul sabi brabliwei det gudnyus en det plen blanga God. 20 Nomeda mi jidan iya langa jeil, bat stil mi speshalwan mesinja blanga det gudnyus. En ai wandim yumob garra prei blanga mi, en askim God blanga meigim mi tok strongbalawei blanga det gudnyus, jis laik im wandim mi blanga dum.

21-22 Wal ai garra jandim det braja blanga wi neim Titjakas langa yumob. Wi laigim im brabliwei, en im brabli trubala wekinmen blanga Jisas Krais det Bos blanga wi, en im garra dalim yumob blanga mi en meigim yumob sabi hau mi. Blanga tharran na mi jandim im langa yumob, en im garra dalim yumob ola nyus blanga melabat, en im garra album yumob en meigim yumob gudbinji.✡Eks 20:4; Kalosh 4:7,8; 2 Tim 4:12

23 Wal mi askim God det Dedi blanga wi, en Jisas Krais det Bos blanga wi, blanga meigim ol yumob Kristjan braja en sista gija jidan gudbalawei. En mi askim dubala blanga meigim yumob laigim gija brabliwei en bilib strongbalawei. 24 En mi askim God blanga jidan brabli kainbala langa yumob olagijawan, dumaji yumob laigim Jisas Krais det Bos blanga wi brabliwei.

Binij na.