1 Wal YAWEI det trubala God bin dalim Mosis blanga gibit ol dislot lowa langa detlot Isreil pipul.

2 If yu baiyim wekinmen, en im kantrimen blanga yu, wal im garra wek blanga yu 6 yiya, en langa det namba 7 yiya yu garra larramgo im fri, en det wekinmen kaan peiyim yu enijing blanga meigim miselp fri. 3 Wen yu larramgo im fri, if yubin baiyim im nomo garram waif, wal im garra gowei nomo garram waif. Bat if yubin baiyim im garram waif, wal im garra gowei garram im waif. 4 If yubin gibit im waif, en det gel bin abum biginini blanga im, wal det gel en detlot biginini olabat blanga yu, en det wekinmen garra gowei miselp. 5-6 If det wekinmen tok, “Ai laigim main bos en main waif en main biginini olabat, en ai nomo wandim main bos garra larramgo mi fri,” wal yu garra deigim im langa det Serramoni Pleis, en deya na yu garra meigim im jandap wansaid langa dowa, en yu garra makam im irriwol, en im garra jidan wekinmen blanga yu olagijawan.✡Labid 25:39-46

7 If yu selim yu doda langa enibodi blanga meigim im wekingel blanga det sambodi, wal det bos blanga im kaan larramgo im fri seimwei laik im larramgo ola wekinmen. 8 If yu selim yu doda langa sambodi hu wandi merrit langa im, en im nomo meigim det men gudbinji, wal det men garra larram yu baiyimbek det gel. Det men kaan selim det gel langa streinja, dumaji im nomo bin kipum im pramis garram det gel. 9 If yu baiyim wekingel blanga gibit langa yu san blanga merrit, wal yu garra tridim det wekingel seimwei laik yu tridim yu doda. 10 If yu gedim najawan waif, yu kaan fogedabat yu feswan waif. Yu garra kipgon gibitbat im daga en klos, en yu garra larram im silip garram yu. 11 If yu kaan dum lagijat langa yu feswan waif, wal yu garra larramgo im fri, en im kaan peiyim yu enijing blanga meigim miselp fri.

12 If enibodi hitim eni men, en im kilim im ded, wal im garra dai du.✡Labid 24:17 13 If im nomo bin wandi kilim det men ded, wal im garra gowei langa det pleis weya God garra pikimat, en dei kaan kilim im ded deya.✡Nam 35:10-34; Dyud 19:1-13; Josh 20:1-9 14 Bat if imbin gitwail, en imbin wandi kilim det men ded, wal im garra dai. Nomeda im ran langa det teibul blanga ofring blanga askim God blanga seibum im, bat stil im garra dai.

15 If enibodi hitim im dedi o im mami, wal im garra dai.

16 If enibodi stilim eni men blanga selim im o blanga meigim im wekinmen blanga im, wal im garra dai.✡Dyud 24:7

17 If enibodi tok nogudwei en sweya langa im dedi o im mami, wal im garra dai.✡Labid 20:9; Meth 15:4; Mak 7:10

18-19 If dubala men agamin gija, en det wanbala pudum det najawan langa bed, dumaji imbin hitim im garram ston o garram im bingga, en afta det men gidap, en im wokabat atsaid garram wokinstik, wal nobodi kaan panishim det men hubin hitim im, dumaji im nomo bin kilim im ded. Det men hubin hitim im garra jis peiyim mani langa im, en im garra lukaftumbat im raidap im gudwan.

20 If enibodi gajim wadi, en im hitim im wekinmen o wekingel, en im dai deya gin, wal dei garra panishim det boswan. 21 If det wekinmen o wekingel nomo dai streidawei, bat im dai afta tudeistaim, wal nobodi kaan panishim det boswan, dumaji imbin lujim loda mani wen imbin lujim im wekinmen o wekingel.

22 If sambala men fait, en dei hitim gel hu jidan femiliwei, en im lujim det beibi, bat dei nomo bin ardim det gel, wal det men hubin hitim im en meigim det beibi dai garra peiyim det gel hasbin wanim im wandim wen dubala go langa kot. 23 Bat if det men bin ardim det gel, wal dei garra panishim im. If imbin kilim det gel ded, wal im garra dai du. 24 If imbin bastim im ai, dei garra bastim im ai du. If imbin breigim im tuth, dei garra breigim im tuth du. If imbin breigim im bingga, dei garra breigim im bingga du. If imbin breigim im fut, dei garra breigim im fut du.✡Labid 24:19,20; Dyud 19:21; Meth 5:38 25 If imbin barnim im, dei garra barnim im du. If imbin kadim im, dei garra kadim im du. If imbin meigim im swelap, dei garra meigim im swelap du.

26-27 If enibodi hitim im wekinmen o wekingel, en im bastim im ai o breigim im tuth, wal im garra larramgo det wekinmen o wekingel fri blanga peiyim im blanga det ai o det tuth.

28 If enibodi boiwan buligi honim sambodi ded, wal nobodi kaan panishim det boswan blanga det buligi. Bat dei garra kilim det buligi ded garram ston, en nobodi kaan dagat im bifpat. 29 If det buligi bin oldei wandi rijimbat pipul, en deibin gibit woning langa det boswan, en im nomo bin pudum det buligi langa pedik, en afta det buligi honim sambodi ded, wal dei garra kilim det buligi ded garram ston, en det boswan garra dai du. 30 Bat if detlot pipul wandim, dei gin larram det boswan peiyim olabat wanim dei wandim blanga seibum miselp. 31 Det lowa im lagijat du if det buligi kilim lilboi o lilgel ded. 32 Bat if det buligi kilim wekinmen o wekingel ded, wal det boswan blanga det buligi garra peiyim 30 silbawan mani langa det boswan blanga det wekinmen o wekingel, en dei garra kilim det buligi ded garram ston.

33-34 If enibodi deigimat lid brom dipwan hol o grajim dipwan hol, en im nomo gaburrumap det hol, en if boiwan buligi o dongki buldan langa det hol, wal im garra peiyim det boswan blanga det buligi o dongki, en im garra abum det dedwan enimul. 35 If enibodi boiwan buligi kilim najawan men buligi ded, wal det dubala men garra selim det laibwan buligi en kadimat miselp det mani, en dubala garra kadimat miselp det bif brom det dedwan buligi du. 36 Bat if det men bin sabi det buligi blanga im bin oldei wandi rijimbat najalot buligi, en im nomo bin pudum det buligi langa pedik, wal im garra peiyim det najawan men blanga im dedwan buligi. Im garra gibit im det laibwan buligi, en im garra abum det dedwan buligi.