1 Brom deya YAWEI det trubala God bin tok langa Mosis, “Yu kaman langa mi ontop langa det hil garram detlot thribala men neim Eran, Neideb en Abaihu en garram detlot 70 lida blanga ola Isreil pipul. Ola najalot pipul kaan kaman langa det hil. En wen yumob lilbit longwei, yumob garra baudan en weship langa mi, 2 en afta yu garra kaman gulijap langa mi. Oni yu miselp garra kaman. Detlot najalot men kaan kaman langa det hil.”

3 Brom deya Mosis bin go langa detlot Isreil pipul, en imbin dalim olabat wanim YAWEI bin tok, en imbin gibit olabat detlot lowa weya YAWEI bin gibit im, en detlot pipul bin tok, “Melabat garra dum ebrijing weya YAWEI bin tok.”

4 Wal Mosis bin raidimdan ol detlot lowa na, en ailibala imbin bildimap teibul blanga ofring lodan langa det hil, en imbin jandimap twelbala ston deya. Imbin pudum wanbala ston blanga ebri klen.

5 Afta na Mosis bin jandim sambala yangmen blanga abum det sekrifais serramoni blanga YAWEI, en deibin kilim sambala yangwan buligi blanga det ofring gulum feloship ofring du, 6 en Mosis bin gajim sambala blad brom detlot buligi, en imbin pudum det blad langa dish, en imbin tjakam detlot najalot blad langa det teibul blanga ofring.

7 Afta na Mosis bin gajim det buk garram ola lowa blanga YAWEI, en imbin ridimat ol detlot lowa langa detlot Isreil pipul, en deibin ol tok, “Melabat garra lisin langa YAWEI, en melabat garra dum ebrijing weya imbin tok.”

8 Brom deya Mosis bin gajim det dish garram det blad, en imbin tjakam det blad ebriweya ontop langa detlot pipul, en imbin tok, “YAWEI bin gibit yumob detlot lowa, en imbin meigim det strongwan pramis garram yumob, en yumob bin tok yumob garra duwit langa im. Wal dijan blad na garra jidan pruf blanga det nyubalawei blanga YAWEI.”✡Meth 26:28; Mak 14:24; Luk 22:20; 1 Karin 11:25; Hib 9:19,20; 10:29

9 Brom deya Mosis, Eran, Neideb, Abaihu en detlot 70 lida blanga ola Isreil pipul bin gowap langa det hil, 10 en deibin luk det trubala God blanga ola Isreil pipul, en det graun weya imbin jandap bin luk jis laiga purdiwan bluwan ston, en det ston bin luk brabli kliyawan jis laik det skai. 11 En God nomo bin kilim detlot men hubin luk im, en afta deibin dringgim en dagat daga.

12 Brom deya YAWEI bin tok langa Mosis, “Yu garra kaman iya langa mi ontop langa dis hil, en ai garra gibit yu dubala fletwan ston garram ola lowa weya aibin raidimdan blanga lenim detlot Isreil pipul.”

13 Afta na Mosis en det men hubin oldei albumbat im neim Joshuwa bin meigim miselp redi, en dubala bin stat blanga gowap langa det seikridwan hil, 14 en Mosis bin dalim detlot lida blanga ola Isreil pipul, “Yumob garra weit iya blanga minbala raidap minbala kambek. Ai garra libum det dubala men Eran en Huwa iya garram yumob, en if enibodi abum agamin, det dubala na garra sodimat det agamin.”

15 Brom deya Mosis bin galimap hafwei langa det hil gulum Sainai, en wan klaud bin gaburrumap det hil, 16-17 en YAWEI bin jidan langa det hil jis laiga brabli shainiwan lait. Detlot Isreil pipul bin luk det lait, en imbin luk jis laiga faiya bin barn ontop langa det hil. Blanga 6 dei det klaud bin gaburrumap det hil, en langa det namba 7 dei YAWEI bin jingat langa Mosis brom det klaud, 18 en Mosis bin galimap raidap langa top langa det hil insaid langa det klaud, en imbin jidan deya 40 dei en 40 nait.✡Dyud 9:9