25
Song blanga gibit theingks langa YAWEI
1 Wal aibin sing dijan song na.
“YAWEI, yu na blanga main God.
Mi rispek langa yu en preisimbat yu neim.
Yu oldei dumbat brabli gudbala ting.
Brabli longtaim yubin meigim plen blanga olabat,
en yubin dum ebrijing yubin wandim dum.
2 Yubin bitsimap detlot taun en ola strongbala wol blanga detlot enami,
en yubin meigim olabat haus jidan rabishwan,
en dei kaan neba bildimbek detlot haus igin.
3 Ol detlot pipul hu jidan langa detlot strongbala kantri garra ol rispek langa yu,
en detlot krulbala pipul garra bradin langa yu.
4 YAWEI, yu oldei maindimbat ola powan pipul en detlot pipul hu garram trabul.
Yu wulijim det shelta brom win en rein blanga olabat.
Yu wulijim sheid tri langa hotwan san weya barnimbat pipul.
Detlot strongbala en krulbala enami weya kaman blanga faitfait,
dei jis laik det brabli strongbala stom weya garra binijap ebrijing.
Bat stil oni yu na YAWEI oldei maindimbat olabat.
5 En jis laik det san weya im oldei jidan brabli hotwan, detlot krulbala pipul kaman.
Bat yu wulijim det klaud weya meigim det graun jidan kolbala langa det hotwan dei.
Yubin bidim detlot enami, en dei nomo bin sing eni song.
Dei nomo bin win.”
YAWEI bin seibum melabat
6 Wal aibin tok na, “Deya langa Jerusalem YAWEI det boswan God garra abum brabli gudwan padi blanga ebribodi langa dijan wel. Det padi garra abum brabli gudwan daga en bif en wain. 7 En langa det dei na, im garra deigimwei detlot greib klos weya gaburrumap dijan wel. 8 YAWEI det boswan God garra binijimap det pawa blanga det greibyad, en im garra lukaftumbat enibodi hu kraikraibat. Im kaan larram enibodi tok nogudbalawei en mokimbat langa im pipul olabat.✡ 1 Karin 15:54; Reb 7:17; 21:4
9 “En langa det dei na pipul garra tok, ‘YAWEI det trubala God bin seibum melabat. Melabat bin weidabat blanga im en imbin kaman en seibum melabat. Wal melabat garra preisimbat oni langa im.’
10 “Wal YAWEI garram im brabli strongbala pawa garra lukaftumbat Jerusalem, bat det kantri gulum Moweb garra jidan rabishwan na, en im garra jidan wulijim draiwan gras langa wetwan pleis weya detlot buligi breigimap wen dei wokwokbat deya. 11 Detlot pipul blanga Moweb garra trai blanga ranawei, bat God garra meigim ola praudbala pipul jidan lobala nomeda olabat kipgon trai blanga ranawei. 12 Detlot brabli haibala wol blanga detlot taun langa Moweb garra binijap, en im garra buldan langa graun jis laik das.”✡ Aisai 15:1—16:14; Jera 48:1-47; Isik 25:8-11; Eimos 2:1-3; Sef 2:8-11