37
King Hesakaiya bin askim Aisaiya sambala wed
Sekan Kings 19:1-7
Wal aibin kipgon tok, “Wal streidawei wen King Hesakaiya bin irrim det nyus, imbin breigim im klos, en imbin fil sori en imbin werrimon sekbeigwan klos. Afta tharran imbin go insaid langa det Serramoni Pleis blanga YAWEI. Imbin dalim det haibala bos neim Eliyakim en im wekinmen neim Shebna en det boswan serramonimen blanga werrimon sekbeigwan klos en go en tok langa mi. Wal deibin tok langa mi, ‘Aisaiya, dijan im brabli adwan en brabli nogudbala taim blanga wi pipul. Olabat jis laik det wuman hu jidanbat brabli wikwan, en kaan abum det lilwan beibi wen im redi blanga bon. Aisaiya, yu garra prei blanga wi hu stil jidan laibala. Wal det king brom Asiriya bin jandim det haibala wekinmen blanga mokimbat det laibalawan God. Maitbi YAWEI bin irrim wanim imbin toktokbat, en maitbi im garra irrim yu en ensim yu preya.’
“Wal wen detlot wekinmenmob blanga King Hesakaiya bin kaman langa mi, aibin dalim olabat dijan mesij blanga King Hesakaiya brom YAWEI, ‘Mi na YAWEI det trubala God. Yu nomo wori blanga det mesinja brom det king brom Asiriya hubin mokimbat en toktokbat blanga mi. Ai garra meigim det king jidan nogudbinji garram stori blanga wanim bin hepin langa im ronwan kantri. Im garra gobek, en deya na ai garra meigim im dai brabli krulbalawei.’ Tharran na det mesij brom YAWEI.”
Det Asiriya king bin jandim leda
Sekan Kings 19:8-19
Wal det haibala wekinmen brom Asiriya bin irrim nyus det im king bin libum det taun gulum Leikish blanga fait langa det najawan taun gulum Libna, en imbin go deya na.
Wal langa det seimtaim igin, det king brom Asiriya bin gajim det nyus na, hau det king neim Tairaka brom Ithiyopiya bin kaminap blanga fait langa im. Wal det king brom Asiriya bin jandim sambala mesinja garram leda langa King Hesakaiya. 10 Imbin tok, “Yu nomo trastimbat yu God en bilib langa im pramis blanga seibum Jerusalem brom melabat. 11 Yubin olredi irrim hau melabat, ola Asiriya pipul, bin binijimap ola najalot pipul. Wotfo yu reken yu garra jidan seifwan? 12 Detlot king brom Asiriya hubin jidan king bifo mi, bin binijimap detlot taun gulum Gosan, Heran, Resef en ebri pipul brom Betheden hubin jidan langa Telasa. Wanim gudbala ting olabat drimin bin dum blanga olabat? 13 Detlot king brom Heimath, Apad, Sefabaim, Hena en Ibaha bin ol binijap.” Lagijat na det leda bin tok.
King Hesakaiya bin prei
14 Wal afta King Hesakaiya bin ridimbat det leda brom det king brom Asiriya, King Hesakaiya bin deigim det leda insaid langa det Serramoni Pleis en imbin spredimat, wulijim YAWEI garra luk. 15 En imbin prei, 16 “YAWEI, yu det boswan God en yu God blanga ola Isreil pipul du. Yu jidan deya langa top langa yu speshalwan tjeya en det dubala golwan sheip garram wing jidan tusaid langa det tjeya. Yu na bin meigim det skai en dijan graun, en oni yu na wanbala jidan bos blanga ola kantri langa dijan wel. Eksa 25:22 17 YAWEI, yubin lisin hau Senakerib bin toktok nogudbalawei blanga yu, det laibalawan God. 18 Im trubala YAWEI, detlot Asiriya king bin meigim loda kantri jidan jis laik deset kantri. 19 En deibin binijimap detlot drimin sheip weya detlot pipul bin oldei meigimbat brom wud en ston blanga weshipbat. 20 Bat YAWEI, yu na God blanga melabat. Wal melabat askim yu blanga kipum melabat seifwan brom det Asiriya king, wulijim ebribodi brom ebri kantri langa dijan wel garra sabi oni yu na YAWEI det trubala God.” Lagijat na King Hesakaiya bin prei.
Aisaiya bin go en dalim King Hesakaiya wanim YAWEI bin tok
Sekan Kings 19:20-37
21-22 Wal mi na Aisaiya bin go en dalim King Hesakaiya wanim YAWEI det trubala God blanga ola Isreil pipul bin tok, “King Hesakaiya, yubin prei langa mi blanga King Senakerib brom Asiriya. Wal dijan na wanim ai garra tok langa det king,
‘Detlot pipul blanga Jerusalem nomo laigim yu.
Olabat meigimbat fan langa yu,
en olabat oldei laflafbat biyain langa yu bekboun.
23 En yu King Senakerib, yubin mokimbat mi,
en yubin tok nogudbalawei langa mi, det brabli holiwan God blanga ola Isreil pipul.
24 Yubin larram yu wekinmenmob mokimbat mi, YAWEI.
En yubin reken miselp,
dumaji yubin lidimbat ola hosis en bagi langa det brabli haibala hil kantri blanga Lebanan.
En yubin go langa det bush kantri en kadimbat ola gudbala sidatri en saiprastri.
25 Yubin tok praudbalawei blanga meigimbat wel en dringgimbat woda langa loda difrinwan kantri,
en hau yubin meigim ol detlot krik jidan draiwan langa Ijip.
 
26 ‘Wal King Senakerib, yu irrim mi na.
Mi na YAWEI.
Aibin meigim dijan plen blanga ol dislot ting longtaim.
En yu nomo sabi mi na, det wanbala hubin meigim dijan plen wulijim yu gin dum ol dislot ting.
Aibin larram yu blanga go en meigim detlot strongbala taun jidan rabishwan.
27 Ola pipul hubin jidan langa detlot taun bin brabli wikwan en bradin nomo lilbit,
en dei nomo bin sabi enijing.
Olabat bin jis laik detlot gras weya oldei jidan wansaid langa roud,
o jis laik detlot gras weya oldei gro ontop langa ruf,
en wen det hotwan win blo, im draiyap.
 
28 ‘Ai sabi ebrijing blanga yu,
en hau yu brabli wail langa mi.
29 Aibin luk yu praudbalawei,
en hau yu nomo laigim mi brabliwei.
Wal ai garra pudum huk langa yu nos, en bit langa yu mawus,
en jandimbek yu brom weya yubin kaman.’
Lagijat na YAWEI bin tok.”
30 Wal aibin tok langa King Hesakaiya, “King Hesakaiya, ai garra dalim yu wanim garra hepin. Langa dijan yiya en neksyiya yu garra dagat ola frut en sid daga weya bin gro miselp. En langa det namba thri yiya, yu garra plentimbat en growimap sid daga en greiptri, en yu garra dagat detlot daga weya yubin growimap. 31 En detlot pipul hu jidan laibala langa Juda garra jidan jis laik det tri garram rut raitdan insaid langa graun en bambai im garra abum loda frut daga. 32 YAWEI det boswan God garra meiksho sambala pipul garra kipgon jidan langa Jerusalem.
33 “En YAWEI bin meigim dijan pramis blanga King Senakerib brom Asiriya. Imbin tok, ‘Det king kaan go deya langa Jerusalem, en im kaan tjakambat im spiya langa det taun, o meigim im soljamob gitredi blanga fait en majurrumap miselp raidaran langa det taun. 34 Trubala mi na YAWEI, en ai garra meigim det king gobek langa det seimwan roud weya imbin kaman brom, en im kaan neba go insaid langa Jerusalem. 35 Ai garra maindimbat det taun, dumaji main haibala neim en det pramis aibin meigim garram main wekinmen Deibid.’ Lagijat na YAWEI bin tok blanga King Senakerib.”
King Senakerib bin dai
36 Wal YAWEI bin jandim wanbala einjul langa det kemp blanga detlot Asiriya solja, en imbin kilim 185,000 men det nait. Ailibala det neksdei, det kemp bin bulap garram ola dedwan bodi. 37 Afta tharran, King Senakerib bin gobek langa Asiriya, en imbin jidan langa det taun gulum Ninaba.
38 Wal wandei det king bin go en weshipbat insaid langa det serramoni pleis blanga im drimin gulum Nisrak wen im dubala san neim Edramelek en Sharesa bin kaman en kilim im ded garram dubala bigbala naif. En dubala bin ranawei deya langa det kantri gulum Eraret, en najawan san blanga im neim Esaradan bin jidan det nyuwan king.

37:16 Eksa 25:22