38
King Hesakaiya bin gulijap dai
Sekan Kings 20:1-11; Sekan Kranakuls 32:24-26
1 Wal langa det taim na, King Hesakaiya bin gitsik en imbin gulijap dai. Wal mi na, Aisaiya bin go deya langa im en aibin dalim im na, “YAWEI det trubala God bin tok, ‘Yu kaan gitbeda. Yu garra dai. Wal yu lafta dumbat wanim yu garra dum blanga gitredi blanga dai.’ ”
2 Wal King Hesakaiya bin tenim miselp langa det wol en imbin prei na, 3 “YAWEI, yu nomo fogedabat mi. Aibin oldei jidan brabli trubala langa yu. Aibin oldei bulurrum langa yu brabliwei, en aibin dum wanim yubin dalim mi blanga dum.” En afta na imbin krai nomo lilbit.
4-5 Brom deya YAWEI bin jandim mi langa King Hesakaiya garram mesij blanga im. YAWEI bin tok, “Mi na YAWEI, en yu grengrenfatha Deibid bin oldei weshipbat langa mi. Aibin irrim yu wen yubin prei langa mi, en aibin luk yubin kraikraibat. Wal ai garra larram yu jidan laibala blanga 15 yiya mowa. 6 Ai garra maindim yu en yu taun Jerusalem brom det king brom Asiriya.” *Det dubala bes 21 en 22 im iya langa bes 6 blanga album wi sabi det stori. Luk det seimwan stori langa 2 Kings 20:4-11.
Wal aibin dalim detlot wekinmen blanga King Hesakaiya blanga bitsimap det frut daga brom det figtri blanga meigim medisin blanga det king sowa wulijim det sowa garra gitbeda. Afta na King Hesakaiya bin askim YAWEI blanga shoum im hau im garra sabi im garra gitbeda en go langa det Serramoni Pleis blanga weship YAWEI igin.
7 Wal aibin tok, “YAWEI na garra shoum yu samting wulijim yu bilib im garra kipum im pramis. 8 Imbin tok, ‘Yu garra luk det san garra gobek kwikbala sangidapwei.’ En YAWEI bin dum lagijat na.”
King Hesakaiya bin sing en preisim YAWEI
9 Wal dijan na wanbala song King Hesakaiya bin raidimdan wen imbin gitbeda.
10 “Aibin reken ai garra dai na langa main gudbala yiya,
en jidan prisana olagijawan langa det greibyad garram ola dedbala pipul.
11 YAWEI, aibin reken ai kaan neba luk yu igin,
en kaan neba luk enibodi hu jidan langa dijan wel.
12 Blanga main laif bin binij,
jis laik det stakmen tent wen bigwan win bin blowimwei.
Yubin kadimof main win,
jis laik deibin kadimof det kotin brom det rolapwan kotin.
Kwikbala aibin reken yu garra binijim main laif.
13 Raidap ailibala aibin reken yu garra bitsimap main boun na,
jis laik det hanggriwan laiyan.
Kwikbala aibin reken yu garra binijim main laif.
14 Aibin kraikraibat jis laik det lilwan bard,
en aibin jinginat sedwei jis laik dab.
Blanga main dubala ai brabli redwan brom lukinatbat blanga yu YAWEI.
Mi ardimbat nomo lilbit.
Yu kaman en album mi.
15 “Ai kaan tok enijing blanga ensimbek yu.
Oni yu na wanbala gin dum dijan langa mi.
Blanga main laif imbin go brabli sedwan na.
Ai garra jidan lobala raidap ai garra dai.
16 “Wen yu tok langa enibodi yu gibitbat laif langa im,
en langa mi du.
Yu meigim mi jidan brabli strongbala igin.
17 Aibin abum loda adwan taim,
bat yubin titjimbat mi.
Yubin laigim mi en yubin lukaftumbat mi.
Yubin seibum mi brom det greibyad,
Brom ol detlot nogudbala ting weya aibin dumbat,
yubin larramgo mi fri.
18 Nomo eni dedbala pipul gin tok theingkyu en preisim yu.
Nomo enibodi langa greibyad gin sabi yu jidan brabli trubalawan.
19 Oni detlot pipul hu jidan laibala gin tok theingkyu,
wulijim mi dumbat tudei na.
Ol detlot pipul oldei dalimbat olabat bigininimob det trubalawei blanga yu.
20 Yu na YAWEI bin seibum mi.
Ebridei melabat garra jidan laibala,
melabat garra sing song langa yu Serramoni Pleis.
Melabat garra pleipleibat ola gita blanga preisim yu.”
Tharran na det song blanga King Hesakaiya.