29
Jeramaiya bin raidim leda langa ola Juwish pipul langa Bebalon
1-2 Wal wen King Nebakanesa bin deigimwei sambala pipul brom Jerusalem en Juda prisana langa Bebalon, en King Jehoiyakin en im mami, en ol detlot klebabala men hubin oldei meigimbat olkainaba ting brabli gudwei, en detlot lidamob blanga Jerusalem en Juda, aibin stil jidan deya langa Jerusalem. En aibin raidimdan leda langa detlot speshalwan mesinja, en detlot serramoni men en detlot lidamob blanga detlot Isreil pipul hubin jidan prisana deya langa Bebalon. 2 King 24:12-16; 2 Kran 36:10 En aibin gibit det leda langa Elasa det san blanga Shafan en langa Gemaraiya det san blanga Hilkaiya. King Sedakaiya brom Juda bin jandim det dubala langa King Nebakanesa blanga Bebalon.
Det leda bin tok, “YAWEI det boswan God blanga ola Isreil pipul bin tok langa ol detlot pipul weya imbin larram Nebakanesa deigimwei brom Jerusalem en meigim olabat jidan prisana langa Bebalon. Imbin tok, ‘Yumob garra bildimap haus en jidan deya. Yumob garra growimap gadin en dagat daga brom det gadin weya yumob bin growimap. Yumob garra merrit en abum biginini. Afta yumob garra larram yumob bigininimob merrit du wulijim olabat garra abum loda biginini du. Yumob garra jidan bigismob, en yumob kaan jidan lilwan. Blanga detlot taun weya aibin jandim yumob blanga jidan prisana yumob garra wek brabli adbala en meigim detlot taun jidan gudwei. Yumob garra prei langa mi blanga olabat, dumaji if olabat jidan gudbalawei, wal yumob garra jidan gudbalawei du. Ai gibit woning na. Nomo larram detlot laiyawan mesinja en najalot pipul hu oldei jidan garram yumob oldei trikimbat yumob wen olabat oldei tok dei sabi wanim garra hepin bambai. Nomo teiknodis langa olabat drim. Olabat oldei dalimbat yumob laiyawan wed garram main neim. Bat ai nomo bin jandim olabat, najing.
10 “ ‘En afta yumob bin jidan deya langa Bebalon fo 70 yiya, ai garra shoum yumob ai laigim yumob en ai garra kipum main pramis. Ai garra bringimbek yumob langa yumob ronwan kantri na. 2 Kran 36:21; Jera 25:11; Den 9:2 11 Oni mi na sabi ola plen ai garra dum blanga yumob. Detlot plen garra meigim yumob jidan brabli gudwei, nomo garram eni trabul. Detlot plen weya ai garra dum blanga yumob bambai garra hepin jis laik yumob wandim. 12 Wen yumob garra jingat en prei langa mi, wal ai garra ensim yumob. 13 En wen yumob garra lukabat blanga mi, wal yumob garra faindim mi dumaji yumob garra kambek en weship langa mi en ai garra jidan langa yumob. Dyud 4:29 14 Yuwai, yumob garra faindim mi, en ai garra meigim yumob jidan langa yumob ronwan kantri. Ai garra majurrumap yumob brom ebri kantri en brom ebri pleis weya aibin spredimat yumob longtaim, en ai garra bringimbek yumob langa yumob ronwan kantri brom weya aibin jandimwei yumob langa najawan kantri.’ Lagijat na YAWEI bin tok.
15 “Yumob reken YAWEI bin gibit yumob speshalwan mesinja deya langa Bebalon. 16 Bat yumob irrim wanim YAWEI bin tok blanga det king hu oldei jidan bos langa det kantri weya Deibid bin jidan boswan basdam, en blanga detlot pipul hu stil jidan iya langa Jerusalem. Olabat jidan detlot rileishan blanga yumob hu nomo bin gowei prisana garram yumob.
17 “Wal YAWEI det brabli boswan God bin tok, ‘Wal ai garra meigim olabat jidan hanggriwan, en ai garra jandim pipul blanga faitfait, en ai garra jandim brabli nogudbala siknis langa olabat, en ai garra meigim olabat jidan rabishwan, jis laik det frut daga weya im go nogudwan en yu kaan dagat. 18 Trubala ai garra dum dijan. Olabat garra jidan hanggriwan, en ai garra jandim pipul blanga faitfait, en ai garra jandim brabli nogudwan siknis, en ola kantri en ola pipul langa dijan wel garra brabli hatjamp wen dei luk detlot pipul. Ebriweya aibin spredimat olabat, ola pipul garra gedim shok en bradin nomo lilbit blanga wanim bin hepin langa olabat. Ola pipul garra meigimbat fan langa olabat, en yusumbat olabat neim nogudbalawei. 19 Dijan na garra hepin langa olabat, dumaji olabat nomo bin teiknodis langa mi wen aibin jandim main wed thru langa detlot speshalwan mesinja. Olabat bin jadimap olabat irriwol. 20 Wal ol yumob pipul weya aibin jandimwei langa Bebalon, yumob irrim mi.
21 “ ‘Yumob reken Eiheb det san blanga Kolaiya, en Sedakaiya det san blanga Meiseiya jidan speshalwan mesinja, dumaji dubala oldei dalimbat yumob dei tok langa main neim. Bat dubala oldei dalimbat yumob laiyawan wed. Wal ai garra hendimoba det dubala langa King Nebakanesa brom Bebalon hu garra kilim det dubala ded lida langa yumob. 22 Wen yumob wandim tok nogudbalawei langa sambodi, yumob garra tok, “Larram YAWEI tridim yu wulijim det dubala Sedakaiya en Eiheb wen det king brom Bebalon bin tjakam dubala langa faiya wen dubala bin stil laibala.” 23 Dijan na garra hepin langa dubala, dumaji dubala brabli giltiwan brom detlot nogudbala ting deibin oldei dumbat. Dubala bin oldei silipsilip garram naja men waif, en dubala bin oldei dalimbat laiya garram main neim. Ai nomo bin laigim tharran. Ai sabi wanim dubala bin oldei dumbat.’ Lagijat na YAWEI bin tok.”
Det mesij blanga Shemaiya
24-25 Wal YAWEI det boswan God blanga Isreil, bin gibit mesij langa mi blanga Shemaiya brom det taun gulum Niyalam deya langa det kantri Bebalon. Afta detlot pipul langa Bebalon bin gedim det leda brom Jeramaiya, Shemaiya bin jandim leda garram im ronwan neim langa ola pipul brom Jerusalem, en langa det serramonimen neim Sefanaiya det san blanga Meiseiya, en langa ola najalot serramonimen. Langa det leda na Shemaiya bin raidimdan dijan wed langa Sefanaiya. 26 “YAWEI bin meigim yu serramonimen blanga deigim pleis blanga Jehoiyada, en yu na boswan wekinmen blanga det Serramoni Pleis blanga YAWEI. En if eni medwan men reken im na speshalwan mesinja yu garra meiksho yu taiyimap im garram tjein en garram raunwan aiyan raun langa im nek. 27 Wotfo yu nomo dum lagijat langa Jeramaiya brom det kantri gulum Einathoth hubin oldei toktokbat jis laik speshalwan mesinja langa ola pipul? 28 Im garra lafta stap, dumaji imbin dalim melabat iya langa Bebalon, melabat garra jidan prisana longtaim en melabat garra bildimap ola haus, en jidan iya na, en growimap gadin en dagadagat wanim melabat bin growimap.” Lagijat na Shemaiya bin raidimdan detlot wed langa det leda.
29 Wal Sefanaiya bin ridimat det leda langa mi, 30-32 en afta YAWEI bin tok langa mi blanga jandim leda langa ola pipul hu jidanbat prisana langa Bebalon. Dijan na det mesij im tok blanga Shemaiya, “Mi na YAWEI garra panishim Shemaiya en ol im bigininimob. Im reken miselp im speshalwan mesinja, en imbin meigim yumob bilib ol detlot laiyawan wed. Bat ai nomo bin jandim im. Im en im bigininimob kaan jidan laibala blanga luk detlot gudbala ting weya ai garra dum blanga main pipul olabat, dumaji imbin dalim olabat nomo blanga teiknodis langa mi.” Lagijat na YAWEI bin tok.

29:1-2 2 King 24:12-16; 2 Kran 36:10

29:10 2 Kran 36:21; Jera 25:11; Den 9:2

29:13 Dyud 4:29