14
“Ola pipul hu jidan laibala garram shotwan laif en dei jidan brabli soriwan. Wi jis laik det purdiflawa weya im binijap kwikbala, en det shedo weya im gowei kwikbala. Wal mi askim yu main God. Wotfo yu oldei lukinatbat langa mi? Yu garra gibit mi feyago langa kothaus? Nomo eni pipul iya jidan raitwei. Blanga wi taim langa dijan wel yubin meigim, en melabat kaan tjeinjim. Wotfo yu nomo libum melabat en larram melabat jidan gudbalawei wen melabat oldei dumbat adwek?
“Wen sambodi kadimdan det tri, im stil gin gro igin. Blanga im rutpat im gin go nogudwan, bat if yu wodarimbat im garram woda, yu luk det tri im gedim nyuwan bushis en im jidan laibala. 10 Melabat difrinwan. Wen melabat dai melabat binijap olagijawan. Melabat kaan neba gidap igin. 11 Melabat jidan jis laik det riba wen im stap ranranbat en jis laik det lilwan krik wen im jidan draiwan. 12 Wen melabat dai, wi kaan neba gidap igin raidap det skai garra binij. Nomo enibodi gin meigim wi gidap brom det greib. 13 Ai wandim yu blanga haidim mi langa greibyad weya detlot dedwan pipul oldei jidan, en if yu nomo wail langa mi enimo, yu garra jinggabat langa mi en yu garra seibum mi.
14 “Wen olabat dai yu reken pipul garra gidap laibala igin? Nomeda aibin abum loda trabul bat stil ai garra weidabat blanga det taim. 15 Yubin meigim mi en wen yu wandim mi, yu garra jingat langa mi, en ai garra ensim langa yu. 16 Yu garra lukaftumbat langa mi, bat yu kaan kaundimat ol detlot nogudbala ting blanga main. 17 Yu garra pudumwei olabat en yu garra fogedabat ol main nogudbalawei aibin oldei dumbat.
18 “Langa dijan wel ola bigwan hil buldan en ola rok buldan du. 19 Wen det rein im buldan brabli hebiwan, det woda im meigim det rok jidan rabishwan en im washimwei ola graun. Wal lagijat na yu oldei binijimap ola gudbala ting melabat oldei jinggabat. 20 Wen melabat dai yu tjeinjim det wei hau melabat luk en yu pudumwei melabat olagijawan. 21 Melabat kaan jidan laibala blanga luk melabat bigininimob en sabi if olabat garra jidan gudbalawei o nogudbalawei. 22 Melabat oldei filim melabat ronwan pein, en wen melabat kraikraibat, wal im oni blanga melabat ronselp.” Lagijat na Job bin prei.