1 Wal Elifas brom det taun gulum Teman bin tok igin, 2-3 “Job, if yu bina abum gudbala main, yu bina stap toktokbat siliwei. 4 Yubin tok tumatj na. Maitbi yu meigim najalot pipul gibit bekboun langa God na, en meigim olabat wanwanbat en nomo prei langa im. 5 Yu jinggabat nogudbalawei en im meigim yu tok trikibalawei du. 6 Mi nomo iya blanga jadjim yu, bat ola wed weya yubin tok meigim yu jidan gilti.

7 “Yu reken yu na det feswan men hubin bon? Yu reken yubin jidan iya bifo detlot hil bin jidan deya? 8 Yu reken yubin irrim God tok blanga meigim ebrijing? Yu reken oni yu sabi det wei blanga God? 9 Yu reken yu sabi en andasten ebrijing wen melabat nomo sabi? 10 Melabat garram klebabala wed weya melabat gin dalim yu. Detlot wed bin jidan brom longtaim bifo ola dedimob.

11 “Wal God bin dalim yu im laigim yu detmatj en im fil sori blanga yu. Yu reken tharran im naf blanga yu? 12 Bat det filing blanga yu im go difrinwei, en im meigim yu luk brabli wailwan. 13 Yu oldei pudum bleim langa God en yu larram detlot wed kamat brom yu ronwan mawus. 14 Nomo eni pipul jidan brabli klinbala en raitwei. 15 Detlot einjulmob du, olabat nomo klinbala langa God. Wal if God nomo trastim im einjulmob, 16 wanim yu reken garra hepin langa wi? Wi oldei dumbat brabli nogudbala ting, en wi oldei lukabat blanga mowa nogudbala ting. ✡Job 25:4-6

17 “Job yu irrim langa mi na. Ai garra shoum yu wanim aibin lenim. 18 Ai sabi ol detlot klebawan wed brom wi grengrenfathamob en ola klebawan hubin jidan longtaim. 19 Detlot pipul hubin abum klebabala main bin jidan bos blanga ol detlot kantri du. Nomo najalot pipul bin titjimbat olabat.

20 “Ol detlot nogudbala pipul hu oldei faitfaitbat garra abum loda trabul langa olabat laif. 21 Wen olabat abum gudbala taim olabat gin stil irrim det nogudwan ting jinginatbat insaid langa olabat irriwol. 22 Ol detlot nogudbala pipul kaan neba kamat brom det dakbala, dumaji sambodi garra kilim olabat ded. 23 Olabat sabi det dakbala im kaminap, en detlot bigwan bard gulum boltja oldei weidabat blanga dagat detlot dedwan bodi. 24 Olabat brabli bradinbala wulijim det king hu brabli bradin wen im go blanga fait langa im enamimob. 25 Lagijat na, dumaji olabat oldei gibit bekboun langa God det brabli haibalawan, 26 en olabat bin faitfait langa im. 27 Olabat maitbi brabli ritjwan en brabli fetwan, 28 bat olabat garra ol jidan langa det rabishwan taun nomo garram eni pipul. 29 Ola enijing blanga olabat garra ol binijap. 30 Olabat kaan neba gowei brom det dakbala pleis. Olabat jis laik det tri wen det faiya bin barnimap en det win bin blowimwei detlot purdiflawa. 31-32 Olabat bin oldei trastimbat nogudbala ting. Wal olabat garra jidanbat nogudbala wulijim det pamtri weya go nogudbala wen im jidanbat nomo garram eni lif. 33 En olabat garra jidanbat wulijim det greiptri weya detlot rauwan frut daga oldei buldan langa graun, en laik det olibtri weya oldei lujimbat im purdiflawa. 34 Wal detlot pipul hu nomo bilib langa God en detlot pipul hu oldei gridi blanga olkain ting, olabat kemp garra ol barnbarn, 35 dumaji olabat na bin meigim detlot trabul en laiyinbala wed.” Lagijat na Elifas bin tok.