1 Wal Job bin tok, 2 “Tudei na ai garra lafta grambul langa God soribalawei, dumaji imbin dum brabli krulbala ting langa mi, en imbin meigim mi abum detmatj pein. 3 If aibin sabi weya ai gin faindim God wal ai garra lafta go deya, 4 en ai garra meigim main wed redibala en dalim im blanga ol main stori. 5 En ai garra faindat wanim im garra dalim mi. 6 Yumob reken im garra yusum ol im strongwan pawa langa mi? Najing! Im garra jis irrim wanim ai garra dalim im, 7 dumaji im sabi mi gudbala men, en im garra tok langa mi, ‘Ai garra larramgo yu fri’. 8 Ai kaan faindim God eniweya. Im nomo jidan sanraiswei, o sangodanwei, 9 o langa nowathwei o langa sauthwei. God im oldei dumbat wek, bat ai kaan faindim im. 10 Bat im sabi wanim mi oldei dumbat, en wen im garra testim mi ai garra jidan brabli klinbala insaid, wulijim det gol.

11-12 “Ai nomo bin tok ai kaan bulurrum eni lowa blanga im. Aibin oldei irrim en teiknodis langa ebri wed wen imbin oldei titjimbat langa mi. 13 Dumaji oni im na det wanbala God, en hu garra dalim im wanim im garra dum? God gin dum enijing im wandim dum, 14 en im gin dum wanim im rili wandim dum langa mi. 15-16 Enitaim ai jinggabat langa det boswan God, im na oldei meigim mi bradin en sheiksheikbat nomo lilbit. 17 God kipgon gaburrumapbat mi garram det dakbala, bat ai kaan jidan kwaitbala.”