1 Wal Elifas brom det taun gulum Teman bin tok langa Job, 2 “Wal wanim yu reken? Wi gin albumbat God? Najing. 3 If yu nomo bin dumbat eni nogudbala ting garram yu laif, wal tharran nomo bina min enijing langa det boswan God. ✡Job 35:6-8 4 Wal yu reken im oldei panishim yu wen yu oldei kipgon weshipbat im? Nomo. 5 Dumaji yu oldei bulurrumbat en dumbat ola nogudbala ting.

6 “Detlot powan pipul hu owim yu mani, yubin pulumat olabat klos raidap olabat bin peiyimbek yu det mani deibin owim yu. 7 En yu nomo bin gibitbat daga langa detlot pipul hubin oldei jidanbat hanggribala, en yu nomo bin gibit woda blanga dringgim wen deibin jidanbat thestibala. 8 Nomeda yubin abum detmatj pawa en yubin jidan brabli ritjwan, en olabat bin oldei rispek langa yu, 9 yubin jandimwei detlot widogel, en yubin gibit adtaim langa detlot biginini hu nomo garram mami en dedi. 10 Wal blanga tharran na loda trabul bin kaman langa yu kwikbala en yu bradin nomo lilbit na. 11 Yu bradin jis laik sambodi hu jidanbat langa brabli dakbala pleis en yu jis laik sambodi hu gulijap draun langa fladwoda.”

12 Wal Elifas bin kipgon tok, “God im jidan deya langa hebin ontop langa ola sta weya im gin luk ebrijing. 13 Yu reken det dakwan klaud gin haidim yu brom God? Najing. 14 Yu reken det brabli bigwan klaud gin gaburrumap langa im dubala ai wen im oldei wokwokbat ebriweya langa hebin deya ontop langa dijan wel? Najing.

15 “Job, yu gibap det olbalawei weya ola nogudbala pipul oldei dumbat. 16 Nobodi bin gibitbat olabat woning en deibin ol draun. 17-18 Olabat bin gibit bekboun langa det boswan God. Deibin reken im brabli wikwan, nomeda imbin brabli kain langa olabat femili. Bat ai kaan neba teiknodis langa olabat nogudbalawei en detlot nogudbala plen weya dei oldei meigimbat.

19 “Wen pipul blanga God luk detlot pipul hu nomo bilib langa im oldei git panishmen, olabat oldei jidan brabli gudbinji. 20 Olabat oldei tok, ‘Blanga wi enamimob olabat bin ol binij na, en det bigiswan faiya bin barnimap ola ebrijing blanga olabat.’ ”

21 Wal Elifas bin kipgon tok, “Job, yu gibit yu laif langa God wulijim yu garra jidan gudbalawei en brabli hepiwan. 22 Yu irrim wanim im oldei titjimbat langa yu, en yu garra pudum ol detlot wed insaid langa yu hat. 23 If yu kambek langa God en yu libum det nogudbalawei ebrijing garra jidan gudwei blanga yu. 24 Yu tjakidawei ol detlot gol en libum im jis laik im sengraun. 25 Yu meigim det boswan God jidan jis laik gol en silba blanga yu, 26 en yu garra jidan brabli hepiwan wen yu oldei weshipbat langa im. 27 En God garra ensim yu preya, en yu garra kipum det pramis weya yubin meigim garram im. 28 En im garra dum enijing yu garra askimbat im, en det laif blanga yu garra jidan gudwei. 29 Wen najalot pipul garra jidan sheimwan, en wen yu prei langa God blanga detlot pipul, im garra irrim yu preya en meigim olabat neim gudwan igin. 30 Detlot pipul hu jidan giltiwan, God garra larramgo olabat fri, dumaji yubin dum wanim imbin wandim yu blanga dum.” Lagijat na Elifas bin tok.