1 Wal Ilaihu bin kipgon tok, 2 “Yu reken yu brabli gud men blanga albumbat God? 3 Yu reken wen yu dum wanim God wandim yu blanga dum, im oldei gibit yu gudbala ting? 4 Wal ai garra ensim yu en yu frenmob na. 5-6 Yu trai luk deya langa det skai en detlot klaud en jinggabat det nogudbalawei blanga yu. Yu reken im ardimbat God? 7 Yu reken wen yu dum gudbala ting im meigim im gudbinji en album im? 8 Det nogudbalawei blanga yu im ardimbat pipul, bat im nomo ardimbat God en det gudbala ting yu dum album pipul bat im nomo albumbat God. ✡Job 22:2,3

9 “Wal wen enibodi abum trabul olabat jingat langa najalot strongbala pipul blanga album olabat. 10 Bat olabat nomo jingat langa God hubin meigim olabat. If dei bina jingat langa im wen olabat bin jidan langa dakbala pleis im bina kaman en ensim olabat, en olabat bina singsingbat gudbinjiwei langa im. 11 Nomeda imbin meigim olabat brabli klebawan, mowa klebawan langa ola enimul en bard, olabat nomo jingat langa im. 12 Bat stil God kaan irrim langa praudbala en nogudbala pipul wen dei prei. 13 If det boswan God jadimap im irriwol wen dei jingat langa im, 14 wal im kaan ensim yu, dumaji yu wandim deigim im langa kot. 15 Yubin rong wen yubin tok God nomo panishim olabat nogudbalawei. 16 Ebrijing yubin tok im rabishwan wed.”