1 Wal Ilaihu bin kipgon tok, 2 “Ol yumob men, yumob reken miselp klebabala, bat yumob irrim mi en yumob garra sabi wanim ai tok, im trubala, 3 jis laik wi teistim daga garram wi tang if im gudwan blanga dagat. 4 Wal wi garra tok gija blanga dijan trabul en gibit raitwan ensa. 5 Job reken im brabli gudbala men en imbin tok, ‘God nomo gibit mi feyago.’ 6 Im reken God oldei tok im laiyinbala, en im garram detmatj pein nomeda im nomo bin dum eni nogudbala ting. 7 Bat trubala, Job nomo garram eni sheim en im nomo garram eni rispek langa God. 8 Im oldei go garram ola nogudbala pipul, 9 dumaji imbin tok, ‘Nomeda if wi dum eni gudbala ting, blanga meigim God gudbinji, bat stil im nomo album wi. Najing.’ ”

10 Wal Ilaihu bin kipgon tok, “If yumob klebabala, yumob irrim en teiknodis. Det boswan God oldei dum wanim rait. 11 God oldei peiyimbek ebribodi blanga wanim olabat dumbat. ✡Saam 62:12 12 Det boswan God kaan dum eni nogudbala ting, dumaji im oldei gibit olabat feyago. 13 Brom longtaim God bin meigim ebrijing jidan gudwei, en im na bos langa dijan wel. 14 If God wandim deigimbek wi laif, 15 wal wi garra ol dai en wi ol garra gobek langa graun.

16 “If yu klebabala yu irrim mi wanim mi tok. 17 Det trubalawan God, oni im na gin gibit wi feyago, bat yu stil tok nogudbalawei blanga im. 18 Yuwai, God na gin panishim ola haibala bos hu jidan nogudwan en wikitwan. 19 God na bin meigim wi holot, en im nomo gibit feyago oni langa detlot boswan en ritj pipul. Im oldei gibit feyago langa ebribodi en detlot po pipul du. 20 Nomeda det boswan gin abum detmatj pawa, bat im garra stil dai naitaim wen im nomo redi blanga dai, jis laik ebribodi.”

21 Wal Ilaihu bin kipgon tok, “God oldei wotjimbat ebrijing wi oldei dumbat. 22-23 Nomo eni wikitwan pipul gin haidim miselp langa dakbala pleis brom God, dumaji nomo enibodi kaan dalim God wotaim im garra jadjim ebribodi. 24 God nomo askim enibodi, bat if im wandim im gin pudumat brabli haibala bos en pudum najalot langa olabat pleis. 25 Dumaji im sabi wotkain olabat, im binijimap olabat naitaim. 26 Sambala pipul wotjimbat wen im panishim detlot nogudbala pipul, 27 hu nomo irrim en teiknodis langa im. 28 Deibin tridimbat po pipul nogudbalawei en detlot po pipul bin oldei askimbat God blanga album olabat, en imbin irrim olabat en imbin album olabat. 29 Wen God nomo wandim blanga dum enijing, nobodi kaan faindim eni folt langa im. 30 Bat stil im panishim enibodi hu jidan boswan en oldei tridimbat ola pipul nogudbalawei.

31 “Wal Job, yu garra dalim God yubin dum nogudbala ting. 32 Yu askim im blanga shoum yu wanim yubin dum rong wulijim yu kaan dum tharran igin. 33 Yu reken yu meigim ola lowa o God meigim? Yu garra dalim mi wanim yu reken. Ai kaan dalim yu. Wal yu garra jinggabat wanim yu reken. 34-35 Wal enibodi garram gudbala main gin luk en sabi yu oldei tok rabishwei en yu nomo tok raitwei. 36 Wal ai garra lafta prei blanga yu, wulijim yu garra ardimbat detmatj, dumaji yu tok jis laik detlot nogudbala pipul. 37 Yu oldei gibit bekboun langa God ola taim, en rait iya garram melabat yubin oldei mokimbat im du.”