1 Afta na ola lida blanga ola femili blanga Libai klen bin kaman langa det serramonimen neim Eliyeisa en langa Joshuwa en ola najalot bos blanga detlot Isreil pipul, 2 en deibin tok langa olabat deya langa det taun gulum Shailo deya langa det kantri gulum Keinan, “Longtaim YAWEI det trubala God bin dalim Mosis blanga gibit melabat sambala taun weya melabat garra jidan, en imbin dalim Mosis blanga gibit melabat ola pedik raidaran langa detlot taun du blanga kipum ola enimul blanga melabat.” Lagijat na detlot Libai pipul bin tok,✡Nam 35:1-8 3 en ola Isreil pipul bin gibit olabat sambala taun en sambala pedik brom olabat ronwan kantri jis laik God bin dalim olabat blanga dum.

4 Wal ola femili blanga det serramonimen neim Eran bin gedim ola taun blanga olabat basdam. Deibin gedim 13 taun brom detlot kantri blanga detlot thribala klen gulum Juda, Simiyan en Benjamin. Det grengrenfatha blanga Eran bin neim Kohath, 5 en ola najalot femili blanga Kohath bin gedim 10 taun brom detlot kantri blanga detlot thribala klen gulum Ifreiyim, Den en Manesa.

6 En ola femili blanga det men neim Geshan bin gedim 13 taun brom detlot kantri blanga detlot fobala klen gulum Isaka, Esha, Neftali en Manesa.

7 En ola femili blanga det men neim Merarai bin gedim 12 taun brom detlot kantri blanga detlot thribala klen gulum Rubin, Ged en Sebyulan.

8 Wal Joshuwa en det serramonimen neim Eliyeisa bin tjakambat det dubala speshalwan ston blanga pikimat ol detlot taun na, en deibin gibit detlot taun garram ola pedik langa ol detlot femili blanga Libai klen jis laik YAWEI bin dalim olabat blanga dum.

9-10 Wal deibin gibit ola femili blanga Kohath hubin kamat brom det serramonimen neim Eran dislot taun na. 11-13 Deibin gibit olabat det taun gulum Aba o Hebran deya langa det hil kantri blanga Juda klen, en det taun bin speshalwan taun dumaji nobodi bin lau kilim enibodi deya. En deibin gibit olabat ola pedik raidaran langa det taun du. Bat det men neim Keilab bin gedim ola fam en najalot taun deya bifo det Libaimob. 14-16 Brom det kantri blanga Juda en Simiyan klen, deibin gibit olabat detlot nainbala taun gulum Libna, Jeitiya, Eshtamowa, Holan, Debiya, Eiyin, Jata en Bethshemesh garram ola pedik. 17 En brom det kantri blanga Benjamin klen deibin gibit olabat detlot fobala taun gulum Gibiyan, Geba, 18 Einathoth en Elman garram ola pedik. 19 Deibin gibit detlot 13 taun na garram ola pedik langa ola serramonimen femili hubin kamat brom det men neim Eran.

20 Wal deibin gibit ola najalot femili blanga Kohath dislot taun na. 21-22 Brom det kantri blanga Ifreiyim klen deibin gibit olabat detlot fobala taun gulum Gisa, Kibsaiyim, Betharan en Shekam garram ola pedik. Shekam bin deya langa det hil kantri, en imbin speshalwan taun dumaji nobodi bin lau kilim enibodi deya. 23 En brom det kantri blanga det klen blanga Den deibin gibit olabat detlot fobala taun gulum Eltekei, Gibathan, 24 Ejalan en Geriman garram ola pedik. 25 En brom det kantri blanga Manesa klen deibin gibit olabat det dubala taun gulum Tanak en Geriman garram ola pedik. 26 Deibin gibit detlot 10 taun na garram ola pedik langa ola najalot femili blanga Kohath.

27 Wal deibin gibit ola femili blanga Geshan dislot taun na. Brom det kantri blanga Manesa klen deibin gibit olabat det dubala taun gulum Bishtara en Golan garram ola pedik. Golan bin deya langa det kantri gulum Beishan, en imbin speshalwan taun dumaji nobodi bin lau kilim enibodi deya. 28 En brom det kantri blanga Isaka klen deibin gibit olabat detlot fobala taun gulum Kishiyan, Daberath, 29 Jamath en Enganim garram ola pedik. 30 En brom det kantri blanga Esha klen deibin gibit olabat detlot fobala taun gulum Mishal, Abdan, 31 Helkath en Reiyob garram ola pedik. 32 En brom det kantri blanga Neftali klen deibin gibit olabat detlot thribala taun gulum Heimodowa, Katan en Kedish garram ola pedik. Kedish bin deya langa det kantri gulum Gelali, en imbin speshalwan taun dumaji nobodi bin lau kilim enibodi deya. 33 Deibin gibit detlot 13 taun na garram ola pedik langa ola femili blanga Geshan.

34 Wal deibin gibit ola femili blanga Merarai dislot taun na. Brom det kantri blanga Sebyulan klen deibin gibit olabat detlot fobala taun gulum Jokniyam, Kata, 35 Dimna en Neihalal garram ola pedik. 36 En brom det kantri blanga Rubin klen deibin gibit olabat detlot fobala taun gulum Besa, Jeihas, 37 Kedemoth en Mefath garram ola pedik. 38-39 En brom det kantri blanga Ged klen deibin gibit olabat detlot fobala taun gulum Mahanaiyim, Heshban, Jeisa en Remoth garram ola pedik. Remoth bin deya langa det kantri gulum Giliyad, en imbin speshalwan taun dumaji nobodi bin lau kilim enibodi deya. 40 Deibin gibit detlot 12 taun na garram ola pedik langa ola femili blanga Merarai.

41 Lagijat na ola femili blanga Libai klen bin gedim sambala taun blanga jidan. Ola Isreil pipul bin gibit olabat 48 taun brom olabat ronwan kantri, 42 en deibin gibit olabat ola pedik raidaran langa ol detlot taun du.

43 Wal YAWEI bin gibit det kantri langa ola Isreil pipul jis laik imbin pramis langa ola grengrenfatha blanga olabat basdam, en wen detlot Isreil pipul bin teikoba det kantri, deibin abum det kantri blanga olabat na.

44 Longtaim YAWEI bin meigim pramis langa ola grengrenfatha blanga detlot Isreil pipul. Imbin pramis blanga meigim olabat jidan langa det kantri gudbalawei. En imbin kipum det pramis, en imbin meigim olabat win langa ola enami blanga olabat. Nomo enibodi langa eni kantri bin bidim olabat. 45 Ebrijing weya YAWEI bin pramis langa olabat, imbin duwit.