1 Afta na wen Jisas bin binij dalimbat ol detlot wed langa detlot pipul, imbin go langa det taun gulum Kapeniyam.

2 Wal wan boswan solja brom Rom bin jidan deya langa det taun, en wanbala wekinmen blanga im bin brabli sik en imbin gulijap dai.

Wal det boswan solja bin laigim det wekinmen blanga im brabliwei, 3 en wen imbin irrim Jisas bin deya langa det taun, imbin jandim sambala olmen brom detlot Juwish pipul langa Jisas blanga askim im blanga kaman en meigim det wekinmen blanga im gudbala.

4 Wal detlot olmen bin go langa Jisas, en deibin askimbat im soribalawei, “Yu garra album det men, dumaji imbin dum loda gudbala ting, 5 en im laigim ola pipul langa dijan kantri, en im na bin bildimap det Juwish Miting Pleis blanga melabat.”

6 Wal Jisas bin go garram olabat, en wen imbin gulijap langa det haus blanga det boswan solja, det boswan solja bin jandim sambala fren blanga im blanga dalim Jisas nomo blanga kaman langa im haus, en wen deibin kamat langa Jisas, deibin tok, “Det boswan solja bin tok, ‘Im rait, bos. Yu kaan kaman langa main haus, 7 en ai kaan kaman langa yu du, dumaji mi nomo gudbala. Yu jis tok brom deya gin, en det wekinmen main garra gitbeda. 8 Ai sabi yu bos, dumaji mi bos du. Ai garram sambala boswan solja oba langa mi, en mi bos oba langa sambala solja du. En ai dalim wanbala solja blanga go, en im garra go. En ai dalim najawan solja blanga kaman, en im garra kaman. En ai dalim det wekinmen main blanga dum samting, en im garra duwit.’ Lagijat na det boswan solja bin tok.”

Wal det boswan solja bin tok lagijat langa Jisas, dumaji imbin sabi Jisas im bos, en imbin sabi im garram pawa.

9 Wal wen Jisas bin irrim det wed, imbin hatjamp, en imbin dalim detlot pipul hubin bulurrum im. Imbin tok, “Trubala ai dalim yumob. Ai nomo bin faindim enibodi hu bilib lagijat. Nomo enibodi iya langa dijan kantri Isreil bilib lagijat.”

10 Afta na ol detlot fren blanga det boswan solja bin gobek langa im haus, en deibin faindim det wekinmen blanga det boswan solja bin gudbala.

11 Brom deya Jisas bin go garram ola wekinmen blanga im langa det taun gulum Nein, en bigmob pipul bin bulurrum im deya, 12 en wen imbin kamat langa det taun, imbin luk deibin abum fyunral deya blanga wan widogel san. Oni det wanbala san na det widogel bin abum, en loda pipul brom det taun bin deya langa det fyunral.

13 Wal wen Jisas bin luk det widogel, imbin fil sori blanga im, en imbin dalim im, “Yu nomo krai.” 14 En imbin go en tatjim det stretja garram det bodi, en ol detlot men hubin garrimap det stretja bin stap, en Jisas bin tok, “Yangmen, ai dalim yu. Gidap!”

15 En det dedbala men bin gidap, en imbin stat toktok, en Jisas bin deigim im langa im mami.

16 Wal ebribodi bin ol hatjamp, en seimtaim deibin preisimbat God. Deibin tok, “Brabli haiwan mesinja brom God bin kamat iya langa wi! God bin kaman blanga seibum ola pipul blanga im!”

17 Wal det nyus blanga Jisas bin spredat ebriweya langa det kantri en ebriweya langa ola najalot kantri du.

18 Bambai na ola wekinmen blanga Jon Beptis bin dalim Jon det nyus blanga Jisas, 19 en afta imbin jandim dubala wekinmen blanga im langa Jisas blanga askim im kwestjan, 20 en wen dubala bin kaman langa Jisas, dubala bin tok, “Jon Beptis bin jandim minbala blanga askim yu kwestjan. Yu na det Speshalwan Men weya Jon bin tok garra kaman? O maitbi melabat garra weit blanga najawan men?”

21 Wal wen det dubala wekinmen blanga Jon bin deya kwestjanimbat im, Jisas bin meigimbat loda sikbala pipul gudbala, en imbin andimwei loda nogudbala spirit brom insaid langa sambala pipul, en imbin meigimbat loda blainwan pipul luk gudwei.

22 Afta na Jisas bin dalim det dubala wekinmen, “Yunbala gobek en dalim Jon wanim yunbala bin luk en wanim yunbala bin lisin. Yunbala dalim im ol detlot blainwan pipul gin luk na, en ol detlot leimbala pipul gin wok na, en detlot pipul hubin abum leprasi olabat gudbala na, en ola defwan pipul gin lisin na, en detlot dedbala pipul bin gidap laibala na, en ol detlot po pipul bin lisin det gudnyus blanga God.✡Aisai 35:5,6; 61:1 23 Ebribodi hu bilib langa mi brabliwei garra jidan brabli gudbinjiwei.” Lagijat na Jisas bin tok langa det dubala wekinmen blanga Jon.

24 Wal det dubala wekinmen bin gobek langa Jon, en afta Jisas bin stat toktok langa ol detlot pipul deya blanga Jon. Imbin tok, “Wen yumob bin go langa Jon Beptis deya langa det bush kantri, wanim yumob bin reken yumob garra luk? Yumob bin reken yumob garra go en faindim oni gras deya? 25 Wanim yumob bin wandi luk? Yumob bin wandi luk men dresap garram purdiwan klos? Yumob kaan faindim detkain men hu dresap garram purdiwan klos langa bush kantri. Yumob faindim detkain men langa taun langa gudwan haus.

26 “Wal yumob dalim mi na. Wanim yumob bin go blanga luk? Yumob bin wandi go en luk det speshalwan mesinja brom God? Trubala yumob bin luk mesinja. Bat im nomo bin odinriwan mesinja. 27 Langa oltestaman God bin tok, ‘Ai garra jandim main mesinja lida langa det boswan blanga meigim det roud redibala blanga im.’ En wen im tok lagijat langa oltestaman, im tok blanga Jon Beptis.✡Mel 3:1 28 En ai dalim yumob. Jon im haibala langa ola pipul hubin bulurrum det olbala lowa blanga God. Bat ol detlot pipul hu irrim main wed en bulurrum det Nyubalawei garra jidan brabli haibala.” Lagijat na Jisas bin tok.

29 Wal ola pipul bin lisin langa Jisas wen imbin tok lagijat, en ol detlot lobala pipul en ol detlot nogudbala pipul bin sabi imbin tok trubalawei, dumaji deibin duwit wanim God bin tok, en Jon bin beptaisim olabat. 30 Bat detlot haibala lowamen en serramonimen gulum Ferasi nomo bin teiknodis langa wanim God bin wandim, en dei nomo bin larram Jon beptaisim olabat.✡Meth 21:32; Luk 3:12

31 Wal Jisas bin kipgon tok langa ol detlot pipul, “Hau ai garra tok blanga ola pipul iya langa dijan kantri? 32 Ai dalim yumob. Olabat jis laik ola biginini olabat weya dei pleibat. Dei jingat, ‘Melabat bin pleiyim det song blanga weding blanga yumob, bat yumob nomo bin gudbinji, en yumob nomo bin dens blanga melabat. En melabat bin singim det song blanga fyunral blanga yumob. Bat yumob nomo bin krai blanga melabat.’ Lagijat na detlot biginini oldei jingat, dumaji dei kaan sedisfaid langa enijing.

“En ola pipul iya langa dijan kantri olabat lagijat du. Dei kaan sedisfaid langa enijing. 33 Jon Beptis bin kaman, en im nomo bin dagadagat daga, en im nomo bin dringgimbat det wain. En pipul bin tok, ‘Yu luk det men. Im garram dibuldibul insaid langa im.’

34 “Afta na aibin kaman biyain langa Jon Beptis, en aibin dagadagat daga, en aibin dringgimbat det wain. En pipul bin tok, ‘Yu luk det men. Im oldei dagadagat daga en dringgimbat det wain, en im fren blanga ola nogudbala pipul.’

35 “Wal ola pipul hu tok lagijat nomo sabi brabliwei. Bat ol detlot pipul hu bilib langa God sabi im klebabala, en dei sabi det wei blanga God im trubala.” Lagijat na Jisas bin tok.

36 Afta na wan serramonimen neim Saiman bin askim Jisas blanga abum sapa garram im, en imbin go langa im kemp, en dubala bin jidan blanga dagat daga.

37 Wal wan brabli nogudbala gel deya langa det taun bin irrim Jisas bin abum sapa deya langa det serramonimen kemp, en imbin go deya garram lilwan ston botul garram det gudsmelwan medisin, 38 en imbin go en jandap biyain langa Jisas langa im futwei, en imbin krai en wetim im dubala fut garram im tiyas, en afta imbin draiyim det dubala fut blanga Jisas garram im heya, en imbin kis langa im dubala fut, en imbin rabum dubala garram det gudsmelwan medisin.✡Meth 26:7; Mak 14:3; Jon 12:3

39 Wal det serramonimen bin luk wanim det gel bin dum langa Jisas, en imbin tok miselp, “If dijan men im trubala det speshalwan mesinja brom God, wal im bina sabi wotkain det gel weya im tatjimbat im. Im bina sabi det gel im brabli nogudbala.”

40 Wal Jisas bin tok langa det serramonimen na, “Saiman, ai garra dalim yu samting.”

En det serramonimen bin tok, “Wanim yu wandi dalim mi, titja?”

41 Wal Jisas bin tok, “Dubala men bin boro mani brom wan ritjmen. Det wan men bin boro 500 en det najawan men bin boro 50, 42 en wen det taim bin kaman blanga peiyimbek det mani, det dubala men nomo bin abum det mani blanga peiyimbek det ritjmen, en det ritjmen bin dalim det dubala blanga fogedabat det mani, en imbin larramgo dubala fri.

“Wal wanim yu reken, Saiman? Wujan men garra laigim det ritjmen brabli?”

43 Wal det serramonimen bin tok, “Det men hubin owim im mowa mani garra laigim im brabli, dumaji imbin larramgo im fri wen imbin owim im bigmob mani.”

En Jisas bin tok, “Gudwan ensa yubin gibit mi.”

44 Afta na Jisas bin luk langa det gel, en imbin tok langa det serramonimen, “Yu luk dijan gel iya, Saiman? Wen aibin kaman iya langa yu kemp, yu nomo bin gibit mi eni woda blanga washim main fut. Bat dijan gel bin washim main fut garram im tiyas, en imbin draiyimbat main fut garram im heya.

45 “Saiman, yu nomo bin welkam mi garram kis. Bat dijan gel im kipgon kiskis main fut. 46 En yu nomo bin gibit mi det speshalwan medisin blanga rabum main hed. Bat dijan gel bin rabum main fut ebriweya garram det gudsmelwan medisin.

47 “Wal ai dalim yu, Saiman. If enibodi larramgo sambodi fri brom lilwan rong ting weya imbin dum langa im, wal im garra laigim im lilbit. Bat if im larramgo im fri brom eni bigwan rong ting weya imbin dum langa im, wal im garra laigim im brabliwei.

“Yu sabi? Ol dislot ting weya dijan gel bin dum langa mi, dei shoum yu im laigim mi brabli, dumaji God bin larramgo im fri brom ol detlot nogudbalawei blanga im.”

48 Wal Jisas bin tok langa det gel na, “Yu fri brom ol detlot nogudbalawei blanga yu.”

49 Wal ol detlot najalot pipul hubin jidan deya langa det kemp bin irrim Jisas tok lagijat, en deibin toktok miselp, “Wotkain men dijan weya im tok im larramgo det gel fri brom ol detlot nogudbala ting weya imbin dumbat?”

50 Wal Jisas bin dalim det gel, “God bin seibum yu, dumaji yu bilib langa main wed. Wal yu go na, dumaji yu fri.”