3
Jon bin beptaisimbat pipul
Methyu 3:1-12; Mak 1:1-8; Jon 1:19-28
1 Bambai na det rait taim bin kaman. Det men neim Taibiriyas bin jidan king 15 yiya, en Panshas Pailat bin jidan bos blanga Judiya, en Herod bin jidan bos blanga Gelali, en im braja Filip bin jidan bos blanga det dubala kantri gulum Ituriya en Trakonaitas, en Lisaniyas bin jidan bos blanga det kantri gulum Ebalin, 2 en det dubala men neim Enas en Kaiyafas bin jidan boswan haibala serramonimen langa Jerusalem.
Wal det taim na wen ol detlot men na bin jidan bos, God bin tok langa det san blanga Sekaraiya neim Jon deya langa det bush kantri, 3 en Jon bin go rait thru langa ol detlot kantri wansaid langa det Jodan Riba, en imbin dalimbat det gudnyus langa ebribodi. Imbin oldei tok, “Yu garra libum det nogudbalawei blanga yu, en yu garra beptais, en God garra larramgo yu fri brom ol detlot nogudbala ting weya yubin oldei dumbat.”
4 Wal Jon bin dum lagijat dumaji longtaim wan speshalwan mesinja blanga God bin raidimdan langa oltestaman wanim God bin tok. Det mesinja bin neim Aisaiya, en imbin tok,
“Sambodi deya im jinginatbat langa deset kantri.
Im dalimbat ola pipul blanga meigim det roud redibala blanga det Boswan,
en im dalimbat olabat blanga streitinimat det wei blanga det Boswan wulijim im garra kaman langa olabat.
5 Dei garra meigim det roud redi blanga det Boswan blanga kaman.
Dei garra lebulum ola hil en bilimap ola beli,
en dei garra meigim det krukidwan roud jidan streitwan en det rafwan roud jidan gudbala.
6 En ebribodi garra luk det Boswan weya God garra jandim blanga seibum olabat.”
Lagijat na Aisaiya bin tok. En det wed bin tok blanga Jon Beptis weya imbin dalimbat ola pipul blanga libum olabat nogudbalawei.✡Aisai 40:3-5
7 Wal bigmob pipul bin kaman langa Jon blanga beptais. En imbin dalim olabat, “Yumob kaninbala! Hubin dalim yumob blanga ranawei wulijim God kaan panishim yumob garram ola najalot pipul weya im garra panishim dregli?✡Meth 12:34; 23:33 8 Yumob kaan bogi langa riba en meigim miselp gudwan. Yumob garra shoum detlot gudwan ebrijing langa ola pipul wulijim dei gin sabi yumob bin tenim miselp brom det nogudbalawei. Maitbi yumob reken God kaan panishimbat yumob, dumaji yumob grengrensan blanga Eibrahem. Bat yumob rong.
“Ai dalim yumob. God gin binijimap ola pipul, en im gin gajim dislot ston iya en meigim nyuwan grengrensan blanga Eibrahem!✡Jon 8:33 9 Ai sabi yumob. Yumob jis laiga nogudwan tri. Bat God garram det tomiyauk redibala blanga kadimdan ola nogudwan tri weya nomo meigim gudbala daga, en im garra rudimat detlot tri en tjakidawei olabat en barnimap olabat langa faiya.” Lagijat na Jon bin tok.✡Meth 7:19
10 Wal ola pipul bin askimbat Jon, “Wanim wi garra dum?”
11 En Jon bin tok, “If yu garram dubala shet, wal yu garra gibit wanbala langa det men weya nomo garram enijing. En if yu garram daga, wal yu garra gibit langa detlot pipul hu nomo garram enijing.”
12 Sambala wekinmen blanga det gabman bin kaman langa Jon blanga beptais, en deibin askim im, “Titja, wanim melabat garra dum?”✡Luk 7:29
13 En Jon bin tok, “Yu gin gajimbat det teks mani weya det gabman bin dalim yu. Bat yu nomo lau meigimbat yu ron prais blanga gajimbat mani blanga yu ronselp.”
14 Sambala solja bin kaman langa Jon du, en deibin bin askim im, “Wanim melabat garra dum?”
En Jon bin tok, “Yu kaan fosim enibodi blanga gibit yu mani, en yu kaan dalimbat laiya blanga gedim mowa mani, en wen yu gedim yu pei brom det gabman, yu garra sedisfaid.”
15 Wal ola pipul bin jinggabat na, en deibin tok gija, “Maitbi dijan men na det Boswan gulum Masaiya. Maitbi im na Krais.”
16 Bat Jon bin tok, “Nomo. Mi nomo det Boswan weya garra kaman. Det Boswan im mowa haibala langa mi. Mi lobala langa im, en mi nomo gudinaf blanga dum enijing blanga im. Ai beptaisim pipul garram woda. Bat im garra beptaisim pipul garram det Holi Spirit, en im garra panishim pipul garram faiya du. 17 Det Boswan im redi blanga kaman jis laiga fama wen im kadimat ola gudwan daga brom det nogudwan pat. Im garra hipimap ola gudwan daga, en im garra barnimap ola nogudwan pat deya langa det olagijawan faiya.” Lagijat na Jon bin tok.
18-20 Wal olkainwei Jon bin dalimbat ola pipul det gudnyus, en imbin trai blanga meigim olabat libum detlot nogudbalawei, en imbin beptaisim olabat du.✡Meth 14:3,4; Mak 6:17,18*Det stori blanga Herod langa bes 19, 20 im jidan afta det stori weya Jon bin beptaisim Jisas langa bes 21, 22.
Jon bin beptaisim Jisas
Methyu 3:13-17; Mak 1:9-11
21 Afta na wen Jon bin beptaisim ola pipul, imbin beptaisim Jisas, en Jisas bin prei, en det skai bin opinap, 22 en det Holi Spirit bin kamdan langa im jis laiga bard, en God bin tok brom hebin, “Yu na main ronwan san. Mi laigim yu, en mi brabli gudbinji blanga yu.”✡Jen 22:2; Saam 2:7; Aisai 42:1; Meth 3:17; Mak 1:11; Luk 9:35
Wal Jon bin oldei dalimbat ola pipul blanga libum detlot nogudbalawei blanga olabat, en imbin dalimof det gabman bos neim Herod du. Imbin dalimof im streidat, dumaji Herod bin merrit langa Herodiyas det waif blanga im ronwan braja Filip, en imbin oldei dumbat olkain nogudbala ting du. En wen Jon bin dalimof im, Herod bin dum brabli nogudbala ting. Imbin pudum Jon langa jeil.
Femili lain blanga Jisas
Methyu 1:1-17
23 Afta na wen Jisas bin beptais, imbin stat dumbat det speshalwan wek blanga im. Imbin 30 yiya ol wen imbin stat dumbat det wek, en deibin reken imbin san blanga Josef.
Wal Josef bin san blanga Hilai,
24 en Hilai bin san blanga Methat,
en Methat bin san blanga Libai,
en Libai bin san blanga Melkai,
en Melkai bin san blanga Jeinai,
en Jeinai bin san blanga Josef,
25 en Josef bin san blanga Metathaiyas,
en Metathaiyas bin san blanga Eimos,
en Eimos bin san blanga Neiham,
en Neiham bin san blanga Eslai,
en Eslai bin san blanga Negai,
26 en Negai bin san blanga Meiyath,
en Meiyath bin san blanga Metathaiyas,
en Metathaiyas bin san blanga Simiyan,
en Simiyan bin san blanga Josek,
en Josek bin san blanga Joda,
27 en Joda bin san blanga Jowenan,
en Jowenan bin san blanga Risa,
en Risa bin san blanga Serababal,
en Serababal bin san blanga Shiyaltiyel,
en Shiyaltiyel bin san blanga Nerai,
28 en Nerai bin san blanga Melkai,
en Melkai bin san blanga Edai,
en Edai bin san blanga Kosam,
en Kosam bin san blanga Elmadam,
en Elmadam bin san blanga Yura,
29 en Yura bin san blanga Joshuwa,
en Joshuwa bin san blanga Eliyeisa,
en Eliyeisa bin san blanga Jorim,
en Jorim bin san blanga Methat,
en Methat bin san blanga Libai,
30 en Libai bin san blanga Simiyan,
en Simiyan bin san blanga Juda,
en Juda bin san blanga Josef,
en Josef bin san blanga Jonam,
en Jonam bin san blanga Eliyakim,
31 en Eliyakim bin san blanga Meliya,
en Meliya bin san blanga Mena,
en Mena bin san blanga Metatha,
en Metatha bin san blanga Neithan,
en Neithan bin san blanga Deibid,
32 en Deibid bin san blanga Jesi,
en Jesi bin san blanga Obed,
en Obed bin san blanga Bowes,
en Bowes bin san blanga Selman,
en Selman bin san blanga Neishan,
33 en Neishan bin san blanga Aminadeb,
en Aminadeb bin san blanga Edmin,
en Edmin bin san blanga Anai,
en Anai bin san blanga Hesran,
en Hesran bin san blanga Peres,
en Peres bin san blanga Juda,
34 en Juda bin san blanga Jeikob,
en Jeikob bin san blanga Aisik,
en Aisik bin san blanga Eibrahem,
en Eibrahem bin san blanga Tera,
en Tera bin san blanga Neihowa,
35 en Neihowa bin san blanga Serug,
en Serug bin san blanga Riyu,
en Riyu bin san blanga Peleg,
en Peleg bin san blanga Iba,
en Iba bin san blanga Shela,
36 en Shela bin san blanga Keinan,
en Keinan bin san blanga Apekshed,
en Apekshed bin san blanga Shem,
en Shem bin san blanga Nowa,
en Nowa bin san blanga Leimek,
37 en Leimek bin san blanga Mathusala,
en Mathusala bin san blanga Inak,
en Inak bin san blanga Jered,
en Jered bin san blanga Mahalalel,
en Mahalalel bin san blanga Kenan,
38 en Kenan bin san blanga Inash,
en Inash bin san blanga Seth,
en Seth bin san blanga Edam,
en Edam bin san blanga God.
✡3:18-20 Meth 14:3,4; Mak 6:17,18
*3:18-20 Det stori blanga Herod langa bes 19, 20 im jidan afta det stori weya Jon bin beptaisim Jisas langa bes 21, 22.
✡3:22 Jen 22:2; Saam 2:7; Aisai 42:1; Meth 3:17; Mak 1:11; Luk 9:35