Niyamaiya
Detlot Juwish Pipul Bin Bildimbek Det Wol Blanga Jerusalem
Wal dijan stori im blanga ola Juwish pipul wen deibin gobek langa Jerusalem brom det kantri gulum Bebalon. Wen Niyamaiya bin kaman langa Jerusalem deibin bildimbek ola wol en geit blanga Jerusalem, en bambai wen olabat bin binij deibin abum det serramoni blanga meigim olabat seikridwan blanga God. Wal Esra det serramonimen bin ridimat ola lowa blanga God, en ola pipul bin sori blanga olabat nogudbalawei. Niyamaiya bin trastimbat God brabliwei en imbin jidan bos blanga ola Juda pipul.
1
Nyus blanga Jerusalem
1 Wal dijan na wanim Niyamaiya det san blanga Hekalaiya bin dum.
Wal langa det manth gulum Kisleb, langa det namba 20 yiya weya Ataseksis bin jidan king blanga det kantri gulum Pesha, mi na, Niyamaiya, bin jidan langa det taun gulum Susa. 2 Wal wanbala braja main neim Henanai, bin kaman brom Juda garram sambala men, en aibin askim olabat blanga det taun Jerusalem en blanga detlot Juwish kantrimen hu detlot Bebalon pipul bin deigimwei langa olabat ronwan kantri, bat hubin gobek langa Jerusalem basdam. 3 Deibin dalim mi detlot pipul hubin gobek langa olabat ronwan kantri bin abumbat trabul, en ola najalot pipul brom ola gulijap kantri bin rabishim olabat en meigim olabat fil sheim. En deibin dalim mi dei nomo bin bildimap det wol blanga Jerusalem en dei nomo bin pudumbek detlot geit brom det taim wen det faiya bin binijimap det taun.
Niyamaiya bin prei
4 Wal wen aibin irrim det wed, aibin krai. Aibin kraikraibat blanga sambala dei en ai nomo bin dagat daga blanga shoum aibin nogudbinji. En aibin prei langa God, 5 “YAWEI det trubala God langa hebin, yu haibala, en melabat rispek langa yu. Trubalawei yu kipum yu brabli strongbala pramis langa detlot hu laigim yu en dum wanim yu tok. 6 Yu luk langa mi brabli haibala bos, en irrim main preya wen mi prei deitaim en naitaim blanga yu wekinmen olabat, ola Isreil pipul. Ai tok blanga melabat ola Isreil pipul. Melabat bin dum nogudbala ting. Main grengrenfatha olabat en mi du bin dum nogudbala ting. 7 Melabat bin dum brabli nogudbala ting wen melabat nomo bin duwit wanim yubin tok. Melabat nomo bin duwit langa detlot lowa weya yubin gibit melabat thru langa Mosis, det wekinmen blanga yu. 8 Jinggabat na wanim yubin dalim Mosis. Yubin tok, ‘If yumob Isreil pipul nomo jidan trubala langa mi, ai garra jandimwei yumob langa najalot pipul.✡ Labid 26:33 9 Bat afta, if yumob kambek langa mi en bulurrum mi en dum wanim aibin dalim yumob, ai garra bringimbek yumob langa det pleis weya aibin pikimat blanga yumob blanga weship mi, nomeda weya yumob jidan.’✡ Dyud 30:1-5 10 Brabli haibala bos, dislot pipul wekinmen blanga yu, en olabat yu ronwan pipul. Yubin seibum olabat garram yu strongwan pawa. 11 Irrim main preya en irrim detlot preya blanga ol yu najalot wekinmen olabat hu wandi weship yu gudbinjiwei. En album mi tudei wulijim det king garra irrim mi wen mi dalim im blanga main pipul, en im garra kain langa mi en im garra larram mi album olabat.” Lagijat na aibin prei.
Wal langa det taim na aibin jidan det men hubin oldei gibit det wain langa det king.