7
1 Wal wen deibin fiksimap det wol igin, detlot pipul bin pudumap ola geit langa detlot geitwei na. Detlot lidamob bin pikimat sambala pipul blanga wotjim ola geit en deibin pikimat sambala brom detlot singamob en sambala brom detlot Libai pipul blanga dum olabat ron wek. 2 Aibin pudum dubala men blanga jidan bos blanga Jerusalem. Wanbala bin main braja Henanai en det najawan bin Henanaiya, det boswan solja blanga det brabli strongwan haus. Henanaiya bin jidan trubalawei en imbin rispek God. Nobodi mowa bin jidan laik im. 3 Aibin dalim det dubala men, “Nobodi kaan opinim detlot geit blanga Jerusalem raidap det san im go hot, en oni detlot solja garra opinim. En dei garra jadimap detlot geit, en dei garra lokimap garram ba bifo dei binij wek sangodantaim. Yunbala garra pikimat men brom detlot pipul hu jidan langa Jerusalem blanga wotjimbat dijan taun. Sambala garra wotjimbat detlot pleis gulijap langa olabat kemp en sambala garra wotjimbat detlot najalot pleis blanga dijan taun.” Lagijat na aibin tok.
Detlot pipul hubin kambek brom Bebalon
Esra 2:1-70
4 Wal Jerusalem bin bigwan taun bat oni lilbit pipul bin jidan deya en deibin bildim oni lilbit haus blanga olabat. 5 Wal God bin dalim mi insaid langa main hat blanga majurrumap ola pipul en ola lidamob blanga luk ola peipa weya deibin raidimdan ola neim blanga ola femili longtaim. En dijan na detlot peipa weya aibin faindim, en weya deibin raidimdan ola neim blanga ola pipul hubin kambek basdam brom det kantri gulum Bebalon weya olabat bin jidan prisana.
6 Wal loda pipul bin gobek langa Jerusalem en Juda, en deibin gobek langa olabat ronwan taun. Ola femili blanga olabat bin jidan prisana langa det kantri gulum Bebalon brom det taim wen King Nebakanesa bin deigim olabat deya. 7 Detlot boswan bin Serababal, Joshuwa, Niyamaiya, Esaraiya, Reiyamiya, Neihamani, Modakai, Bilshan, Mispereth, Bigbai, Niyam en Beina.
8-25 Dijan na ola neim blanga ola femili blanga ola Isreil pipul, garram detlot namba blanga detlot pipul hubin kambek brom Bebalon.
Det femili blanga Parosh bin 2,172,
det femili blanga Shefataiya bin 372,
det femili blanga Era bin 652,
det femili blanga Pahathmoweb, brom det femili blanga Jeshuwa en Jowab bin 2,818,
det femili blanga Elam bin 1,254,
det femili blanga Satu bin 845,
det femili blanga Sekai bin 760,
det femili blanga Binuwai bin 648,
det femili blanga Bebai bin 628,
det femili blanga Esgad bin 2,322,
det femili blanga Edanikam bin 667,
det femili blanga Bigbai bin 2,067,
det femili blanga Edin bin 655,
det femili blanga Eite weya deibin gulum Hesakaiya bin 98,
det femili blanga Hasham bin 328,
det femili blanga Besai bin 324,
det femili blanga Herif bin 112,
en det femili blanga Gibiyan bin 95.
26-38 Detlot pipul weya olabat grengrenfatha olabat bin jidan langa dislot taun bin kambek du.
Brom Bethlahem en Netofa deya bin 188,
brom Einathoth 128,
brom Bethamabeth 42,
brom Kiriyajerim, Kefara en Biroth 743,
brom Rema en Geba 621,
brom Mikmesh 122,
brom Bethel en Ai 123,
brom najawan Neibo 52,
brom najawan Elam 1,254,
brom Herim 320,
brom Jeriko 345,
brom Lod, Heidid en Ono 721,
en brom Sena 3,930.
39-42 Dijan na ola neim blanga ola femili blanga ola serramonimen hubin kambek brom det kantri weya deibin jidan prisana.
Det femili blanga Jedaiya bin 973 en olabat bin kamat brom det femili lain blanga Jeshuwa,
det femili blanga Ime bin 1,052,
det femili blanga Pashura bin 1, 247,
en det femili blanga Herim bin 1,017.
43-45 Dijan na ola femili blanga det Libai klen hubin kambek brom det kantri weya deibin jidan prisana.
Det femili blanga Jeshuwa en Kedmiyel bin 74, en det dubala bin grensan blanga Hodabaiya.
Detlot pipul hubin oldei sing en plei myusik langa Serramoni Pleis bin 148 en olabat bin ola grensan blanga Eisaf.
Detlot blijiman blanga det Serramoni Pleis bin 138 en olabat bin grensan blanga Shalum, Ete, Talman, Eikab, Hetita en Shobai.
46-56 Detlot femili blanga detlot wekinmen blanga det Serramoni Pleis hubin kambek brom det kantri weya deibin jidan prisana bin
Siha, Hesafa, Tebayoth,
Keros, Siya, Padon,
Lebana, Heigaba, Shalmai,
Henan, Gidel, Geiha,
Riyaiya, Resin, Nekoda,
Gasam, Yusa, Paseya,
Besai, Meyunim, Nefushesim,
Bekbak, Heikafa, Hehura,
Beslith, Mehida, Hasha,
Bakos, Sisera, Tema,
Nesai en Hetafa.
57-59 Detlot femili blanga ola wekinmen blanga Salaman hubin kambek brom det kantri weya deibin jidan prisana bin
Sotai, Sofareth, Perida,
Jala, Dakan, Gidel,
Shefataiya, Hetil,
Pokerethasebaiyim en Eman.
60 Wal naja 392 pipul bin kambek. Deibin ola biginini hubin kaman bambai brom detlot wekinmen blanga det Serramoni Pleis en brom detlot wekinmen blanga Salaman.
61-62 Detlot 642 pipul hubin brom detlot femili blanga Dalaiya, Tobaiya en Nekoda bin kambek brom detlot taun gulum Telmela, Telasha, Kerab, Edan en Ime. Dei nomo bin abum pruf blanga shoum deibin brom eni femili blanga ola Isreil pipul.
63-64 Dislot serramonimen Hobaiya, Heikas en Basilai nomo bin abum pruf blanga shoum hubin olabat grenfatha. Det grenfatha blanga det serramonimen gulum Basilai bin merrit langa wan gel brom det femili blanga Basilai langa Giliyad en imbin gajim det neim blanga im waif dedi. Wal dumaji dei nomo bin gibit eni pruf dei nomo bin lau blanga jidan serramonimen. 65 En det gabman bos blanga ola Juwish pipul bin dalim olabat dei nomo bin lau blanga dagat det daga weya deibin gibit blanga ofring langa God raidap deibin faindim wan serramonimen hubin lau yusum det dubala speshalwan ston gulum Yuram en Thamam.✡Eksa 28:30; Dyud 33:8
66-69 Det namba blanga detlot pipul hubin jidan prisana en hubin kambek bin 42,360.
Ola men en gelwan wekinmen bin 7,337,
ola men en gelwan hubin oldei sing en plei myusik bin 245,
ola hosis bin 736,
ola mul bin 245,
ola kemul bin 435,
en ola dongki bin 6,720.
70-72 Ola boswan blanga ola femili bin gibit ofring blanga album baiyim ebrijing blanga meigim det Serramoni Pleis laik imbin jidan basdam.
Det gabman bos bin gibit 8 kilogrem gol, 50 boul blanga yusum langa serramoni en 530 longwan kout blanga ola serramonimen.
Detlot boswan blanga ola femili bin gibit 168 kilogrem gol en 1,250 kilogrem silba.
Detlot najalot pipul bin gibit 168 kilogrem gol, 140 kilogrem silba en 67 longwan kout blanga ola serramonimen.
73 Wal ola serramonimen, en Libai pipul, en ola blijiman en ola wekinmen blanga det Serramoni Pleis, en ola pleiyamob en ola najalot Isreil pipul bin gobek en jidan langa olabat ronwan pleis langa Juda.✡1 Kran 9:2; Niya 11:3