1-2 Wal YAWEI det trubala God bin dalim Mosis, “Yu dalim detlot Isreil pipul blanga gibit mi det daga ofring langa rait taim. Det smel blanga detlot ofring garra meigim mi brabli gudbinji.” Lagijat na YAWEI bin tok.

3-8 Wal Mosis bin dalim detlot Isreil pipul det wed blanga YAWEI, “Dijan na det ofring yumob garra gibit langa YAWEI. Longtaim, deya langa det hil kantri gulum Sainai, imbin det fes taim weya melabat bin gibit det barnapwan ofring, en det smel blanga det ofring garra meigim YAWEI brabli gudbinji. Wal blanga det barnapwan ofring blanga ebridei, yumob garra gibit dubala boiwan ship, wan yiya ol, en nomo garram enijing rong langa dubala bodi. Yumob garra gibit det feswan ship ailibala, en yumob garra gibit det najawan ship wen det sangodan, garram det sid daga ofring. Im wan kilogrem flauwa miksap garram wan lita det brabli gudwan oliboil. Blanga det wain ofring garram det feswan ship, yumob garra spilim wan lita wain langa det teibul blanga ofring. Langa sangodan, yumob garra gibit det sekanwan ship seimwei laik wen yumob bin dum ailibala, garram det sid daga ofring en det wain ofring. Det smel blanga det ofring garra meigim YAWEI brabli gudbinji. Wal lagijat na yumob garra oldei gibit det dubala barnapwan ofring ebridei langa YAWEI.” Lagijat na Mosis bin tok.

9 Wal Mosis bin kipgon tok, “Orait, langa det namba 7 dei gulum Sebathdei, yumob garra gibit dubala wan yiya ol boiwan ship nomo garram enijing rong langa dubala, en dubala kilogrem flauwa miksap garram oliboil garram det sid daga ofring en det wain ofring. 10 Dijan barnapwan ofring yumob garra gibit langa det namba 7 dei, en garram det ebridei ofring en garram det wain ofring du.” Lagijat na Mosis bin tok.

11 Wal Mosis bin kipgon tok, “Wal yumob garra gibit barnapwan ofring langa YAWEI, langa det feswan dei ebri manth. Yumob garra gibit dubala yangwan boiwan buligi, wanbala dediwan ship, en 7 boiwan ship wan yiya ol. Ol detlot enimul garra jidan brabli gudwan, nomo garram enijing rong langa olabat. 12 Blanga det sid daga ofring yumob garra gibit flauwa garram oliboil. Garram ebri boiwan buligi yumob garra gibit 3 kilogrem flauwa, en garram det dediwan ship dubala kilogrem flauwa, 13 en garram ebri lilwan ship, wan kilogrem flauwa. Dislot det barnapwan daga ofring, en det smel blanga detlot ofring garra meigim YAWEI brabli gudbinji. 14 Seimtaim yumob garra gibit det raitwan wain ofring du. Olabat garra gibit dubala lita wain garram ebri boiwan buligi, wan en haf lita garram det dediwan ship, en wan lita garram ebri lilwan ship. Dijan na det lowa blanga det barnapwan ofring blanga det feswan dei blanga ebri manth blanga ebriyiya. 15 Ebridei yumob garra gibit det barnapwan ofring garram det wain ofring, en yumob garra gibit wan boiwan gout blanga yumob nogudbalawei. Wal ol detlot na yumob garra gibit langa det feswan dei blanga ebri manth.” Lagijat na Mosis bin tok.

16 Wal Mosis bin kipgon tok, “Orait, det Pasoba Serramoni blanga YAWEI, yumob garra abum langa det namba 14 dei langa det feswan manth ebriyiya.✡Eksa 12:1-13; Dyud 16:1,2 17 En langa det namba 15 dei det serramoni gulum Damba Nomo Garram Raising garra stat, en yumob garra dagat det damba nomo garram eni raising blanga 7 dei.

18 “Wal langa det feswan dei blanga det serramoni, yumob garra midap blanga weship langa YAWEI, en yumob kaan dum eni wek. 19 Yumob garra gibit barnapwan ofring langa YAWEI, dubala yangwan boiwan buligi, wan dediwan ship, en 7 boiwan ship wan yiya ol, nomo garram enijing rong langa olabat. 20 En yumob garra gibit det raitwan sid daga ofring weya yumob garra miksap garram flauwa en garram oliboil. Yumob garra gibit 3 kilogrem flauwa garram ebri buligi, dubala kilogrem garram det dediwan ship, 21 en wanbala kilogrem garram ebri boiwan ship. 22 Wal yumob garra gibit wanbala boiwan gout blanga det nogudbalawei ofring, en lagijat na yumob gin jidan nomo garram enijing rong. 23 Blanga 7 dei yumob garra gibit detlot ofring mowa den det barnapwan ofring yumob gibit ebridei. 24-25 En yumob garra midap blanga weship langa YAWEI langa det namba 7 dei, en yumob kaan dum eni wek langa det dei na. Wal lagijat na yumob garra gibit detlot ofring langa YAWEI blanga 7 dei, en det smel blanga detlot ofring garra meigim YAWEI brabli gudbinji. Blanga 7 dei yumob garra gibit detlot ofring mowa den det barnapwan ofring en wain ofring yumob gibit ebridei.” Lagijat na Mosis bin tok.✡Eksa 12:14-20; 23:15; 34:18; Dyud 16:3-8

26 Wal Mosis bin kipgon tok, “Orait langa det feswan dei blanga det serramoni gulum Kukwan Daga, wen yumob garra gibit det nyuwan sid daga ofring langa YAWEI, wal yumob garra majurrumap miselp blanga weship, en yumob kaan dum eni wek. 27 Yumob garra gibit det barnapwan ofring, en det smel garra meigim YAWEI brabli gudbinji. Blanga det barnapwan ofring na yumob garra gibit det dubala yangwan boiwan buligi, wan dediwan ship, en 7 boiwan ship wan yiya ol, en nomo garram enijing rong langa olabat. 28 Yumob garra gibit det rait sid daga ofring garram flauwa miksap garram oliboil, 3 kilogrem garram ebri buligi, dubala kilogrem garram det dediwan ship, 29 en wanbala kilogrem garram ebri boiwan ship.

30 “Wal yumob garra gibit wanbala boiwan gout blanga det nogudbalawei ofring. Lagijat na detlot pipul gin jidan nomo garram enijing rong langa olabat laif. 31 Yumob garra gibit dislot, en det wain ofring, en det ebridei ofring en det sid daga ofring langa YAWEI.” Lagijat na Mosis bin tok.✡Eksa 23:16; 34:22; Dyud 16:9-12