Ola Saam
Ola Song En Preya Langa God
Wal brom longtaim raidap tudei dijan im det song en preya buk blanga ola Juwish pipul. King Deibid en najalot pipul bin raidimdan olabat blanga tok langa God. Sambala jidan hepiwan song blanga preisim God en sambala tok theingkyu langa God. Sambala song jis laiga preya langa God wen deibin jidan nogudbinji o soribala o bradin o sikbala.
1
Dijan song im hau blanga jidan brabli gudbinjiwei
1 23Detlot pipul hu nomo teiknodis langa wanim detlot nogudbala pipul tok,
dei garra jidan gudbinji.
Dei nomo bulurrum det wei blanga detlot nogudbala pipul.
Dei nomo miksap garram ola nogudbala pipul.
Dei nomo jidan garram detlot pipul hu mokimbat God, en nomo wandi sabi im.
2 Bat dei gudbinji garram wanim YAWEI titjimbat olabat.
Dei jinggabat det wed deitaim en naitaim.
Dei teiknodis langa im wed.
3 Detlot pipul garra jidan strongbala jis laik det strongwan tri weya growimap wansaid langa riba.
Im abum daga langa det rait taim,
en ola lif blanga im nomo draiyap.
Wal ol detlot pipul garra jidan lagijat du.
Dei garra jidan strongbala langa gudbala pleis.✡ Jera 17:8
4 Bat detlot nogudbala pipul nomo jidan lagijat.
Dei jis laik det draiwan gras,
weya nomo gudwan blanga enijing,
en det win jis blowimwei im.
5 Wen God garra jadjim ola pipul dei kaan jandap deya garram im.
Dei kaan miksap garram im ronwan pipul olabat.
6 God oldei maindimbat detlot gudbala pipul,
bat detlot nogudbala pipul wok langa det nogudbalawei weya garra meigim olabat dai.