1 YAWEI, ai garram loda enami.

Loda pipul bin gibit mi bekboun.

2 Olabat tokabat mi nogudbalawei.

Olabat tok, “God kaan album im.”

3 Bat yu YAWEI, yu stapam ola nogudwan ting brom mi jis laiga shild.

Yu meigim mi jidan haibala.

Yu meigim mi strongbala igin,

wulijim ai kaan bradin.

4 Mi jingat langa YAWEI blanga album mi,

en im ensim mi brom det serramoni pleis blanga im,

ontop langa det seikridwan hil blanga im gulum Saiyan.

5 Mi leidan en silip ol nait.

Mi gidap gudwei,

dumaji YAWEI lukaftumbat mi.

6 Nomeda loda enami majurrumap miselp raidaran langa mi,

bat stil ai kaan bradin,

dumaji YAWEI oldei maindimbat mi.

7 “YAWEI, kaman kwikbala!

Kaman en seibum mi, main God!

Yu bidim main enami olabat,

en meigim olabat sheim.

Yu meigim olabat wikwan,

nomo garram pawa blanga ardim mi.”

8 YAWEI, yu na tharran hu oldei seibum melabat.

Yu dumbat ola gudbala ting langa yu pipul olabat.