1 Ola graun blanga YAWEI det trubala God,

en ebrijing langa dijan graun blanga im du.

Ola kantri en ola pipul jidan blanga im na.✡1 Karin 10:26

2 Imbin pudum detlot kantri ontopwei,

en ola woda andanithwei.

3 Yumob ensim dijan!

Wujan pipul gin gowap langa det hil blanga YAWEI?

Wujan pipul gin jandap deya langa im Serramoni Pleis?

4 Yumob irrim na!

Ol detlot pipul hu jidan klinbala brom dumbat en jinggabat ol detlot nogudbala ting,

en ol detlot pipul hu nomo weship difrinwan drimin,

en ol detlot pipul hu meigim pramis en dum,

wal ol dislot pipul na gin gowap langa det Serramoni Pleis.✡Meth 5:8

5 En ol detlot pipul weya YAWEI oldei dumbat gudbala ting blanga olabat,

en seibum olabat en meigim olabat gudbinji,

6 wal dislot pipul na kaman blanga weship YAWEI, det God blanga Jeikob.

7 Yumob irrim na!

Opinap, ol yumob bigwan geit!

Opinap, ol yumob olwan dowa!

Det brabli haibala king garra gowin!

8 Yumob ensim dijan!

Hu dijan brabli haibala king?

Im YAWEI, strongwan garram pawa.

Im YAWEI weya fait garram pawa,

en bidim im enami olabat.

9 Yumob irrim na!

Opinap, ol yumob bigwan geit!

Opinap, ol yumob olwan dowa!

Det brabli haibala king garra gowin!

10 Yumob ensim dijan!

Hu dijan brabli haibala king?

Im YAWEI, det trubala haibala God.

Im na det brabli haibala king.