29
Wen det haibalawan God tok, im jis laik thanda
Song blanga Deibid blanga det laswan dei blanga det serramoni gulum Hampi.
1 Ol yumob deya langa hebin preisim YAWEI det trubalawan God.
Preisim im haibalawei en det pawa blanga im.
2 Preisim det haibalawan neim blanga YAWEI.
Nildan lida langa YAWEI, det brabli holiwan God.✡Saam 96:7-9
3 Wen YAWEI tok, yu gin irrim im oloba langa det solwoda.
Wen det haibalawan God tok, im jis laik thanda.
Oloba langa det solwoda na yu gin irrim im.
4 Wen YAWEI tok im shoum im pawa.
Im shoum im na det brabli haibalawan.
5 Wen YAWEI tok im breigimap detlot strongwan tri,
ol detlot strongwan sidatri na langa Lebanan.
6 Im meigim detlot bigwan hil langa Lebanan jamparanbat wulijim gabigabi,
en im meigim det bigwan hil gulum Heman jamp wulijim yangwan buligi.
7 Wen YAWEI tok, im meigim laitining kamat.
8 Wen YAWEI tok, im meigim det draiwan kantri sheiksheikbat nomo lilbit.
Im sheikimap det draiwan kantri gulum Keidish.
9 Wen YAWEI tok, im sheikimap detlot ouktri en im meigim ola lif brom ola tri buldan,
en ebribodi langa im Serramoni Pleis jingat adbala,
“God im Brabli Haibalawan!”
10 YAWEI na det King en im na det Boswan blanga det bigwan solwoda, en im garra jidanbat Bos blanga ola pipul olagijawan.
11 YAWEI gibit pawa langa im pipul olabat,
en im gibit olabat ola gudwan ting en meigim olabat jidan gudbinjiwei.