1 Sing nyuwan song langa YAWEI det trubala God.

Ola pipul langa dijan wel sing song langa YAWEI.

2 Sing langa YAWEI en preisim im.

Dalimbat det gudnyus ebridei weya imbin seibum wi.

3 Dalimbat pipul langa ebri kantri im brabli haibalawan,

en dalimbat olabat blanga ola haibala ting imbin dumbat.

4 YAWEI det trubala God im haibalawan en pipul garra preisim im.

Pipul garra abum loda rispek blanga im, mowa den langa ola najalot drimin.

5 Detlot drimin blanga najalot kantri olabat laiyawan, weya pipul bin meigimbat,

bat YAWEI det trubala God bin meigim ebrijing langa skai.

6 Im brabli haibala pawa gaburrumap im raidaran.

Im brabli shainiwan lait en pawa jidan langa im Serramoni Pleis.

7 Ola pipul langa dijan wel preisim YAWEI det trubala God.

Preisim im haibalawan pawa.

8 Preisim det haibala neim blanga YAWEI.

Bringim ofring en kaman langa im Serramoni Pleis.

9 Ebribodi langa dijan wel garra meigim miselp lobala en weship langa YAWEI det brabli haibalawan.✡Saam 29:1,2

10 Dalim pipul langa ola kantri, “YAWEI im boswan!

Dijan graun im jidan langa im rait pleis en najing kaan mubum im.

Im garra jadjim ola pipul en gibit olabat feyago.”

11 Graun en skai, jidan gudbinji.

Solwoda en ola enimul weya jidan insaid langa solwoda jingat gudbinjiwei.

12 Ola kantri en ebrijing weya jidan langa olabat, jidan gudbinji.

Ola tri langa ola bush kantri sing gudbinjiwei.

13 Wen YAWEI kaman blanga jidan boswan langa dijan wel,

im garra jidan bos blanga ola pipul brabli trubalawei,

en det wei weya im gibitbat pipul feyago.