1 YAWEI yu dum det seim ting langa detlot hu dum nogud ting langa mi.

Yu fait langa olabat weya dei fait langa mi.

2 YAWEI yu gajim yu shild en jandap lida main en seibum mi.

3 Kaman garram yu spiya en eks langa detlot hu ranimap langa mi,

en dalim mi yu garra seibum mi.

4 Detlot hu wandi kilim mi ded, meigim olabat jidan garram sheim en nomo win.

Detlot hu toktokbat sigridwei blanga kilim mi ded,

tenimbek olabat en meigim olabat jinggabat olkainabawei.

5 Meigim det einjul blanga YAWEI tjeisimap olabat wulijim win blowim draiwan lif.

6 Larram det einjul blanga YAWEI kilim olabat wen dei buldanbat olawei langa det dakbala en slipriwan roud.

7 Ai nomo bin dum enijing langa olabat.

Deibin jis pudumbat trep blanga mi,

en deibin digim dipwan hol blanga gajim mi.

8 Bat bifo dei dum lagijat, det deinja garra kaman langa olabat jis lagijat.

Olabat garra jidan langa olabat ron trep,

en buldan langa olabat ron dipwan hol en binijap.

9 Brom deya ai garra gudbinji blanga YAWEI.

Ai garra gudbinji dumaji imbin seibum mi.

10 Ai garra tok lagijat langa YAWEI garram main hat na,

“Nobodi jidan jis laik yu.

Yu maindimbat ola wikwan pipul brom ola strongwan,

en seimwei langa ola powan pipul brom detlot hu oldei dum krul ting langa olabat.”

11 Nogud pipul oldei tokabat blanga mi,

en bleimbat mi fo najing.

12 Olabat peiyimbek mi nogudwei blanga gudwanwei.

Wen aibin gud langa olabat, deibin tridim mi nogudwei.

Wal mi jidan nogudbinji na.

13-14 Bat wen olabat bin sik aibin oldei jinggabat blanga olabat.

Ai nomo bin dagat daga du.

Aibin jidan hedan en preibat,

jis laik wen mi prei blanga main frenmob o blanga main femilimob lagijat.

Ai nomo bin wokaran, najing.

Aibin oldei jidan wan pleis dumaji aibin nogudbinji,

wulijim wen sambodi jidan soriwei blanga im mami, lagijat na.

15 Bat wen aibin abumbat trabul olabat bin jidan gudbinji,

en bin majurrumap raidaran langa mi blanga meigim fan langa mi.

Ola streinjamob bin hitimbat mi en deibin kipgon hitimbat mi olawei.

16 Laik wen dei mokim kripulwan pipul,

wal lagijat na deibin mokimbat mi.

Deibin baidim miselp tang langa mi, dumaji deibin gitwail nomo lilbit langa mi.

17 Bos, haulong yu garra jidanabat en lukinatbat mi?

Yu seibum mi brom olabat hu wandim kilimbat mi.

Seibum main laif brom dislot pipul hu jidan jis laiga laiyan.

18 Brom deya ai gin gibit yu theingks rait deya na langa ol yu pipul olabat.

Ai garra preisim yu rait langa olabat ai.

19 Nomo larram ol detlot laiyinwan enami blanga jidan gudbinji langa ol main trabul.

Olabat heidimbat mi fo najing.

Nomo larram olabat laflaf langa ol main trabul.✡Saam 69:4; Jon 15:25

20 Olabat nomo tok gudbinjiwei,

bat dei oldei meigimap olkainaba laiyawan stori blanga ola brabli gudwan pipul.

21 Olabat bleim mi en jingat adbala lagijat,

“Wibin luk wanim yubin dum.”

22 Bat yubin luk ebrijing bin hepin, YAWEI.

Wal yu nomo jidan kwaitbala, main bos.

Nomo jidan longwei.

23 Yu gidap main bos en deigim main pat na.

Yu gidap main God en yu sori langa ol main trabul.

24 YAWEI, yu nomo garram eni rong.

Yu jidan trubala.

Wal yu sabi mi.

Dalim ebribodi ai nomo bin dum eni rong.

Nomo larram main enami olabat blanga tridim mi nogudwei.

25 Nomo larram olabat tok gija lagijat,

“Gudjob! Im binij na! Wibin meigim im gowei na!

Lagijat na wibin wandim!”

26 Yu bidim ol detlot pipul hu tridim mi nogudwei blanga main trabul.

Meigim olabat jinggabat olkainabawei.

Larram ol detlot pipul hu oldei reken miselp blanga ebrijing garra sheim miselp nomo lilbit en jidan nomo garram eni rispek.

27 Larram detlot pipul hu wandim mi blanga jidan friwan,

blanga jingat gudbinjiwei lagijat,

“Trubala! YAWEI im brabli haibala!

Im gudbinji langa im wekinmen weya im garram ebrijing.” Lagijat na dei garra tok.

28 Brom deya olataim ai garra preisim en tok lagijat,

“Preisim YAWEI, det trubala God.

Im oldei dum rait ting.

Im nomo garram eni rong.”