1 Det nogudbalawei blanga ola nogudbala pipul jidan raitdan dip insaid langa olabat hat.

Dei oni jinggabat blanga dumbat nogudbala ting.

Olabat nomo bradin en abum eni rispek blanga God.✡Rom 3:18

2 Dumaji dei reken miselp, dei reken God kaan faindat blanga olabat nogudbalawei en panishim olabat.

3 Olabat oldei tok brabli nogudbalawei en laiyawan wed.

Dei nomo jinggabat gudwei en dum rait ting enimo.

4 Wen dei leidan langa bed, dei jinggabat blanga dumbat nogud ting.

Dei nomo dum enijing gud en dei kaan gidawei brom ol detlot nogudwan ting.

5 YAWEI, yu filing blanga laigim pipul im jidan mowa bigwan raidap langa hebin.

En det trubalawei blanga yu im gajimap det skai.

6 Blanga yu wei nomo garram eni rong.

Yu mowa haibala langa ola bigbigwan hil.

Yu feyagowan filing jidan detmatj jis laik det dipwan solwoda.

Yu oldei lukaftum ola pipul en ola enimul.

7 God, det filing weya yu laigim pipul olataim im mowa gudwan langa ebrijing.

Ebribodi gin go langa yu blanga jidan seifwan, jis laik det lilwan bard,

weya jidan seifwan andanith langa im mami.

8 Yu gibit olabat detmatj daga blanga dagat,

en detmatj gudwan ting weya kaman brom yu jidan jis laik det riba weya gibit woda blanga dringgim.

9 Yu na jis laik det springwoda weya meigim ebrijing jidan laibala,

En dumaji yu na God, jidan det lait, melabat gin luk det lait.

10 Yu kipgon laigimbat ol detlot hu sabi yu,

en yu dum gudbala ting langa ol detlot hu jidan raitwei en nomo garram enijing rong.

11 Yu nomo larram praudbala pipul kaman en kilim mi,

en yu nomo larram nogudbala pipul andimwei mi du.

12 Ebribodi luk! Detlot nogudbala pipul leidanbat dedbala,

en olabat kaan neba gidap igin.