60
Dijan preya blanga seibum pipul brom nogudbala ting
Preya blanga Deibid blanga lenim pipul afta wen imbin fait langa detlot Erimiyan pipul, en wen Joweb bin kilim ded bigmob pipul brom Idam langa Solt Beli, gulijap langa det solwoda gulum Dedsi.✡2 Sem 8:3-8; 10:6-19; 1 Kran 18:3-11; 19:16-19
1 God, yubin gibit bekboun langa melabat,
en yubin bidim melabat.
Yubin gitwail brabliwei langa melabat,
bat melabat askim yu blanga kambek en meigim melabat yu ronwan pipul igin.
2 Yubin meigim dijan kantri sheik nomo lilbit,
en yubin bastimap dijan kantri.
God, yu meigim dijan kantri jidan gudwan igin.
3 Yubin meigim ol yu pipul olabat ardimbat detmatj.
Yubin meigim melabat buldanbat ebriweya laiga drangginbala.
4 Bat yubin gibit woning langa detlot hu weship langa yu blanga sabi, wulijim olabat gin kamat brom det deinja.
5 Ensim melabat preya en seibum melabat garram yu pawa,
wulijim ola pipul hu yu laigim gin jidan seifwan.
6 God bin tok brom im brabli seikridwan pleis,
“Gudbinjiwei ai garra kadimat det taun Shekam,
en gibit det kantri Sukait Beli langa main pipul olabat.
7 Det dubala kantri gulum Giliyad en Manesa blanga main.
Det kantri Ifreiyim jidan wulijim main speshalwan het,
en det kantri Juda im jidan wulijim main seikridwan stik.
8 Bat ai garra meigim det kantri Moweb jidan wulijim rabishwan pleis weya dei tjakam dardiwan woda,
en ai garra tjakam main but langa det kantri Idam blanga shoum mi bos blanga im.
Mi jingat gudbinjiwei, dumaji aibin bidim detlot Filistain pipul.”
9 God, hu garra album mi en deigim mi langa det bigwan taun garram haibala wol?
Hu garra album mi en deigim mi langa Idam?
10 Maitbi yubin libum melabat olagijawan na, God.
Yu garra stil go garram melabat ami olabat o najing?
11 Yu album melabat fait langa dislot enami.
Pipul kaan album melabat. Najing!
Olabat nomo strongwan.
12 Oni yu na God garra meigim melabat win.
Yu na garra bidim melabat enami olabat.