1 God, wotfo yubin libum melabat? Yu garra lagijat olagijawan?

Wotfo yu wail langa yu ron pipul olabat? Melabat blanga yu ship.

2 Yu jinggabat yu pipul olabat weya yubin pikimat blanga yu ronselp longtaim,

en wen yubin baiyimbek olabat wen deibin jidan prisana,

en yubin meigim olabat jidan yu ronwan traib.

Yu jinggabat det hil gulum Saiyan weya yubin jidan bifo.

3 Yu wok oba ol detlot rabish weya yu seikridwan haus bin jidan.

Melabat enami olabat bin bitsimap ebrijing.

4 Yu enami olabat bin jinginatbat adbala langa yu Serramoni Pleis.

Deibin bidim melabat en bin pudumbat olabat fleig deya blanga shoum deibin win.

5 Deibin jis laik detlot pipul hu oldei kadimdan tri garram olabat eks.

6 Deibin smeshimap ola purdiwan wudwan ebrijing garram olabat eks en bigwan hema.

7 Deibin barnimap yu Serramoni Pleis garram faiya,

en deibin dum brabli nogud ting deya weya melabat oldei kaman en weshipbat yu.

8 Olabat bin wandi binijim melabat brabliwei,

en deibin barnimap ola seikridwan pleis langa dijan kantri weya melabat bin weshipbat yu, God.

9 Ola seikridwan ebrijing bin ol binijap,

en ola speshalwan mesinja blanga God bin ol binijap du.

En nobodi sabi haulong dijan trabul garra kipgon lagijat.

10 God, haulong dislot enami blanga melabat garra laflafbat langa yu?

Maitbi olabat garra kipgon toktokbat nogudwei blanga yu neim fogud. Wotaim dei garra stap toktok nogudbalawei?

11 Wotfo yu nomo album melabat? Wotfo yu haidim miselp bingga?

12 Bat God, yubin jidan melabat king brom longtaim.

Lodataim yubin oldei seibum yu pipul olabat iya langa melabat kantri.

13 Garram yu strongbala pawa yubin kadimat det solwoda,

en yubin breigimap detlot hedpat blanga detlot bigwan enimul weya jidan insaid langa solwoda.✡Eksa 14:21

14 Yu na bin breigimap detlot hedpat blanga detlot bigwan krokadail gulum Labaiyathan,

en yubin gibit im bodi langa detlot deset enimul blanga dagat.✡Job 41:1; Saam 104:26; Aisai 27:1

15 Yu na bin meigim ola springwoda en lilwan krik randan.

En yu na bin draiyimap ola bigwan riba.

16 Yu na bos blanga deitaim en naitaim,

en yu na bin pudum det san en det mun langa dubala pleis.

17 Yu na bin meigim ebrijing langa dijan wel blanga jidan langa olabat pleis,

en yu na bin meigim hotwetha en kolwetha.

18 Bat YAWEI, yu jinggabat.

Detlot enami blanga yu bin mokimbat yu,

en olabat nomo bin bilib en wandim yu.

19 Nomo larram ola wailwan enimul gajim lilwan bard blanga yu.

Nomo fogedabat yu ronwan pipulmob hu abumbat adtaim brom ola krulwan enami.

20 Yu jinggabat det strongwan pramis yubin meigim garram melabat,

dumaji ola nogudbala ting jidan langa ebri kantri tudei.

21 Yu nomo larram detlot pipul hu abumbat adtaim jidan garram sheim.

Yu larram ol detlot powan pipul en ol detlot pipul hu nomo garram enijing preisimbat yu neim.

22 Yu gidap God, en jandap blanga yu wei.

Yu jinggabat na blanga ol detlot pipul hu oldei mokimbat yu.

23 Yu nomo fogedabat yu enami olabat hu oldei jinginatbat.

Dei oldei kipgon jinginat.