104
Gibit preis langa God hubin meigim ebrijing
1 Main spirit preisim yu YAWEI.
YAWEI, main God, yu brabli haibalawan.
Yu jidan brabli haibalawan garram yu brabli shainiwan lait.
2 Yu lait jidan raidaran langa yu.
Yubin spredimat det skai wulijim tent,
3 en yubin bildimap yu kemp ontopwei langa ola woda.
Ola klaud jidan jis laiga hos en bagi blanga yu,
en det win deigimbat yu weya yu wandi go.
4 Det win im laik ol yu mesinja olabat,
en det laitining im laik ol yu wekinmen olabat du.✡ Hib 1:7
5 Yubin meigim dijan graun jidan strongbala langa im rait pleis en najing kaan mubum im.
6 Yubin gaburrumap im garram solwoda laik longwan dres,
en woda bin gaburrumap ola bigwan hil.
7 Wen yubin tok langa ola woda deibin ranawei.
Deibin ranawei wen deibin irrim yu tok adbala.
8 Deibin randan brom ontop langa ola bigwan hil raitdan langa ola beli, langa detlot pleis weya yubin meigim blanga olabat.
9 Yubin pudumdan bandri weya dei kaan neba pasim,
wulijim dei kaan gaburrumap dijan wel igin.
10 Yubin meigim springwoda randan langa ola beli,
en ola riba randan thru langa ola hil.
11 Dei gibit woda langa ola wailwan enimul,
en ola dongki dringgimbat woda deya du.
12 Nomo longwei brom deya ola bard meigimbat olabat nes en singsingbat.
13 Brom det skai yu jandimdan rein ontop langa ola hil,
en yu gibit dijan kantri ola gudwan ting.
14 Yu meigim gras gro blanga ola buligi, en ola plent, wulijim melabat gin growimapbat daga blanga melabat,
15 en meigim wain blanga meigim melabat jidan hepiwan,
en oliboil blanga meigim melabat luk gudwan,
en daga blanga meigim melabat strongbala.
16 Detlot sidatri brom Lebanan oldei gedim loda rein.
Olabat ola ronwan tri blanga YAWEI weya imbin plentim.
17 Deya na ola bard meigim olabat kemp,
en ola waitwan krein kemp ontop langa tri.
18 Ola bush nenigout kemp langa ola hil kantri,
en ola rok walabi haidim miselp langa ola klifsaid.
19 Yubin meigim det mun blanga shoum ola mant,
en det san blanga sabi wotaim blanga godan.
20 Yubin meigim naitaim,
en wen im dakbala ola wailwan enimul kamat.
21 Ola yangwan dinggo jingat wen dei go hanting en lukabat blanga daga weya God gibit olabat.
22 Wen det san gidap olabat gobek en leidan langa olabat kemp.
23 Brom deya pipul kamat blanga dum olabat wek
en dei kipgon wekwekbat raidap leit.
24 YAWEI, yubin meigim loda ting.
Garram yu ron sabibalawei yubin meigim olabat brabli gudwei.
Dijan wel jidan garram detmatj enimul blanga yu.
25 Det solwoda im jidan brabli bigiswan,
en olkain bigwan en lilwan enimul jidan deya.
26 Ola bigwan bout trebul ontop langa det solwoda,
en yubin meigim detlot bigwan krokadail gulum Labaiyathan blanga jidan insaid deya.✡ Job 41:1; Saam 74:14; Aisai 27:1
27 Ola pipul en enimul holot weit langa yu blanga gibit olabat daga wen dei wandim.
28 Yu gibit olabat en dei dagat.
Yu oldei gibit olabat daga garram yu ronwan bingga en dei oldei sedisfaid.
29 Wen yu tenimwei yu feis olabat bradin brabliwei.
Wen yu stapam olabat win olabat dai en olabat bodi gobek langa graun brom weya yubin meigim olabat.
30 Bat wen yu blo win,
yu gibit nyuwan laif langa ebrijing langa dijan wel.
31 Larram det brabli haibalawei blanga YAWEI jidan olagijawan.
Larram YAWEI jidan gudbinji blanga wanim imbin meigim.
32 Wen im luk langa dijan kantri dijan kantri sheik nomo lilbit.
Wen im tatjim ola bigwan hil smok kamat.
33 Ebridei mi jidan laibala ai garra sing langa YAWEI.
Nomeda haulong ai jidan laibala, ai garra oldei preisim main God garram song.
34 Larram im jidan gudbinji garram ebrijing weya mi jinggabat,
dumaji mi gudbinji brom im na.
35 Larram ola nogudbala pipul binijap brom dijan wel.
Larram ola brabli wikitwan pipul nomo jidan eni mowa.
Main spirit, preisim yu YAWEI!
Preisim YAWEI det trubala God!