1 God, yu stakmen blanga ola Isreil pipul.

Yu irrim melabat.

Yu na det boswan blanga yu ron pipul olabat.

Yu jidan langa yu speshalwan tjeya deya langa midul langa det dubala golwan sheip garram wing.✡Eksa 25:22

2 Yu shoum miselp langa detlot klen blanga Ifreiyim, Benjamin, en Manesa.

Shoum melabat yu pawa en kaman seibum melabat.

3 God, meigim melabat strongbala igin!

Yu luk langa melabat garram yu shainiwan feis en seibum melabat.

4 YAWEI, Boswan God, haulong yu garra jidan wail en nomo ensim ola preya blanga yu pipul olabat?

5 Yubin meigim melabat jidan brabli nogudbinjiwan.

En yubin meigim melabat dringgim melabat ronwan tiyas.

6 Yubin larram melabat enamimob fait blanga melabat kantri,

En dei mokimbat melabat na.

7 Brabli Boswan God, meigim melabat strongbala igin!

Yu luk langa melabat garram yu shainiwan feis en seibum melabat.

8 Yubin bringimat yu pipul olabat jis laiga greiptri brom det kantri Ijip.

Yubin andimwei pipul brom najalot kantri en yubin plentim det tri langa olabat kantri.

9 Yubin klinimap pleis blanga det greiptri blanga growap.

Det rutpat bin godan raitdan en det greiptri bin spredimat miselp oloba langa det kantri.

10 Imbin gaburrumap ola hil garram im bigwan sheid.

Detlot wadi blanga det tri bin gro en gaburrumap detlot bigwan sidatri.

11 Detlot wadi blanga det tri bin kamat langa det Medatareiniyan solwoda en langa det Yufreitis Riba.

12 God, wotfo yubin larram detlot enami blanga ola Isreil pipul breigimdan det wol weya bin jidan raidaran?

Olabat garra stilim ola greip daga na wen dei gopas.

13 Olabat jis laik detlot wailwan bigibigi weya rudimat det greiptri,

en jis laik ola wailwan enimul dagadagatbat ola greip daga du.

14 Brabli Boswan God, luk langa melabat!

Yu lukdan langa melabat brom hebin.

Kaman en seibum yu pipul.

15 Yu kaman en seibum dijan greiptri weya yubin plentim,

dijan na det yangwan greiptri weya yubin meigim gro brabli strongbala.

16 Melabat enamimob bin kadimdan det tri en barnimap garram faiya.

Yu wail langa olabat en binijimap olabat.

17 Yu lukaftum yu pipul olabat weya yubin pikimat,

ol detlot pipul na weya yubin meigim jidan brabli strongbala.

18 En melabat kaan gowei brom yu igin.

Meigim melabat strongbala igin en melabat garra weship en preisim yu.

19 YAWEI, boswan God, yu meigim melabat strongbala igin.

Yu luk langa melabat garram yu shainiwan feis en seibum melabat.