1 Main God, ola nogud pipul bin teikoba yu kantri.

Deibin dum nogud ting langa yu Serramoni Pleis,

en deibin libum Jerusalem rabishwan.✡2 King 25:8-10; 2 Kran 36:17-19; Jera 52:12-14

2 Deibin libum ola ded bodi blanga yu pipul olabat blanga ola bard blanga dagadagatbat,

en deibin libum ola bifpat blanga yu wekinmen olabat blanga ola wail enimul blanga dagadagatbat.

3 Deibin meigim yu pipul olabat lujim blad wulijim woda.

Rait thru Jerusalem det blad bin randan laik woda,

en nobodi nomo bin jidan laibala blanga gaburrumap detlot hubin dai.

4 Pipul langa najalot kantri hu nomo weship God toktok nogudwei blanga melabat.

Olabat laflaf en mokimbat melabat.

5 YAWEI, haulong yu garra wail langa melabat?

Haulong yu garra kipgon wail jis laik faiya im barnbarnbat?

6 God, yu garra gitwail langa detlot pipul brom najalot kantri hu nomo weship yu,

en langa detlot pipul hu nomo prei langa yu.

7 Dumaji olabat na bin kilim ola pipul blanga yu,

deibin meigim yu kantri nogudwan.

8 Nomo panishim melabat blanga ola nogudbala ting weya melabat femilimob bin oldei dumbat longtaim.

Yu sori langa melabat na.

Yu album melabat kwikbala.

9 Album melabat God.

Seibum melabat en larramgo melabat fri brom ol melabat nogudbalawei wulijim ebribodi garra rispek yu brabliwei.

10 Wotfo detlot pipul brom najalot kantri askim melabat, “Weya yumob God?”

Melabat wandim luk yu panishim detlot pipul hubin meigim yu wekinmenmob lujim blad.

11 God yu garra irrim detlot prisanamob kraikraibat,

en detlot prisana hu garra dai,

en yu garra meigim olabat fri garram yu strongbala pawa.

12 Detlot pipul weya deibin toktokbat nogudwei langa yu YAWEI,

yu garra meigim olabat peiyimbek yu sebentaim.

13 En langa det taim na melabat garra gibitbat yu theingks olagijawan en preisimbat yu olataim.

Melabat jidan yu pipulmob,

en melabat jis laik yu ship olabat langa yu pedik.