78
God en im pipul olabat
Song blanga Eisaf.
1 Main pipul, yumob irrim main wed en teiknodis wen mi tok.
2 Ai garra tok ola gudbala wed blanga meigim pipul sabi brabliwei,
en dalim olabat detlot sigridwan ting brom longtaim bifo,✡Meth 13:35
3 ola ting na wibin sabi en irrimbat brom wi dedimob.
4 Wi garra dalimbat wi bigininimob en blanga olabat bigininimob blanga det pawa blanga YAWEI,
en blanga ola haibala en ola gudwan ting imbin dum.
Wi kaan blandim ol detlot stori brom olabat.
5 Imbin gibit ola lowa langa ola Isreil pipul hubin kaman brom olabat grengrenfatha Jeikob.
Imbin dalim wi femili olabat hubin jidan longtaim blanga titjimbat olabat bigininimob blanga ol im lowa,
6 wulijim detlot bigininimob hu garra jidan bambai gin sabi,
en olabat gin dalimbat olabat bigininimob du.
7 Wen dei lagijat dei garra trastimbat God du,
en nomo fogedabat wanim imbin dum,
en oldei teiknodis langa ol im lowa.
8 Olabat kaan jidan wulijim olabat grengrenfathamob hubin jidan brabli nogudbala en nomo garram irriwol.
Olabat nomo bin trastim God strongbalawei,
en dei nomo bin jidan trubalawei langa im.
9 Detlot pipul brom Ifreiyim bin abum bo en erro redibala,
bat olabat bin ranawei wen det dei blanga det wofait bin kaman.
10 Olabat nomo bin kipum det strongwan pramis blanga olabat langa God.
Dei nomo bin wandi teiknodis langa im lowa.
11 Deibin fogedabat wanim imbin dum, ol detlot klebabala ting weya deibin luk imbin dumbat.
12 God bin dum ol detlot klebabala ting garram im pawa langa det plein kantri gulum Sowan, langa det kantri Ijip.
En detlot femili blanga olabat bifo bin lukinat imbin dumbat.✡Eksa 7:8; 12:32
13 Imbin opinimap det solwoda en imbin deigim detlot pipul thru.
Imbin meigim det solwoda jandap wulijim haiwan wol.✡Eksa 14:21,22
14 Deitaim imbin oldei lidim olabat garram klaud,
en naitaim faiya bin oldei barnbarn blanga lidim olabat.✡Eksa 13:21,22
15 Imbin opinimap bigwan ston en imbin gibit olabat detmatj woda.
16 Imbin meigim woda kamat brom det ston,
en imbin meigim det woda randan wulijim riba.✡Eksa 17:1-7; Nam 20:2-13
17 Bat deibin stil dumbat nogudbala ting langa God.
Deya langa det deset kantri dei nomo bin wandi teiknodis langa det brabli haibala God.
18 Deibin testimat God brabliwei wen deibin dalimbat im wanim deibin wandim blanga dagat.
19 Deibin tokabat langa God en deibin tok,
“Yu reken God gin gibit wi daga langa dijan deset kantri?
20 Trubala orait imbin hitim det ston en detmatj woda bin kamat,
bat yu reken im gin gibit wi daga en gibit im pipulmob bif?”
21 Blanga tharran na YAWEI bin brabli wail wen imbin irrim olabat toktok lagijat.
Imbin fait langa im pipul olabat garram faiya.
Imbin barn binji langa olabat brabliwei, jis laiga hotwan faiya,
22 dumaji dei nomo bin trastim im,
en dei nomo bin bilib im na garra seibum olabat.
23 Bat imbin tok langa det skai blanga opinap im en imbin opin.
24 Imbin gibit olabat sid daga brom hebin wen imbin gibit olabat det lilwan damba gulum mena blanga dagat.✡Jon 6:31
25 Wal lagijat na deibin dagat det seimkain daga blanga ola einjul,
en God bin gibit olabat ebrijing deibin wandim blanga dagat.
26 Imbin meigim det win blo brom sangidapwei,
en garram im pawa imbin sterrimap det sauth win.
27 En imbin jandim langa im pipul olabat detmatj bard wulijim sengraun weya jidan langa solwoda.
28 Deibin buldanbat raidaran langa ola tent langa olabat kemp.
29 Wal detlot pipul bin dagadagatbat en deibin sedisfaid.
God bin gibit olabat wanim deibin wandimbat.
30 Bat wen olabat bin stil dagadagatbat bard, en dei nomo bin brabli sedisfaid,
31 God bin gitwail langa olabat en kilim ded olabat strongwan men, ol detlot brabli gudwan yangmen blanga Isreil.✡Eksa 16:2-15; Nam 11:4-23,31-35
32 Nomeda ol detlot ting bin hepin, detlot pipul bin kipgon dumbat ola nogudbala ting.
Nomeda imbin dum klebabala ting dei nomo bin stil trastim im.
33 Wal imbin binijimap olabat jis laik win weya stap streidawei,
en olabat bin dai brom nogudwan ting.
34 Ebritaim wen God bin oldei kilim ded sambala pipul, det najalot bin oldei kambek langa im.
Deibin oldei libum olabat olbalawei en prei brabliwei langa im.
35 Deibin sabi det boswan God na bin oldei maindimbat olabat,
en imbin oldei albumbat en seibum olabat.
36 Bat ola wed deibin oldei tok bin laiyawan.
Ebrijing weya deibin toktok nomo bin trubala.
37 Dei nomo bin gibit God rispek.
Olabat nomo bin kipum olabat strongwan pramis langa im.✡Eks 8:21
38 Bat God bin sori langa im pipul olabat.
Imbin larramgo olabat fri brom olabat nogudbalawei en im nomo bin binijimap olabat.
Lodataim God bin oldei holdimbek miselp en nomo gitwail langa olabat.
39 Imbin sabi deibin oni pipul weya garra dai,
jis laik win weya kaman en binij kwikbala.
40 Lodataim deibin gibit im bekboun.
Detmatj taim deibin oldei meigim im fil nogudbinji.
41 Oba en oba deibin oldei testimbat God,
en deibin oldei ardimbat det filing blanga im na, det brabli holiwan God blanga Isreil.
42 Deibin fogedabat im strongwan pawa,
en det dei wen imbin seibum olabat brom olabat enamimob,
43 en wen imbin shoum ola klebabala ting imbin dum langa Sowan deya langa det kantri Ijip.
44 Imbin tjeinjim ola riba woda en meigim blad,
en detlot pipul langa Ijip nomo bin abum eni woda blanga dringgim na.✡Eksa 7:17-21
45 Imbin jandim loda flai langa olabat weya bin ardimbat olabat,
en ola frog bin meigim olabat kantri nogudwan.✡Eksa 8:1-6,20-24
46 Imbin jandim ola bigwan grashopa blanga dagat olabat gadin,
en binijimap ola daga weya bin gro langa olabat fam.✡Eksa 10:12-15
47 Imbin meigim dai ola greiptri blanga olabat garram ola heilston,
en imbin meigim dai ola figtri blanga olabat garram brabli kolwanwetha.
48 Imbin kilim ded ola buligi blanga olabat garram heilston,
en ola ship blanga olabat garram laitining.✡Eksa 9:22-25
49 Imbin meigim olabat abum detmatj wori wen imbin brabli wail nomo lilbit langa olabat,
en imbin jandim detlot speshalwan einjul langa olabat blanga kilim olabat ded.
50 Im nomo bin holdimbek miselp wen imbin wail langa olabat en im nomo bin sori langa olabat du.
Imbin kilim olabat holot garram nogudwan siknis.
51 Imbin kilim ded ola boi hubin bon fes blanga ola femili langa Ijip.✡Eksa 12:29
52 Brom deya imbin deigim im pipul olabat jis laiga stakmen
en imbin deigim olabat thru det deset kantri.✡Eksa 13:17-22
53 Imbin lidim olabat seifwei en olabat nomo bin bradin,
bat det solwoda bin gaburrumap olabat enamimob.✡Eksa 14:26-28
54 Imbin bringimap olabat langa im seikridwan kantri,
en langa detlot bigwan hil weya imbin teikoba.✡Eksa 15:17; Josh 3:14-17
55 Imbin andimwei detlot pipul hubin oldei jidanabat langa det kantri wen im pipulmob bin go thru deya.
Imbin kadimat olabat kantri en gibit miselpmiselp langa ola klen blanga Isreil, en imbin gibit ola kemp blanga olabat langa im pipul olabat.✡Josh 11:16-23
56 Bat olabat nomo bin irrim langa det Boswan God en deibin testimbat im.
Olabat nomo bin teiknodis langa ol im lowa.✡Jadj 2:11-15
57 Olabat bin gibit bekboun langa im en dei nomo bin jidan trubala langa im, laik olabat grengrenfatha bin dumbat longtaim bifo.
Olabat bin nogud jis laik bendiwan spiya.
58 Olabat bin meigim im gitwail, dumaji deibin oldei weshipbat ola drimin sheip blanga olabat langa detlot nogudwan weship pleis.
Deibin meigim im gitwail langa olabat nomo lilbit na.
59 God bin wail wen imbin luk wanim deibin dumbat,
en blanga tharran na God bin tjakidawei olabat.
60 Imbin libum im kemp insaid langa det tent deya langa Shailo,
det kemp na weya imbin oldei jidanbat garram pipul.✡Josh 18:1; Jera 7:12-14; 26:6
61 Imbin larram wi enamimob deigidawei det Seikridwan Boks.
Det Boks bin shoum pipul im brabli haibalawan pawa.✡1 Sem 4:4-22
62 Imbin wail garram im ronwan pipul,
en imbin larram olabat gitkil brom olabat enamimob.
63 Ola yangbala men bin gitkil langa wofait,
en ola yangbala gel nomo bin abum hasbin blanga merrit na.
64 Deibin kilim ded ola wekinmen blanga God langa fait,
en olabat waif nomo bin lau blanga krai en jidan soriwei.
65 Bambai God bin gidap na, jis laik imbin weikap brom silip.
Imbin jis laik strongwan men weya bin dringgim wain.
66 Imbin andimwei im enamimob brabliwei,
en imbin bidim olabat en meigim olabat sheim miselp olagijawan.
67 God nomo bin wandim det femili olabat blanga Josef.
Im nomo bin pikimat det klen blanga Ifreiyim.
68 Bat imbin pikimat det klen blanga Juda,
en Saiyan, det hil weya im laigim nomo lilbit.
69 Deya na imbin bildimap im Serramoni Pleis jis laik im kemp langa hebin.
Imbin meigim im brabli strongbalawan jis laik dijan wel igin.
Im jidan brabli strongbalawan olataim.
70 Imbin pikimat im wekinmen Deibid.
Imbin bringimap im brom detlot pedik weya imbin oldei wek,
71 en weya imbin oldei lukaftumbat ola ship.
Imbin meigim im jidan king blanga ola Isreil pipul.
Imbin det stakmen blanga ola pipul blanga God,✡1 Sem 16:11,12; 2 Sem 7:8; 1 Kran 17:7
72 en imbin shoum olabat det raitwei blanga jidan.