99
Det Brabli Boswan God
YAWEI im Bos en ola pipul sheik nomo lilbit.
Im jidan langa im speshalwan tjeya deya langa midul langa det dubala golwan sheip garram wing.
En dijan wel im sheiksheik. Eksa 25:22
YAWEI im jidan strongbalawan langa Jerusalem.
Im det boswan blanga ebri kantri.
Ebribodi garra preisim im haibala neim.
Im na holiwan!
 
Strongbala king yu laigim wanim im rait.
Yubin gibit feyagowan lowa langa Isreil.
Yubin dum ebrijing raitwei en gibit feyago langa ola pipul langa Isreil.
Preisim YAWEI det trubala God blanga wi.
Weship im lida langa im speshalwan tjeya.
Im na holiwan!
 
Mosis en Eran bin im wekinmen,
en Semyul bin tharran hubin prei langa im.
Olabat bin jingat langa YAWEI det trubala God en imbin ensim olabat.
Imbin tok langa olabat brom det longwan klaud.
Deibin lisin en teiknodis langa ol im lowa en wed weya imbin dalim olabat. Eksa 33:9
 
YAWEI det trubala God blanga wi, yubin ensim yu pipul olabat.
Yubin shoum olabat yu na det God hu oldei fil sori en larramgo pipul fri,
nomeda yubin panishim olabat blanga ola nogudbala ting deibin dumbat.
Preisim YAWEI det trubala God blanga wi,
en weship im langa im seikridwan hil.
YAWEI wi God, im holiwan.

99:1 Eksa 25:22

99:7 Eksa 33:9