120
Dijan preya blanga albumbat
Wen aibin abum trabul, aibin jingat langa YAWEI,
en imbin ensim mi en album mi.
YAWEI, yu seibum mi brom ola laiyawan pipul,
en brom detlot pipul hu nomo jidan trubalawei.
 
Yumob ola laiyawan pipul, wanim God garra dum langa yumob?
Hau im garra panishim yumob?
Im garra panishim yumob brabliwei garram ola shapwan spiya blanga solja,
en barnimap yumob garram brabli hotwan eshis.
 
Mi jidanabat garram yumob, en im nogudwan.
Im seim laik mi jidan garram detlot krulbala pipul brom det dubala kantri gulum Mishek en Keda.
Aibin jidan brabli longtaim garram pipul hu nomo laigim blanga jidan gudbinjiwei.
Wen mi tok blanga jidan kwaitbalawei,
olabat wandi fait.